თუ კითხვაც გიყვარს და წაკითხულზე მსჯელობაც, შენთვის საინტერესო ამბავი გვაქვს — წიგნების თაროსა და Student Card-ის თანამშრომლობით, სტუდენტური ლიტერატურული პოდკასტების სერია იწყება. პოდკასტებს წიგნების თაროს სხვადასხვა სტუდენტური სეზონის გამორჩეული მონაწილეები: გოგა გუგავა, ანა ჯაფარიძე და შაკო ბრეგაძე გაუძღვებიან.
როგორც წამყვანები გვპირდებიან, შემეცნებით და საინტერესო პოდკასტში ისაუბრებენ ლიტერატურაზე — და არა მხოლოდ. ამასთან, წიგნებზე არანაკლებ საინტერესო სტუმრების მოსმენის შესაძლებლობა გვექნება.
რატომ შეიძლება იყოს პოდკასტი შენთვის საინტერესო? უპირველესად, იმიტომ, რომ ეს ერთ-ერთი ყველაზე მოსახერხებელი ფორმატია ახალი ინფორმაციის მისაღებად. შეგიძლია უსმინო ტრანსპორტში, სახლის დალაგებისას ან მაღაზიის რიგში დგომის დროსაც კი.
„კარგი ფორმატია — შეგიძლია მოსმენის პარალელურად სხვა რამ აკეთო. დრო სასიამოვნოდ გადის და, რაც მთავარია, დიდ ინფორმაციასაც იღებ“, — ამბობს შაკო.
სამწუხაროდ, ქართულენოვანი პოდკასტებით, მით უმეტეს ლიტერატურაზე, მაინცდამაინც განებივრებულები არ ვართ. თუმცა, წიგნების თაროს ახალი პროექტი სწორედ ამ ცარიელი სივრცის შევსებას ისახავს მიზნად.
ეს არის პოდკასტი ყველასთვის, ვისაც ლიტერატურა უყვარს. განსაკუთრებით საინტერესო იქნება მათთვის, ვინც დროის სიმცირეს უჩივის, თანამედროვე ლიტერატურულ ტენდენციებსაც ვერ ადევნებს თვალს და საინტერესო რეკომენდაციების მიღებაც უნდა.
აღსანიშნავია ის ამბავიც, რომ პოდკასტების სერიის დაწყება წიგნების თაროს მე-10 საიუბილეო სტუდენტურ სეზონს დაემთხვა. პოპულარული ტელეგადაცემის სპონსორი, ტრადიციულად, საქართველოს ბანკის სტუდენტური ბარათია, რომელიც ამ თანამშრომლობით მეტ შესაძლებლობას ქმნის განათლებისთვის, განვითარებისა და აღმოჩენებისთვის.
წიგნების თაროს სტუდენტური პოდკასტი კი აუცილებლად გახდება შენთვის აღმოჩენა. ამაში შეგიძლია თავადვე დარწმუნდე — პირველი ეპიზოდი უკვე გამოვიდა. მასში წამყვანები ერთ დღეში წასაკითხ წიგნებსა და მათგან მოგვრილ ემოციებზე საუბრობენ. ისე კი, მსგავსი წიგნების და პოდკასტების შედარებაც შეიძლება — არც ერთი მოითხოვს შენგან დიდი დროის დათმობას, მაგრამ ორივეს შეუძლია საინტერესო რაღაცებზე დაგაფიქროს.
აი, პირველი ეპიზოდის მოსმენა კი რეკომენდაციებითაც აგავსებს — სოფოკლედან სელინჯერამდე, დათო ტურაშვილიდან ნილ გეიმანამდე, მოთხრობებიდან პიესებამდე და ლექსებამდე. მოკლედ, წამყვანებმა ყველანაირი გემოვნებისა და ინტერესის მქონე მკითხველისთვის დაასახელეს წიგნები, რომელთაც ერთ დღეში სულ თავისუფლად მოერევი.
პოდკასტის მომდევნო ეპიზოდების თემა ჯერჯერობით უცნობია, თუმცა, საპილოტე გადაცემის მოსმენის შემდეგ მათაც მოუთმენლად დაელოდები. ეს ლოდინი კი დიდხანს არ გასტანს ხოლმე — პოდკასტის ახალი ეპიზოდები ყოველ ხუთშაბათს, საღამოს 6 საათზე განთავსდება Spotify-სა და SoundCloud-ის პლატფორმებზე.