ვირჩევთ წლის საუკეთესო მასწავლებელს

რატომ უნდა მიიღოთ მონაწილეობა მასწავლებლის ეროვნული ჯილდოს კონკურსში? – პროექტის მხარდამჭერია საქართველოს ბანკი

სწავლისა და შემეცნების სამყაროში მოსწავლეებს პირველი ნაბიჯების გადადგმაში მასწავლებელი ეხმარება. სწორედ ისინი განსაზღვრავენ ახალგაზრდების დამოკიდებულებას ცოდნის მიღებისადმი და ხელს უწყობენ მათი მსოფლმხედველობის ჩამოყალიბებას.

მასწავლებლების დაფასებისა და აღნიშნული პროფესიის პოპულარიზაციის მიზნით კი მასწავლებლების ეროვნული ჯილდო,  გლობალური ინიციატივის “Global Teacher Prize”- ის ფარგლებში, მასწავლებლების კონკურსს ახორციელებს. პროექტის მხარდამჭერია საქართველოს ბანკი.

ინიციატივა იმ პროფესიონალების გამოვლენას ისახავს მიზნად, რომლებსაც განსაკუთრებული წვლილი შეაქვთ განათლების სფეროში და ახალ სტანდარტებს ქმნიან. 

„მასწავლებლის ეროვნულმა ჯილდომ მომცა ბევრად მეტი, ვიდრე აღიარებაა. მან მომცა ძალა და მოტივაცია. ეს არ არის მხოლოდ ჩემი გამარჯვება, ეს ჯილდო ეკუთვნის ჩემს სკოლას, იმ მოსწავლეებს, რომლებთანაც ვმუშაობ და მასწავლებლებს, რომლებიც ყოველდღიურად ცდილობენ, რომ შექმნან უკეთესი მომავალი. მასწავლებლობა არ არის მხოლოდ პროფესია, ეს არის გზა, რომელიც ათასობით მოსწავლის მომავალს ეხება. ჯილდომ მაგრძნობინა, რომ ჩემს შრომას აფასებენ, ხედავენ და შესაძლებელია, რომ შენი პატარა საქმე აქციო დიდ ისტორიად. ამიტომ, ვურჩევ ყველა მასწავლებელს, მიიღონ მონაწილეობა კონკურსში“, – აღნიშნავს ნათია უჩავა, მასწავლებლის ეროვნული ჯილდოს 2024 წლის გამარჯვებული.  

როგორ უნდა მიიღოთ მონაწილეობა კონკურსში?

კონკურსში მონაწილეობის მიღება ნებისმიერ მოქმედ მასწავლებელს შეუძლია, ამისათვის, მათ უნდა გაიარონ რეგისტრაცია და შეავსონ აპლიკაცია ონლაინ. 

ამასთან, ჯილდოს ფარგლებში, სასურველი ნომინანტების წარდგენა შეუძლიათ როგორც ფიზიკურ პირებს, ასევე ორგანიზაციებს და საზოგადოებრივ ჯგუფებს.

როგორც რეგისტრაციის გავლა, ასევე კანდიდატების წარდგენა შესაძლებელია პლატფორმაზე: https://application.tprize.ge/

მასწავლებლების ჯილდოზე განაცხადების მიღება უკვე დაიწყო და ის 30 მაისს დასრულდება.

კონკურსი სამ ეტაპად გაიმართება:

• პირველ ეტაპზე აპლიკაციები ტექნიკურად შემოწმდება;
• მეორე ეტაპზე კონკურსანტთა ათეული შეირჩევა;
• მესამე ეტაპზე ხუთი ფინალისტი დასახელდება;
• 5 ოქტომბერს კი მასწავლებლის მსოფლიო დღეს მასწავლებლის ეროვნული ჯილდოს მფლობელი გამოვლინდება.

კონკურსანტთა შერჩევა 19 წევრისგან დაკომპლექტებული ჟიურის მიერ მოხდება. ჟიურის წევრები არიან განათლების სპეციალისტები, მეცნიერები, პედაგოგები და მედიის წარმომადგენლები.

ისინი მასწავლებლებს შემდეგი პროფესიული სტანდარტებით შეაფასებენ:

• მოსწავლეების სწავლის შედეგების დინამიკა;
• სწავლების ინოვაციური და ეფექტური მიდგომების გამოყენება;
• ზოგადსაკაცობრიო მოქალაქეობრივი ღირებულებებისა და პრინციპების სწავლება;
• საზოგადოებრივი აღიარება და სამოქალაქო აქტივობა;
• პროფესიული განვითარება და გამოცდილების გაზიარება.

თუ გსურთ, მონაწილეობა მიიღოთ მასწავლებლების ჯილდოს კონკურსში, დეტალური ინფორმაციის მისაღებად ეწვიეთ ვებგვერდს.

ინფორმაციისთვის, ახალგაზრდების მხარდაჭერის მიზნით, საქართველოს ბანკის CSR მიმართულებისთვის უკვე 5 წელზე მეტია განათლება პრიორიტეტია. სწორედ ამიტომ, ბანკი 40-ზე მეტ საგანმანათლებლო პროექტს ახორციელებს და უჭერს მხარს, რითაც 500 000-ზე მეტი მოსწავლისთვის, სტუდენტისა და ახალგაზრდა პროფესიონალისთვის ქმნის განათლების შესაძლებლობას. ბანკის CSR მიმართულების პორტფელი მოიცავს ისეთ საგანმანათლებლო პროექტებს, როგორებიც არის: საქართველოს ბანკის სტიპენდიები; გიორგი ჩახავას სახელობის სტიპენდია; დიდ ბრიტანეთში, აშშ-სა და გერმანიაში სწავლის სრული დაფინანსება; იდეათეკები – საქართველოს ბანკის ბიბლიოთეკების პროექტი; საქართველოს ბანკისა და კომაროვის ერთობლივი პროექტი – STEM სკოლა; საქართველოს ბანკის ოლიმპიადები მოსწავლეებისთვის: STEM ოლიმპიადა, ეკონომიკის ოლიმპიადა, Kings-ის ფინანსური განათლების ოლიმპიადა, ევერესტი. ამასთან, საჯარო მეტყველების კონკურსი, და სხვა.

საქართველოს ბანკის მიერ განხორციელებული საგანმანათლებლო პროექტების შესახებ დეტალური ინფორმაციის მისაღებად ეწვიეთ ვებგვერდს csr.bog.ge