ინვესტირების რომელი სტრატეგიაა უკეთესი – აქტიური თუ პასიური?

საფონდო ბირჟაზე ინვესტირების არაერთი სტრატეგია და მეთოდი არსებობს, თუმცა მათ შორის ორია ძირითადი – აქტიური და პასიური. სახელწოდებებიდან გამომდინარე, ყველაფერი მარტივად ჩანს და ეს მართლაც ასეა, ინვესტირების ორივე ძირითადი მეთოდი საკმაოდ მარტივ პრინციპებს ეფუძნება, ამ ბლოგში კი სწორედ მათ შესახებ მოგიყვებით.

პასიური ინვესტირება

დავიწყოთ პასიური ინვესტირებით, ამ სტრატეგიის მიმდევრები საფონდო ბირჟას ენდობიან და მათი შედეგებიც ზუსტად ისეთია, როგორიც ძირითად ინდექსებს აქვთ. პასიური ინვესტორები პოზიციებს იშვიათად იცვლიან და აქტიურ ტრეიდინგს მაქსიმალურად ერიდებიან.

პასიური ინვესტირების უპირატესობები:

1. სიმარტივე

ამ სტრატეგიის განსახორციელებლად არ არის აუცილებელი კვარტალური ანგარიშგებების კითხვა, ტექნიკური ინდიკატორების გამოყენება და მთელი დღის განმავლობაში ბირჟაზე დაკვირვება. რაც მთავარია, პასიური სტრატეგია არ მოითხოვს სპეციფიკურ ცოდნას და მისი განხორციელება ნებისმიერ ადამიანს შეუძლია, ვისაც თანხის ინვესტირება სურს.

2. სტაბილური ზრდა

თუ ბირჟა გაიზრდება, პასიური ინვესტორის ამონაგებიც მოიმატებს. თუ ბირჟა დაეცემა – პირიქით. როგორც წესი, საფონდო ბირჟა აღმასვლისკენაა მიმართული და ამას ბოლო 100 წლის გამოცდილებაც ცხადყოფს, ამიტომ შეგვიძლია ვივარაუდოთ, რომ პასიური ინვესტორები წლიურად საშუალოდ 8-9%-ით შეძლებენ პორტფელის გაზრდას, რაც S&P500-ის საშუალო ამონაგებია. 

პასიური ინვესტირების უარყოფითი მხარეები:

1. საშუალო ამონაგები

პასიური საინვესტიციო სტრატეგია, როგორც წესი, საშუალო ამონაგებს იძლევა, ამიტომ ის უფრო მეტად გრძელვადიან პერსპექტივაზეა გათვლილი. თუკი დროის მოკლე მონაკვეთში დიდი სარგებლის მიღება გსურს, მაშინ შედარებით აქტიური სტრატეგია უნდა აირჩიო.  

2. დაუცველობა

პასიური ინვესტორი სრულად ენდობა ბაზარს, შესაბამისად, ბირჟის ვარდნის შემთხვევაში, მისი პორტფელის ღირებულებაც ეცემა. დაღმასვლის ტენდენცია, შესაძლოა, რამდენიმე კვარტალი გაგრძელდეს, ამ პერიოდის განმავლობაში კი პასიური ინვესტორი იძულებული იქნება ბაზრის აღდგენას დაელოდოს. მიუხედავად ამისა, უნდა აღინიშნოს, რომ გრძელვადიან პერსპექტივაში საფონდო ბირჟა ყოველთვის აღმასვლისკენაა მიმართული, ამიტომ ეს სტრატეგია განსაკუთრებით ეფექტიანი გრძელვადიანი მიზნების მისაღწევადაა.   

აქტიური ინვესტირება

აქტიურ მართვაში ჩართული ინვესტორები და ტრეიდერები ცდილობენ, დროის მოკლე მონაკვეთში რაც შეიძლება დიდი ფინანსური სარგებელი მიიღონ და თავი რისკებისგან დაიცვან, ამ მიზნის მისაღწევად ისინი აქტიურად ყიდიან და ყიდულობენ საინვესტიციო აქტივებს.

აქტიური ინვესტირების უპირატესობები:

1. პოტენციურად მაღალი ამონაგები

აქტივების ყიდვა-გაყიდვით ინვესტორები ცდილობენ, იმაზე უკეთესი შედეგი დააფიქსირონ, ვიდრე პასიურმა ფონდებმა, მაგალითად, S&P500-მა. აქტიურ ინვესტორს მყისიერად შეუძლია საბაზრო ცვლილებებს მოერგოს, რაც მას უპირატესობას და პოტენციურად მაღალ ამონაგებს აძლევს. როგორც წესი, ამ სტრატეგიას შედარებით გამოცდილი ინვესტორები და ტრეიდერები მიმართავენ, რომელთაც საფონდო ბირჟაზე ოპერირების მრავალწლიანი გამოცდილება აქვთ. ბაზრის აქტიური კვლევის, ინდიკატორებისა და სპეციალური ხელსაწყოების დახმარებით ინვესტორები ხშირად ახერხებენ ბაზრის ძირითად ინდექსებზე უკეთესი შედეგის დაფიქსირებას, რაც ამ სტრატეგიის მთავარი მიზანია.

2. რისკებისგან თავის დაცვა

პორტფელის აქტიურად მართვის მიზანი მხოლოდ მოგების გაზრდა არ არის, ამ სტრატეგიით ინვესტორები რისკებისგან თავის დაცვასაც ცდილობენ. მაგალითად, ბაზრის დაღმასვლის პერიოდში ამ ტიპის ინვესტორები სარისკო პოზიციებს ხურავენ და თავიანთ კაპიტალს შედარებით უსაფრთხო აქტივებში აბანდებენ.

აქტიური ინვესტირების უარყოფითი მხარეები:

1. დანახარჯი

ინვესტირების აქტიური მეთოდი დროსთან, ენერგიასთან და ფინანსურ ხარჯებთანაა დაკავშირებული. ამ სტრატეგიის განსახორციელებლად აუცილებელია სპეციფიკური ცოდნა და გარკვეულ ტექნიკურ ხელსაწყოებთან წვდომა, რომელთა დიდი ნაწილი ფასიანია. აქვე უნდა გავითვალისწინოთ ისიც, რომ აქტივების ყიდვა-გაყიდვა საკომისიოებთანაა დაკავშირებული, ეს ყველაფერი კი, საბოლოო ჯამში, საოპერაციო ხარჯებს ზრდის.

2. შედეგი არაა გარანტირებული

ისტორიულ მონაცემებზე დაკვირვება ცხადყოფს, რომ მუდმივად ბაზარზე უკეთესი შედეგის დაფიქსირება რთულია და არ არსებობს იმის არავითარი გარანტია, რომ თქვენი სტრატეგია ბაზარს ყოველთვის აჯობებს, ამიტომ აქტიურობა აუცილებლად წარმატებას არ ნიშნავს.

აირჩიე შენი სტრატეგია

ყოველი ადამიანი ინდივიდუალურია და მათი საინვესტიციო მიდგომაც განსხვავებულია. არ აქვს მნიშვნელობა, რომელ სტრატეგიას ანიჭებ უპირატესობას და რამდენად აქტიურად ერთვები ბირჟაზე ვაჭრობის პროცესში, საქართველოს ბანკის საინვესტიციო პლატფორმა ნებისმიერი ტიპის ინვესტორის საჭიროებებს მარტივად ერგება.

გაითვალისწინე, რომ ეს არ არის ფინანსური რჩევა!