მსოფლიოში ცნობილ საინვესტიციო კომპანია 500 Global-ის სტარტაპების აქსელერატორს, სახელად 500 Georgia-ს, ქვეყანა უკვე მეხუთედ მასპინძლობს. საქართველოს ბანკისა და ინოვაციების ტექნოლოგიის სააგენტოს დახმარებით, შერჩეული მონაწილეები ინტენსიურ, სამთვიან პროგრამას გადიან და შეუდარებლად უკეთესი სტარტაპერები ხდებიან. 500 Georgia-ს ფარგლებში არჩეული ანტრეპრენერები გამოცდილი მენტორებისგან სწავლობენ როგორ გაზარდონ კომპანია, მოიზიდონ ინვესტიციები და სამიზნე აუდიტორია. ამჯერად, პროგრამაში სულ ათი ყველაზე ინოვაციური და მონდომებული სტარტაპი მოხვდა და მათგან ერთ-ერთი ყაზახური GoDays-ია.
GoDays-ის დამფუძნებლები ფიქრობენ, რომ თანამედროვე სამსახურებში სტრესი და გადაღლა, სამწუხაროდ, ნორმადაა ქცეული. რადგანაც ამ თანამედროვე სამუშაო კულტურის მსხვერპლი თვითონაც გამხდარან, გადაწყვიტეს, საკითხს ინოვაციურად მისდგომოდნენ და პრობლემის გადასაჭრელად ხელოვნური ინტელექტის გამოყენება სცადეს. GoDays-ის პროდუქტი AI-ს დახმარებით აგროვებს მონაცემებს თითოეულ თანამშრომელზე – ადგენს კლავიატურისა და მაუსის გამოყენების “სქემას” და მისი ანალიზის მიხედვით ხვდება, რა მდგომარეობაშია თანამშრომელი – გადაღლილია თუ შეუძლია დავალების შესრულება. ამ ფასდაუდებელი ინფორმაციის გათვალისწინებით, გუნდის ლიდერი დავალებებს ისე ანაწილებს თანამშრომლებზე, რომ არავინ გადაიღალოს და საქმეც ხარისხიანად შესრულდეს.
სტარტაპის იდეამ ძალიან მოგვხიბლა და დეტალებში უკეთ გასარკვევად GoDays-ის დამფუძნებლებს, იელნურ კაის, დინარა უსკენბაიევასა და დინმუხამედ აიტკალის გავესაუბრეთ:
მოგვიყევით GoDays-ის კეთილშობილურ მიზანზე, როგორ მიხვედით ამ იდეამდე?
თანამედროვე სამუშაო გარემო სტრესულია და ეს ძალიან გვაწუხებს, სწორედ ამიტომ გაგვიჩნდა იდეა ისეთი სტარტაპის შექმნისა, რომელიც თანამშრომლების გადაღლას შეუშლიდა ხელს და თანაც სამუშაო პროცესს არ შეაფერხებდა. თავად ვართ მოწმე, რა სავალალო შედეგის მოტანა შეუძლია გადაღლის მდგომარეობას არა მხოლოდ კონკრეტული ადამიანისთვის, არამედ მთელი ორგანიზაციისთვის, ამიტომ ძალიან გვინდოდა ერთხელ და სამუდამოდ პრობლემის აღმოფხვრის გზა გვეპოვა. ჩვენი მიზანია, შევმატოთ ძალა და გამბედაობა თანამშრომლებს, რომ იმოქმედონ სტრესის, გადაწვისა და მენტალური ჯანმრთელობის გამოწვევების დასაძლევად. სამუშაო გარემოში ადამიანის მენტალური და ემოციური ჯანმრთელობა უნდა გავაუმჯობესოთ და მთელი გუნდი ამ მიზნის ირგვლივ ვერთიანდებით.
GoDays-ის, როგორც პროდუქტის გამორჩეულობას განაპირობებს…
GoDays-ს, პირველ რიგში, მიზანი გამოარჩევს – ჩვენი უმთავრესი მიზანია გამოვიყენოთ მონაცემები და შევქმნათ გადაღლასთან გასამკლავებელი პერსონალიზებული მიდგომა, თან სამუშაო პროცესიც გავაადვილოთ. ჩვენს ინოვაციურობას კი – ხელოვნური ინტელექტისა და მონაცემთა ანალიზის ტექნოლოგიების ახლებური გამოყენება განაპირობებს. ინდივიდუალური მახასიათებლების ანალიზით, მენეჯერებს მხოლოდ მათზე მორგებულ, სხვადასხვა გამოსავალს ვთავაზობთ, რისი მეშვეობითაც შეუძლიათ სწორად განსაზღვრონ თანამშრომლის დავალებების მოცულობა და დაეხმარონ მას სამუშაოს უკეთ შესრულებაში. ჩვენი პლატფორმა გადაწვის პრევენციისთვის გამოყენებულ ტრადიციულ მეთოდებს წინ უსწრებს, რადგან ჭკვიანი დამხმარეა და თითოეული თანამშრომლის უნიკალურობას ითვალისწინებს.
Რაც მთავარია, ჩვენმა კვლევებმა დაადასტურა, რომ ოფისებში გადაღლის პრევენციისთვის საჭირო საშუალებებზე საკმაოდ დიდი მოთხოვნაა. ასე რომ, თანამშრომლები და დამსაქმებლები აქტიურად ეძებენ სტრესთან გასამკლავებელ ინოვაციურ, ეფექტიან გზებს. GoDays ამ მოთხოვნებს აკმაყოფილებს და მეტიც, სფეროში მოწინავეა ინტუიციური, ხელოვნური ინტელექტით მომუშავე ხელსაწყოთი, რომელიც კეთილდღეობას უზრუნველყოფს და შედეგებს აუმჯობესებს.
როგორი იყო GoDays 500 Georgia-მდე?
Სანამ 500 Georgia-ს განაცხადი შევავსეთ, ამ ინდუსტრიაში რამდენიმე კრიტიკული მნიშვნელობის ეტაპს მივაღწიეთ. წარმატებით შევქმენით და ჩავუშვით ჩვენი პლატფორმა, პირველი მომხმარებლები ვიპოვეთ და მათგან დადებითი შეფასებები დავიმსახურეთ. ისინი კმაყოფილნი იყვნენ პროდუქტის ეფექტითა და გამოყენების სიმარტივით. ჩვენმა თვიურმა სტაბილურმა შემოსავალმა 34 ათასს მიაღწია, მომხმარებლების რაოდენობამ კი – 23 ათასს. მიღწეული შედეგები აშკარად გვკარნახობდა, რომ ჩვენს პროდუქტზე მოთხოვნა არსებობდა და მას ჰქონდა პოტენციალი, შეეცვალა შრომისგან გადაწვის მიმართ არსებული მიდგომები.
თუმცა, ისიც გავაცნობიერეთ, რომ ეფექტის გასაზრდელად და ჩვენი მიზნის მისაღწევად გვჭირდებოდა დახმარება, სწავლება და რესურსები… 500 Georgia-ს კი ამ ყველაფრის მოცემა შეეძლო. პროგრამას შეუძლია სტარტაპებზე იზრუნოს და ისინი გამოზარდოს, რაც ჩვენს ხედვას ემთხვევა და ამან განსაკუთრებით მოგვანდომა პროგრამაში მონაწილეობა. გამოცდილი მენტორების წრეში ყოფნის, ინვესტორებთან წვდომის, კოლეგა ანტერპრენერებთან ურთიერთობისა და პროფესიონალურად შედგენილი პროგრამის გავლის შესაძლებლობამ, მოგვხიბლა და გვიბიძგა აპლიკაციის შევსებისკენ.
Რას ელით 500 Georgia-სგან და როგორ წარმოგიდგენიათ GoDays-ის მომავალი?
500 Georgia-სგან ორი მთავარი მოლოდინი გვაქვს: პირველი ზრდას უკავშირდება – ვიმედოვნებთ, რომ პროგრამის რესურსებისა და მენტორობას პლატფორმის მასშტაბების გაზრდაში გამოვიყენებთ. ერთი სული გვაქვს, მომხმარებლების ბაზა გავაფართოოთ და სტრატეგიული თანამშრომლობა დავამყაროთ ისეთ კომპანიებთან, რომელთათვისაც თანამშრომლების კეთილდღეობა ჩვენსავითაა პრიორიტეტი.
მეორე, რაც გვინდა მივიღოთ, არის ინფორმაცია იმის შესახებ, თუ როგორ მოვიპოვოთ ინვესტიცია. თუ გავითვალისწინებთ, რომ მალე ფინანსების მოძიების მომდევნო რაუნდს ვიწყებთ, სახსრების მოპოვების ხერხების ცოდნას ჩვენთვის განსაკუთრებული მნიშვნელობა ენიჭება. გვახარებს, რომ პროგრამა ახალი ინვესტიციების მოპოვების შანსებსა და საჭირო კავშირებსაც გვთავაზობს.
GoDays-ის სამომავლო გეგმები სტრატეგიულ ბაზრებზე გაფართოებას მოიაზრებს. ვგეგმავთ დამატებითი ფუნქციების განვითარებასაც, რათა პლატფორმა გამდიდრდეს და გამრავალფეროვნდეს. რაც მთავარია, ვაპირებთ ბოლომდე მივყვეთ ჩვენს იდეას – სამუშაო გარემოში მენტალური ჯანმრთელობისა და კეთილდღეობის გაუმჯობესებას. ყველანაირად ვეცდებით, რომ 500 Georgia-ს დახმარებით ეს მიზანი რეალობად ვაქციოთ.