500 Georgia-ს აქსელერაციის პროგრამა მონაწილეების მეხუთე ნაკადს მასპინძლობს და ისინი უკვე ინტენსიური სწავლისა და განვითარების პროცესში არიან ჩართული. წელს პროგრამაში მონაწილეობას 5 სხვადასხვა ქვეყნიდან შერჩეული 10 სტარტაპი იღებს, მათ შორისაა Awork-იც – პირველი ქართული დასაქმების აპლიკაცია.
Awork-ზე სამსახურის მაძიებელს შეუძლია CV შეადგინოს, ვაკანსიები ადგილმდებარეობის, საჭირო გამოცდილებისა და სექტორის მიხედვით გაფილტროს, და საიტიდან გაუსვლელად, ერთი სვაიპით გაგზავნოს სასურველ პოზიციაზე. პლატფორმა დამსაქმებელს აძლევს საშუალებას საკუთარი ბიზნეს პროფილით გააციფრულოს და უფრო ადვილად მართოს HR პროცესები.
Awork კომპანიებს უკვე ასი ათასზე მეტ პოტენციურ თანამშრომელთან აკავშირებს. პლატფორმა ძირითადად დამწყებ და საშუალო პოზიციების ვაკანსიებსა და კადრებზე კონცენტრირდება. აღსანიშნავია ისიც, რომ ჩაშვებიდან 1 წლის თავზე, Awork საქართველოში ტექნოლოგიურად ყველაზე განვითარებული და სწრაფად მზარდი დასაქმების ციფრული ეკოსისტემა გახდა.
500 Georgia-ს აქსელერაციის პროგრამის დატვირთული განრიგის მიუხედავად, Awork-ის გუნდთან – გიორგი რაზმაძესთან, მიხეილ ნემსიწვერიძესთან და ვახტანგ ტაბატაძესთან გასაუბრება მაინც მოვახერხეთ და მათ პროგრამისგან მიღებულ შთაბეჭდილებებსა სამომავლო გეგმებზე ვკითხეთ.
1. როგორ შეიკრა თქვენი გუნდი და გაჩნდა Awork-ის იდეა?
ჩვენი გუნდი 5 წელია რაც სხვადასხვა ტექნოლოგიურ სტარტაპებსა და პროექტების შექმნაშია ჩართული. ამ პერიოდში ხშირად დაგვჭირდა ვაკანსიის გამოცხადება და შემდგომ მიღებული აპლიკანტების გადარჩევა, რა პროცესშიც დავინახეთ არაერთი მიმართულებით ტექნოლოგიური გაუმჯობესების საჭიროება. რადგან, ქართული დასაქმების პლატფორმების უმეტესობა ვერ იძლევა იმ ტექნოლოგიურ მოქნილობას, რომელიც საჭიროა შერჩევის სრული პროცესის ციფრულად მართვისთვის.
თუმცა, არ გვინდოდა მხოლოდ ტრადიციული დასაქმების პლატფორმის შექმნა, რომელიც მხოლოდ ქართულ ბაზარზე იქნებოდა ორიენტირებული. სწორედ ამიტომ ჩავატარეთ უცხოური ბაზრის კვლევაც, დავისახეთ გრძელვადიანი გეგმა და შემდეგ დავიწყეთ პროდუქტზე მუშაობა.
მნიშვნელოვანია ის ფაქტიც, რომ 4 ადამიანისგან შემდგარი გუნდი დღეს უკვე 13 ადამიანს მოიცავს, თითოეული მათგანი სწორედ Awork-ის პლატფორმის გავლით დასაქმდა ჩვენთან და დღეს ერთად ვქმნით Awork-ს!
2. რა აქვს Awork-ს განსაკუთრებული?
Awork-ს განსაკუთრებულად ის მარტივი გამოცდილება ხდის, რომელიც დღეს დასაქმების ბაზარზე დავნერგეთ. ჩვენი მიზანია სამსახურის ძიება არ ასოცირდებოდეს სტრესთან და როგორც მაძიებლების, ასევე კომპანიებისთვის იყოს სწრაფი, ეფექტური და შედეგზე ორიენტირებული.
სამუშაოს მაძიებელს შესაძლებლობას ვაძლევთ მობილური აპლიკაციით, ლოკაციის გამოყენებით მარტივად მოიძიონ სასურველი ვაკანსია და თითის ერთი მოძრაობით (სვაიფით) აპლიკაციიდანვე გააგზავნონ სივი სასურველ კომპანიასთან. სექტემბერში, აპლიკაციის გაშვებიდან 1 წლის თავზეც კი საქართველოს რეგიონის Top Chart-ებში მე-4 პოზიციას ვიკავებდით, 65,000 მეტ ადამიანს აქვს ჩვენი აპლიკაცია ჩამოტვირთული და ყოველთვიურად 10,000-ზე მეტი აქტიური მომხმარებელი გვყავს პლატფორმაზე.
მეორე მხრივ ბიზნესებს შესაძლებლობა აქვთ შერჩევის პროცესის გაციფრულების და დამწყებ, საშუალო პოზიციებზე კადრების სწრაფად მოძიების. დღეის მონაცემებით Awork-ზე 1,000-ზე მეტი ბიზნესია რეგისტრირებული და ჩვენ მომსახურებას იყენებენ სხვადასხვა სფეროს ლიდერი კომპანიები, მათ შორისაა საქართველოს ბანკიც.
3. რა გზა გამოიარეთ 500 Georgia-მდე და რამ გადაგაწყვეტინათ აქსელერაციის პროგრამის აპლიკაციის შევსება?
გავუშვით პროდუქტის MVP ვერსია, რომელიც მხოლოდ ვებ-გვერდით იყო შემოფარგლული. შემდეგ იყო დასაქმების პირველი ქართული აპლიკაციის Awork App-ის შექმნა. ამ აპლიკაციის გაშვება თავიდან ბოლომდე ექსპერიმენტი იყო, თუმცა სამსახურის ძიების განსხვავებულმა გამოცდილებამ რომელიც დასაქმების ბაზარზე შემოვიტანეთ, გაამართლა. 2022 წლის დეკემბერში გავხდით ჯიტას 150,000 ლარიანი საგრანტო კონკურსის გამარჯვებული, რამაც ხაზი გაუსვა ჩვენი პროდუქტის დროულობას და გლობალურ პოტენციალს. გრანტის მოგების შემდგომ კიდევ უფრო სწრაფი ზრდა დავიწყეთ, განვავითარეთ როგორც პროდუქტი ასევე ყოველდღიური ბიზნეს პროცესები, ვიყავით წარმოდგენილები სხვადასხვა სტარტაპ სამიტებსა თუ ღონისძიებებზე.
500 Georgia ყოველთვის წარმოადგენდა ჩვენს ინტერესის სფეროს, რადგან ვთვლით რომ ის შესაძლებლობა, რომელსაც 500 გლობალის აქსელერატორი აძლევს ქართულ სტარტაპს ძალიან მნიშვნელოვანი და ღირებულია. სწორედ ამიტომ გადავწყვიტეთ, რომ ჩვენი განვითარების ამ ეტაპზე 500 Georgia-ში მოხვედრა, განვითარების კიდევ უფრო სწორ გზაზე დაგვაყენებდა.
4. როგორია გუნდის მოლოდინები და სამომავლო გეგმები?
500 Georgia-ს აქსელერატორში მოხვედრა ჩვენი გუნდისთვის დიდ შესაძლებლობებთან ერთად, მნიშვნელოვანი პასუხისმგებლობაცაა. გვჯერა, რომ პროგრამა დაგვეხმარება ყველა მიმართულებით გაუმჯობესებასა და სწრაფ განვითარებაში. 12 კვირის განმავლობაში უცხოელ მენტორებთან აქტიური მუშაობა, ექსპერიმენტების ჩატარება – მარკეტინგის, გაყიდვების, პროდუქტის განვითარების ჭრილში და მონაცემებზე დაყრდნობით შედეგების ანალიზი ჩვენს სტარტაპს განვითარების ახალ ეტაპზე გადაიყვანს. ასევე მნიშვნელოვანია, რომ Awork გახდა 500 Global-ის community-ს წევრი, რომელიც მთელი მსოფლიოს მასშტაბით 2,800-ზე მეტ სტარტაპს აერთიანებს.
წელს ორიენტირებული ვართ ქართულ ბაზარზე კიდევ უფრო სწრაფად ზრდაზე. 500 Georgia-ს აქსელერატორის გავლის შემდეგ, დაგეგმილი გვაქვს დამატებითი ინვესტიციების მოზიდვა და 2024 წელს ევორქის უცხოურ ბაზარზე ექსპანსია.