საქართველოს ბანკის ერთ-ერთი მთავარი პრიორიტეტია, რომ ახალგაზრდებს განათლებისა და პროფესიული განვითარების შესაძლებლობები შეუქმნას. ამის მაგალითი კი ლიდერატორის პროგრამაა, რომელიც სწორედ ახალგაზრდა ტალანტების მოზიდვას, კარიერული წინსვლისა და საჭირო უნარ-ჩვევების შეძენის უნიკალური შანსის მიცემას ემსახურება.
წლევანდელი პროგრამა 24 იანვარს გამოცხადდება და ეს უკვე რიგით მე-8 ლიდერატორი იქნება!
ხშირად დამამთავრებელი კურსის სტუდენტებმაც კი ზუსტად არ იციან, რა მიმართულებით სურთ კარიერისა და უნარების განვითარება. ლიდერატორის ერთ-ერთი მთავარი უპირატესობა როტაციული პრინციპით დასაქმებაა, რაც 1 წლის განმავლობაში საქართველოს ბანკის სხვადასხვა მიმართულებით არაერთ პოზიციაზე დასაქმებას გულისხმობს. პროგრამის მონაწილეები მიიღებენ არამხოლოდ თეორიულ, არამედ პრაქტიკულ ცოდნასაც. ახალგაზრდები გაივლიან ტრენინგებს და გამოცდილი მენტორების ჩართულობით იმუშავებენ მათთვის საინტერესო პროექტებზე.
გარდა იმისა, რომ როტაციული დასაქმების პრინციპი ახალგაზრდებს ბანკის ფუნქციონირების შესახებ სრულყოფილ სურათს დაანახებს, ასევე დაეხმარება, თავად გაარკვიონ, თუ რა მიმართულებით სურთ კარიერული განვითარება.
მიღება გამოცხადდება 14 პროგრამაზე, რაც საქართველოს ბანკის 40-ზე მეტ სხვადასხვა მიმართულებას მოიცავს. კონკურსში მონაწილეობა შეუძლიათ მე-3 და მე-4 კურსის სტუდენტებსა და ახალ კურსდამთავრებულებს.
მართალია, 2017 წლიდან მოყოლებული პროგრამა ლიდერატორის მიზნები არ შეცვლილა, თუმცა, წლების განმავლობაში იცვლებოდა დასაქმების ბაზარი. ბაზრის ტენდენციებიდან გამომდინარე, გაიზარდა პროგრამის ანაზღაურებაც. ასევე, წინა წლებთან შედარებით, შეთავაზებები სტუდენტებისთვის არის უფრო მრავალფეროვანი. ზოგიერთი მიმართულება სხვადასხვა დროს სხვადასხვა პოპულარობითა და მოთხოვნით გამოირჩეოდა. ტექნოლოგიების განვითარებასთან ერთად, ბოლო წლებში, განსაკუთრებით გაიზარდა მოთხოვნა ინფორმაციული ტექნოლოგიების (IT) პროგრამაზე და რა თქმა უნდა, ეს წლევანდელი ლიდერატორის პროგრამაზეც აისახება. ასევე ლიდერატორს დაემატა ისეთი პროგრამები, როგორებიცაა მომხმარებელთა ლოიალურობის პროგრამების მართვა, ბიზნესის დეველოპმენტი და ქოფირაითინგი.
„ვცდილობთ ვუპასუხოთ გაზრდილ მოთხოვნას და IT დეპარტამენტში სხვადასხვა მიმართულებით დავასაქმოთ სფეროს მომავალი პროფესიონალები. ასევე, განსაკუთრებული პოპულარობით სარგებლობს მარკეტინგისა და ადამიანური კაპიტალის მართვის პროგრამები, თუმცა ზოგადად ყველა გამოცხადებული მიმართულება საკმაოდ მოთხოვნადია სტუდენტებში, მათ შორის ფინანსები, ციფრული არხების განვითარება, ბიზნესის ანალიტიკა და რეპორტინგი, საბანკო სამართალი და ა.შ.“, – აცხადებს საქართველოს ბანკის განვითარების პროგრამების გუნდის ხელმძღვანელი, ელენე ქათამაძე.
პროგრამა ლიდერატორი 2017 წლიდან ყოველწლიურად ხორციელდება და მასში მონაწილეობა უკვე მიღებული აქვს 375 სტუდენტს. მონაწილეთა 85%-მა კარიერა საქართველოს ბანკში განაგრძო, რაც პროგრამის წარმატებაზე მიუთითებს. შესაბამისად, გასაკვირი არაა, რომ ლიდერატორი დიდი პოპულარობით სარგებლობს სტუდენტებში.
პროგრამის აპლიკაციების მიღების შემდეგ საქართველოს ბანკი მონაწილეების შერჩევის პროცესს იწყებს.
„მონაწილეების შერჩევის პროცესი მოიცავს ისეთ ეტაპებს, როგორებიცაა ზოგადი, ანალიტიკური და ლოგიკური უნარების ტესტირება, პროფესიული ტესტირება, ინდივიდუალური გასაუბრება, ინდივიდუალური ან ჯგუფური ქეისი/პრეზენტაცია. ეტაპები და მოთხოვნები პროგრამების მიხედვით განსხვავებულია და მიმართულებების საჭიროებებს უკავშირდება, თუმცა ყველა პროგრამაზე თანაბარი მნიშვნელობა ენიჭება აპლიკანტის მოტივაციას და მიზანდასახულობას. აქვე აღვნიშნავ, რომ ლიდერატორში მონაწილეობის მისაღებად სამუშაო გამოცდილებაარ არის სავალდებულო“, – ამბობს ელენე ქათამაძე.
საქართველოს ბანკი, როგორც წამყვანი ტექნოლოგიური კომპანია, მომავალშიც გააგრძელებს ახალგაზრდებისთვის ახალი შესაძლებლობების შექმნას და კარიერული განვითარების ხელშეწყობას.
დაიწყე საუკეთესო გამოცდილებით, გახდი ლიდერატორი!