ვინც 500 Georgia-ს პროგრამას თვალს ადევნებდით, ალბათ უკვე გეცოდინებათ, რომ აქსელერაციის პროგრამა შემოდგომიდან დაიწყო და მასში 13 სტარტაპი იღებდა მონაწილეობას. სტარტაპები აქსელერაციის პროცესში ინტენსიურად იღებდნენ პრაქტიკულ დავალებებს და იზიარებდნენ მენტორების გამოცდილებას/ცოდნას.
ცოტა ხნის წინ, 500 Georgia-ს ნაკადის დემო დღე შედგა, სადაც სტარტაპებმა თავიანთი პიჩები წარადგინეს, ისაუბრეს ტექნოლოგიური ბაზრის იმ შესაძლებლობებზე, რომლებსაც არსებული ბიზნესები ვერ ფარავენ და გააცნეს ინვესტორებს ის ინოვაციური ბიზნეს მოდელები, რომლებსაც მათი სტარტაპები მიყვებიან. მოდით გადავხედოთ, თუ რაზე ისაუბრა თითოეულმა მათგანმა:
Idialogue-მა, რომელიც საგანმანათლებლო პლატფორმაა ისაუბრა იმაზე, თუ რამდენად მნიშვნელოვანია, ინგლისური ენის სწავლის მსურველებმა არამხოლოდ სახელმძღვანელოებითა და აპლიკაციებით იმეცადინონ, არამედ მიიღონ ის გამოცდილება, რასაც უცხო ქვეყანაში მოგზაურობისას იღებენ, რადგან 6 თვე სახლში მეცადინეობა ტოლფასია 2 კვირა საზღვარგარეთ ყოფნისა და იქ კომუნიკაციისა. აღნიშნული სტარტაპი სწორედ ამ უნიკალურ გამოცდილებას სთავაზობს მომხმარებლებს და მათ პირველ ეტაპზე ონლაინ რეპეტიტორთან აკავშირებს, შემდეგ კი, ვირტუალური ექსკურსიებით სტუდენტები მთელი მსოფლიოს გარშემო მოგზაურობენ, მეტიც, იმისთვის, რომ დაუვიწყარი შთაბეჭდილებებით აივსონ და აღმოაჩინონ საკუთარი ინტერესის სფერო, სტუდენტებს აძლევს შესაძლებლობას შეხვდნენ ნასას ინჟინრებსა და ბესტსელერების ავტორებსაც კი.
Kovzy პირდაპირი გაყიდვების არხს წარმოადგენს რესტორნებისთვის, სტარტაპი კვების ობიექტებს აძლევს საშუალებას, 4-ჯერ გაზარდონ მარჟა იმის ხარჯზე, რომ მიიღონ სასურველი ონლაინ გადახდები და შეკვეთების მიწოდების სერვისი საკუთარი ვებ გვერდიდან.
სტარტაპმა პიჩში ყურადღება გაამახვილა იმაზე, თუ რამდენად მნიშვნელოვანია საკვებ ობიექტებს ჰქონდეთ პირდაპირი გაყიდვების არხი, რადგან მიტანის სერვისის პლატფორმები სრულიად თავად ურთიერთობენ მომხმარებლებთან და ობიექტები ამ პროცესის მიღმა რჩებიან. „ჩვენ ვიძლევით მომხმარებელთან ურთიერთობის შენარჩუნების საშუალებას, რაც განმეორებითი შეკვეთებიდან მიღებულ 4-ჯერ მეტ მოგებას ნიშნავს,“ – თქვა სანდრომ, სტარტაპის თანადამფუძნებელმა.
რაც შეეხება ePoint-ს, ეს არის ციფრული გადახდის აგრეგატორი და ელექტრონული კომერციის პლატფორმა მცირე და საშუალო საწარმოებისთვის აზერბაიჯანსა და მთელ მსოფლიოში, რომელმაც გადაწყვიტა 2.6 მილიარდიანი ბაზარი აეთვისებინა, მისთვის ინსპირაცია კი ის გახდა, რომ ქვეყნის მასშტაბით 10 000-დან მხოლოდ ერთი ბიზნესი ყიდდა პროდუქტს ონლაინ
სტარტაპმა დემო დღეს ყურადღება გაამახვილა ბაზრის შესაძლებლობებზე და ახსნა თუ რა უპირატესობა გააჩნია ePoint-ს სხვა პლატფორმებთან შედარებით. ePoint-ში მომხმარებლებს მხოლოდ საგადასახადო ID დოკუმენტი და საბანკო ბარათი სჭირდებათ.“ლენდინგ” გვერდის, ადვილი “ჩექაუთისა” და მობილური პანელის მეშვეობით, მათ შეუძლიათ სწრაფად გაყიდონ პროდუქცია ონლაინ, გაზარდონ მოგება და მიიღონ თანხა ძალიან სწრაფად, 8 კვირიანი პროცესი 3 წუთამდე დაიყვანონ, რაც ნამდვილად შთანბეჭდავია.
Kings International-ი ირაკლი ვეკუასა და ირაკლი ჯინჯიხაძის მიერ დაფუძნებული ციფრული საერთაშორისო ოლიმპიადაა, რომელიც პანდემიის პერიოდში შეიქმნა და მის წარმატებაზე 80 000 მოსწავლისა და 9000 მასწავლებლის ჩართულობაც მეტყველებს. როგორც სტარტაპის თანადამფუძნებელმა საკუთარი გამოსვლის ფარგლებში აღნიშნა, ამ ოლიმპიადას მნიშვნელოვანი უპირატესობა გააჩნია: ონლაინ პლატფორმის მეშვეობით, მასწავლებლებს მხოლოდ მოსწავლეების დარეგისტრირება მოეთხოვებათ, დანარჩენზე კი Kings-ი ზრუნავს. რაც შეეხება ნაშრომების შეფასებას, ისინი ავტომატურად ფასდება და სწრაფადვე ქვეყნდება შედეგები. და ბოლოს, მასწავლებლებს, მოსწავლეებსა და მშობლებს ინდივიდუალურად მორგებულ უკუკავშირსაც აწვდის ოლიმპიადის პლატფორმა.
Gotcha – ემოციების ამომცნობი სტარტაპია, რომელიც ქცევითი მეცნიერების კვლევის საფუძველზე, სახის ქცევის ანალიზის მეშვეობით ამოიცნობს ადამიანის მიკროემოციებს და ხსნის შესაძლო მოტყუების შემთხვევებს.
დემო დღეზე Gotcha-ს თანადამფუძნებელმა ისაუბრა იმაზე, თუ როგორი მრავალმხრივი გამოყენება შეიძლება, ჰქონდეს მიკროემოციების ამოცნობას მოხმარებლის კმაყიფილების კუთხით. თანაც, როგორც სტარტაპში ამბობენ, Gotcha-ს პროდუქტი მძლავრია და მარტივად მუშაობს: ვიდეო აღბეჭდავს ადამიანის სახეს, AI მოდელები იჭერენ და ინიშნავენ მის ემოციებს, შემდეგ კი 95%-იანი სიზუსტით აკეთებს პლატფორმა ამ მონაცემების დეტალურ ანალიზს.
Voiceloft-იც ამომცნობი პროდუქტის წარმდგენი სტარტაპია, რომელიც ხმოვანი მონაცემების შეგროვებით მეტყველების ამოცნობის ტექნოლოგიების განვითარებას უწყობს ხელს.
დემო დღეზე სტარტაპმა ისაუბრა პრობლემაზე, რომელიც მსოფლიო მასშტაბითაა გავრცელებული და ასევე – მისი გადაჭრის გზაზე. კერძოდ, მათი თქმით, 6 მილიარდ ადამიანს ჯერ კიდევ არ შეუძლია მშობლიურ ენაზე ან დიალექტზე გამოიყენოს ხმოვანი ტექნოლოგია, ეს კი მხოლოდ იმიტომ, რომ ბაზარი ინგლისურის რამდენიმე დიალექტსა და ევროპულ ენებზეა ორიენტირებული. Voiceloft-ს კი დღესდღეობით დიალექტების გარჩევის 95%-იანი სიზუსტის მაჩვენებელი აქვს, რაც გაცილებით აღემატება Google-ის 43%-ს.
Pyme საქართველოში დაფუძნებული მარკეტინგული პლატფორმაა, რომელიც მომხმარებლებს საშუალებას აძლევს, თავიანთი მონაცემებისა და ონლაინ მოქმედებების მონეტიზაცია მოახდინონ.
Pyme-მა ისაუბრა იმაზე, თუ როგორი არაეფექტურია ადამიანების მხრიდან ტექ-კომპანიების პროდუქტებზე წვდომის სანაცვლოდ პერსონალური ინფორმაციების მიწოდება უფასოდ. სწორედ ამიტომ, Pyme-ს აქვს პასპორტი, რომლის მეშვეობითაც შესაძლებელია მონაცემები ვებსაიტებსა და პლატფორმებზე ისე გააზიაროს მომხმარებელმა, რომ აკონტროლოს, როგორ იქნება ეს მონაცემები გამოყენებული, ვის ექნება მასზე წვდომა და როგორ შეეძლება მას ამ ინფორმაციისგან სარგებლის ნახვა.
Text’nPayMe-ს მეშვეობით შესაძლებელია, ნებისმიერ საკომუნიკაციო არხში/აპლიკაციაში მომხმარებელმა ფული გაგზავნოს. შედეგად, ეს პლატფორმა ეხმარება ბანკებს, მოიზიდონ მეტი მომხმარებლები და არ დადგნენ მათი დაკარგვის რისკის ქვეშ.
სტარტაპის პიჩის ფოკუსი საბანკო აპლიკაციების ეფექტურობა-არაეფექტურობაზე საუბრობდა. არსებული პრობლემების მოგვარების გზად კი Text’nPayMe-მ საზოგადოებას მობილური კლავიატურა შესთავაზა. „ესაა მობილური კლავიატურის SDK, რომელიც აერთიანებს სწრაფ გადახდებსა და კლავიატურის სიმარტივეს და რაც მთავარია, არის უსაფრთხო. ჩვენ უკვე გადავეცით ბანკებსა და სატელეკომუნიკაციო კომპანიებს პროდუქტი, ასე რომ, მათ მომხმარებლებს უკვე შეუძლიათ განახორციელონ უსაფრთხო გადარიცხვები ნებისმიერი აპლიკაციის გამოყენებით,“ – განაცხადა სტარტაპის თანადამფუძნებელმა საკუთარ პიჩზე.
QuickShipper-ი ქართული სტარტაპია, რომელიც ბიზნესებს პროდუქტის ხელმისაწვდომ და დროულ მიწოდებაში ეხმარება ოპტიმალური მარშრუტებისა და მათზე მორგებული ტრანსპორტის შეთავაზებით.
სტარტაპის პიჩი, ძირითადად, ეხებოდა იმას, თუ როგორ წყვეტს QuickShipper-ი მრავალ პრობლემას მიწოდების სერვისის მქონე კომპანიებისთვის. მათი თქმით, ესაა SaaS პლატფორმა, რომელიც კომპანიებს აძლევს შესაძლებლობას “სწრაფი ვაჭრობის” ყველა გამოწვევა ერთდროულად გადალახონ. იმ კომპანიებს, რომლებსაც სურთ თავად მიიტანონ ამანათი მომხმარებელამდე, სტარტაპი სთავაზობს სრულიად ახალ პროგრამულ ეკოსისტემას, რომელიც საკურიერო აპლიკაციებს მოიცავს. მაღაზიებს კი, რომელთაც საკუთარი პერსონალი არ ჰყავთ, შეუძლიათ აირჩიონ კურიერი ისეთი კომპანიებიდან, როგორებიცაა: Glovo და Wolt.
ქართულმა სტარტაპმა მომხმარებლებზეც იზრუნა და მათ ინფორმირებულობისთვის real-time ტრეკინგს აწვდის. საბოლოო ჯამში კი, QuickShipper-ის მეშვეობით კოპანიებს შეუძლიათ, იმ დღესვე შესთავაზონ მომხმარებელს სწაფი მიტანის სერვისი და სრულად აკონტოროლონ მიტანის საფასური.
Praktika.ai ვირტუალურ რეალობაზე დაფუძნებული ენის შემსწავლელი აპლიკაციაა, რომელსაც ინგლისურად საუბრის პრაქტიკაში რობოტი ჰყავს ჩართული. პიჩზე სტარტაპმა Ai ავატარის ხმა წარადგინა, რომელიც ერთ-ერთ სტუდენტს ინგლისურ ენაზე საუბარს პრაქტიკაში ასწავლიდა.
Praktika-მ ისაუბრა საკუთარ სტრატეგიაზე, რომელიც მოიცავს შემდეგს: სტუდენტები ხვდებიან ვირტუალურ სივრცეში, სადაც მათ შეუძლიათ, ხელოვნური ინტელექტის მქონე ავატარებთან გააბან ინგლისურად საუბარი, გაიღრმავონ ლექსიკონი, ისწავლონ გრამატიკა AI-ს მიწოდებული ფიდბექითა და საკუთარ პროგრესს თვალი ადევნონ.
რაც შეეხება Tass Vision-ს, ეს არის ვიდეო კონტენტის ანალიზის ერთგვარი ინსტრუმენტი, რომლის პიჩიც, ძირითადად, სტარტაპის მუშაობის სტრატეგიას უკავშირდებოდა. კერძოდ კი, მათ ისაუბრეს იმაზე, თუ როგორ უკავშირდება
სტარტაპი მაღაზიის დაცვის უკვე დამონტაჟებულ კამერებს, რის მერეც AI აანალიზებს მომხმარებლების ქცევას, აჯგუფებს მათ დემოგრაფიის მიხედვით და აფასებს რამდენად ჩართულები არიან თანამშრომლები სამუშაო პროცესში. შედეგად, Tass Vision-ის პანელი იძლევა რეკომენდაციებს თუ როგორ გაზარდოს მაღაზიამ გაყიდვები.
საერთაშორისო სავაჭრო B2B2C პლატფორმა Bonpara კი, ორიენტირებულია, რომ მომხმარებლებმა რაც შეიძლება მეტი ფული დაზოგონ, ხოლო ბიზნეს პარტნიორებმა კი მეტი პროდუქტი გაყიდონ და ახალი მომხმარებლები მოიზიდონ.
„ყველა სხვა e-commerce პლატფორმისგან განსხვავებით, ჩვენ გთავაზობთ ცალკე გვერდს თითოეული პროდუქტისთვის. გვერდები უნიკალური ტრეკინგ ბმულით, გადახდის საშუალებების მრავალფეროვნებითაც გამოირჩევა. ჩვენი პროდუქტის გამოყენებით, ბიზნესები გაყიდვებს 3-ჯერ ზრდიან,“ – განაცხადა Bonpara-ს თანადამფუძნებელმა საკუთარ პიჩზე.
და ბოლოს, Liveboard-ის პიჩი ეხებოდა იმას, თუ როგორაა შესაძლებელი მასწავლებლებისთვის მხოლოდ ერთი პლატფორმიდან დაიწყონ, მართონ და გაზარდონ თავიანთი პრაქტიკა.
როგორც სტარტაპის თანადამფუძნებელმა თქვა, „მხოლოდ ერთი მარტივი პლატფორმის გამოყენებით, შეუძლიათ სწავლებაზე კონცენტრირდნენ და არა ტექნოლოგიების მენეჯმენტზე, შესაბამისად, უჩნდებათ მეტი თავისუფალი დრო, ჰყავთ მეტი მოსწავლე და უფრო მეტსაც გამოიმუშავებენ.”
დამფუძნებლები კი იმედოვნებენ, რომ ეს პლატფორმა მალე დისტანციური სწავლების სინონიმი გახდება.
თუკი გსურს მოისმინო 13-ვე სტარტაპის სრული პიჩი, შეგიძლია ამ ლინკზე იხილო თითოეული და გაიზიარო მათი გამოცდილება.
500 Georgia საქართველოს ბანკის მიერ მხარდაჭერილი პროექტია, რომელიც აგრძელებს სტარტაპ ეკოსისტემის განვითარებასა და ხელშეწყობას.