საქართველოს ბანკის მხარდაჭერით 29 ივნისს 500 Georgia-ს მე-4 ნაკადის დემო დღე გაიმართა, სადაც ტექნოლოგიური სტარტაპების დამფუძნებლებმა დაინტერესებულ საზოგადოებას თავიანთი ინოვაციური პროდუქტები წარუდგინეს. მათ შორის ერთ-ერთი იყო Glorri.
„ალბათ ფიქრობთ, რომ კიდევ ერთი HR პლატფორმა ზედმეტია, თუმცა, ეს ასე არ არის!“ – ანარ გასიმლიმ საკუთარი გამოსვლა 500 Georgia-ს დემო დღეზე სწორედ ამ სიტყვებით გახსნა.
Glorri არის სტარტაპი, რომელიც ადამიანური რესურსის მაძიებლებსა და სამუშაოს დაწყების მსურველებს მარტივად აკავშირებს ერთმანეთთან.
როგორც ანარმა თქვა, ამერიკულ კომპანიებს არასასურველი კადრის აყვანა ყოველწლიურად 1 ტრილიონი დოლარი უჯდება. თუმცა, Glorri ამ საკითხს მარტივად აგვარებს. როგორ? პლატფორმა საამისოდ იყენებს როგორც ხელოვნურ ინტელექტს, ისე ანალიტიკისა და კანდიდატის შეფასების ხელსაწყოებს.
შესაბამისად, პლატფორმა აანალიზებს კადრის მონაცემებს და თავისით საზღვრავს რომელ პოზიციას რომელი კადრი მოერგება. კომპანია კი შემდეგ ავტომატურად ნახულობს შესაფერის კანდიდატებს 2-ჯერ უფრო სწრაფად, ვიდრე ის ამას სხვა პლატფორმების გამოყენებით ახერხებდა. თანაც, ამ პროცესში ისინი დიდი ოდენობით მატერიალურ რესურსსაც ზოგავენ.
როგორც ანარმა განაცხადა, დღესდღეობით Glorri-ს ჰყავს 56 კლიენტი და ყოველთვიურად 25 000 დოლარამდე მოგებას იღებს სტარტაპი.