საქართველოს ბანკის მხარდაჭერით 29 ივნისს 500 Georgia-ს მე-4 ნაკადის დემო დღე გაიმართა, სადაც ტექნოლოგიური სტარტაპების დამფუძნებლებმა დაინტერესებულ საზოგადოებას თავიანთი ინოვაციური პროდუქტები წარუდგინეს. მათ შორის ერთ-ერთი იყო Emonomy.
„მუსიკა, რომელიც ახლა მოისმინეთ და ვიზუალები, რომლებიც ახლა დაინახეთ, თქვენში რაღაც ემოციას ნამდვილად იწვევს,“ – განაცხადა ენდრიუ კისლოუმ, Emonomy-ს დამფუძნებელმა. მან ამ მაგალითით მიანიშნა საზოგადოებას, რომ თავისი სტარტაპის საქმიანობაც სწორედ ამ ემოციებზეა დაფუძნებული.
Emonomy-ს ამოცანაა, კომპანიებს/ბრენდებს ისეთი კამპანიების შექმნასა და გაშვებაში დაეხმაროს, რომლებიც მომხმარებლებში დადებით ემოციას გამოიწვევს.
მისივე თქმით, რეკლამების 80% არაეფექტიანია, ბრენდები კი მრავალ მილიონ დოლარს ხარჯავენ ამგვარ რეკლამებში. საბოლოო შედეგად კი იმაზე ბევრად ნაკლებ მომხმარებლებს იძენენ, ვიდრე ელოდნენ.
ენდრიუს თქმით, ბრენდებმა იციან, რომ საუკეთესო კამპანიები ნამდვილად იწვევს გარკვეულ ემოციას მომხმარებლებში, თუმცა იმის გასაგებად, რომელი კამპანია როგორ ემოციას იწვევს, არანაირი მონაცემი არ არსებობს ბაზარზე.
„მე ვარ ენდრიუ, ნეირომეცნიერი, რომელიც მომხმარებლის ქცევას 10 წლის განმავლობაში ვსწავლობდი და ჩემს თანამოაზრეებთან ერთად დავაარსე Emonomy.“
სტარტაპი კომპანიებს სთავაზობს: კომპიუტერულ ხედვასა და ხელოვნურ ინტელექტზე დაფუძნებულ საბაზრო კვლევას, ბიუჯეტის გადანაწილებას სხვადასხვა არხზე და მნიშვნელოვან მიგნებებს ამა თუ იმ კამპანიის შესახებ.
საბოლოო ჯამში კი, Emonomy ბრენდებს ეხმარება, დაზოგონ რაც შეიძლება მეტი მატერიალური რესურსი ეფექტიანი კამპანიების წარმოებით.