რა სარგებელს მიიღებენ „ბარბის“ წარმატებით MATTEL-ის ინვესტორები?

ბარბის სათამაშოების ფერადი ისტორია უკვე 60 წელიწადზე მეტია გრძელდება და ის მუდმივ ევოლუციას განიცდის. კულტურულ ფენომენად ქცეული სათამაშო მრავალი თაობის ბავშვობის საყვარელ მოგონებად ითვლება, ასეთი ძლიერი და სახელგანთქმული ბრენდის მიღმა კი კალიფორნიის შტატში დაფუძნებული კომპანია Mattel-ი დგას, რომელმაც ქერა თოჯინა საკულტო პერსონაჟად აქცია.

2023 წელს ბარბის ისტორიაში გარდამტეხი მოვლენა მოხდა, რეჟისორმა გრეტა გერვიგმა თოჯინა დიდ ეკრანზე გააცოცხლა და ბარბის წარმოსახვითი სამყაროს შესახებ მხატვრული ფილმი გადაიღო, რომელიც ნამდვილ გლობალურ სენსაციად იქცა.

დიდ ეკრანზე დებიუტიდან ერთ კვირაში „ბარბიმ“ მსოფლიოს მასშტაბით თითქმის 400 მილიონი დოლარის მოზიდვა შეძლო, რაც წელს გადაღებულ ფილმებს შორის ერთ-ერთი საუკეთესო შედეგია. თავად ფილმის გადაღებაზე $145 მილიონი დაიხარჯა, ანუ Warner Bros. Pictures-ისთვის „ბარბი“ სერიოზულ კომერციული წარმატებას წარმოადგენს.    

ფილმის ასეთი წარმატება მრავალი მიზეზითაა განპირობებული, მათ შორის ყველაზე მნიშვნელოვანი კი თავად ბარბია – თოჯინა, რომელსაც ყველა იცნობს. აქვე არ უნდა გამოგვრჩეს ორიგინალური მარკეტინგული კამპანია და მსახიობები, მარგო რობი და რაიან გოსლინგი, რომლებმაც დაკისრებულ მისიას თავი წარმატებით გაართვეს.

„ბარბის“ მონაგარი მხოლოდ კინოინდუსტრიის გამდიდრებით არ შემოიფარგლება, ფილმმა სარგებელი მოუტანა კომპანია Mattel-სა და მის ინვესტორებსაც. ერთთვიან პერიოდში Mattel-ის აქციების ღირებულება საფონდო ბირჟაზე თითქმის 17%-ითაა გაზრდილი, რაც პირდაპირ კავშირშია ბარბის დიდ ეკრანზე გამოჩენასთან. Mattel-ის საბაზრო კაპიტალიზაცია ამჟამად 7.5 მილიარდ დოლარს შეადგენს, კომპანიის საბაზრო ღირებულებიდან თითქმის 2 მილიარდი დოლარი კი პირდაპირ კავშირშია ფილმთან.

მოგეხსენებათ, Mattel-ი სათამაშოებსა და საბავშვო აქსესუარებს აწარმოებს, კომპანიის შემოსავლების 30% კი სწორედ ბარბის გაყიდვებზე მოდის. უშუალოდ ბარბის გარდა, კომპანია ბარბის მეგობრებსაც ყიდის, მათ შორის, კენს, რომლის როლიც წელს რაიან გოსლინგმა მოირგო. სათამაშოების გაყიდვები ხშირად დამოკიდებულია გარე ფაქტორებსა და მარკეტინგულ კამპანიებზე, წლის ყველაზე პოპულარული ფილმის გამოშვება კი ყველაზე მასშტაბური სარეკლამო კამპანიაა, რომელიც კომერციულმა კომპანიამ შეიძლება განახორციელოს.

დღეისათვის ფაქტობრივად ყველა სოციალურ ქსელში, გადაცემასა თუ შოუში შეხვდებით ცნობებს „ბარბის“ შესახებ. საზოგადოების მაღალ ინტერესზე მიუთითებს Google Trends-ის მონაცემებზე დაკვირვებაც, საიდანაც ჩანს, რომ ბარბი ასეთი პოპულარული არასოდეს ყოფილა, თანაც მთელი მსოფლიოს მასშტაბით.          

ბუნებრივია, ასეთი მასშტაბური მარკეტინგული კამპანიის განხორციელების შემდეგ, ინვესტორებსა და ანალიტიკოსებს აქვთ საფუძვლიანი მოლოდინი, რომ ბარბის სათამაშოებსა და აქსესუარებზე მოთხოვნა გაიზრდება, რაც Mattel-ის შემოსავლებზე პოზიტიურად აისახება.

ერთთვიან პერიოდში დაფიქსირებული 17%-იანი ზრდა სწორედ ამ მოლოდინთანაა დაკავშირებული. ანალიტიკოსების პროგნოზით, მიმდინარე წლის განმავლობაში ბარბის გაყიდვებით Mattel-ი დაახლოებით 100 მილიონი დოლარის შემოსავლის მიღებას შეძლებს, აქედან $75 მილიონი უშალოდ სათამაშოების გაყიდვებზე გადანაწილდება; თანხის დარჩენილ ნაწილს კი კომპანია სალიცენზიო შეთანხმებებით მიიღებს. 

უნდა აღინიშნოს, რომ ამჟამად გასაჯაროებულია კომპანიის მხოლოდ პირველი და მეორე კვარტლის ფინანსური შედეგები, სადაც „ბარბის“ ეფექტი ჯერაც არაა ასახული, რადგან თავად ფილმის დებიუტი მესამე კვარტალში შედგა. შესაბამისად, Mattel-ის გაყიდვების ზრდას ანალიტიკოსები მომდევნო ორი-სამი კვარტლის განმავლობაში პროგნოზირებენ, განსაკუთრებით კი საახალწლო პერიოდში, როდესაც სათამაშოებზე მოთხოვნა ყველაზე მეტად იზრდება.

არ გაჩერდე, გააგრძელე კითხვა