თუ ამ სიახლეს ელოდებოდი, აი, ისიც — ლიდერატორი ბრუნდება! კარიერული განვითარების მასშტაბური პროგრამა, რომელიც სტუდენტებისა და ახალ კურსდამთავრებულებისთვისაა განკუთვნილი, უკვე მეცხრედ იღებს სტარტს. საქართველოს ბანკის პროექტი 2017 წლიდან ხორციელდება და მასში აქამდე უკვე 445 ახალგაზრდა ჩაერთო, რომელთა უდიდესი ნაწილი, 78%, ბანკშივე, ქვეყნის წამყვან ფინანსურ და ტექნოლოგიურ კორპორაციაში, დასაქმდა.
რიგით მე-9 ლიდერატორი სხვადასხვა მიმართულების 12 პროგრამას მოიცავს. პროექტში ჩართვა შეუძლიათ საბაკალავრო საფეხურის მე-3 და მე-4 კურსის სტუდენტებს, ან ახალ კურსდამთავრებულებს. შერჩეულ კანდიდატებს ექნებათ უნიკალური შესაძლებლობა, ცხრა თვის განმავლობაში შეიძინონ თეორიული და პრაქტიკული ცოდნა, აუცილებელი უნარ-ჩვევები, გაიარონ ტრენინგები დარგის საუკეთესო სპეციალისტებთან და იმუშაონ მათთვის საინტერესო პროექტებზე მენტორთან ერთად. ეს ყველაფერი სწავლასთანაც შეთავსებადია.
ლიდერატორის პროგრამებზე მიღება უკვე გამოცხადდა. სასურველი მიმართულებების მოძიება და რეგისტრაციის გავლა ვებგვერდზე შეგიძლია. არჩევის პროცესი რომ გაგიადვილდეს, ჩვენ გაგაცნობთ პროგრამებს — ამჯერად ტექ მიმართულებით.
მონაცემთა ინჟინერია
საქართველოს ბანკი, ფინანსურთან ერთად, ქვეყნის ერთ-ერთი უმსხვილესი ტექნოლოგიური კომპანიაცაა, რომელიც თავის საქმიანობაში აქტიურად ნერგავს უახლეს საერთაშორისო მიღწევებს. ტექ მიმართულების პირველი პროგრამა კი მონაცემთა ინჟინერიაა, რომელიც ამ საქმიანობით — დიდი მოცულობის მონაცემების დამუშავებით, ანალიტიკის ალგორითმების განვითარებითა და მონაცემთა მოდელების შექმნით — დაინტერესებული ახალგაზრდებისთვისაა განკუთვნილი.
ცხრათვიანი სწავლებისა და სამუშაო პრაქტიკის ფარგლებში, შენ გექნება უნიკალური შესაძლებლობა, საუკეთესო სპეციალისტებთან იმუშაო და მათთან ერთად მიიღო ტექნოლოგიური გადაწყვეტილებები, რომლებიც ბანკის მილიონზე მეტ მომხმარებელს ყოველდღიურობას გაუმარტივებს.
უფრო ზუსტად, პროგრამა ითვალისწინებს მონაცემების ინტეგრაციასა და დამუშავებას, მათ სტრუქტურირებას, სტანდარტიზაციას, მონაცემთა ნაკადების ავტომატიზაციას, ალგორითმების დანერგვასა და სხვა ბევრ საინტერესო საქმეს. შეძენილი უნარები კი, დარგის სპეციფიკურ ცოდნასთან და პრაქტიკაში მიღებულ გამოცდილებასთან ერთად, თანამედროვე ბაზარზე კონკურენტულ პროფესიონალად გაქცევს. უფრო მეტს პროგრამის შესახებ ვებგვერდზე შეიტყობ, სადაც სარეგისტრაციო ფორმაც დაგხვდება.
Java დეველოპმენტი
მონაცემთა ინჟინერიაზე მეტად თუ პროგრამირება გაინტერესებს, უმჯობესია, არჩევანი ლიდერატორის ამ პროგრამაზე შეაჩერო. ის მიკროსერვისული არქიტექტურის განვითარებას და პროგრამული სისტემების შექმნას ითვალისწინებს. დანარჩენი პროგრამების მსგავსად, აქაც გამოცდილ და ინოვაციურ გუნდთან თანამშრომლობა მოგიწევს, რაც კარიერულ წინსვლაში ძალიან დაგეხმარება.
ცხრა თვის განმავლობაში შენ Java დეველოპმენტის ძირითად პროცესებში საფუძვლიანად გაერკვევი. ისწავლი პროგრამული სისტემების დიზაინის შექმნას, კოდირებას, ხარვეზების ამოცნობასა და აღმოფხვრას, Java-ის მიკროსერვისული არქიტექტურის განვითარებას, მონაცემთა ბაზებთან მუშაობას, RESTful სერვისებისა და ინტერფეისების შექმნასა და სხვა.
პროგრამული დიზაინისა და კოდირების სწავლასთან ერთად კი, განივითარებ ყველგან გამოსადეგ უნარ-ჩვევებს, მათ შორის, გუნდურ მუშაობას Agile პრინციპებით. პროგრამის შესახებ მეტის გასაგებად და რეგისტრაციის გასავლელად ეწვიე ვებგვერდს.
____________
ტექ მიმართულებასთან ერთად, ლიდერატორი, რა თქმა უნდა, სხვა სახის პროგრამებსაც გთავაზობს — დანარჩენზე უფრო დეტალურად სხვა ბლოგებში მოგიყვებით. შენ კი იჩქარე, გაგზავნე განაცხადი მაქსიმუმ სამ პროგრამაზე და გახდი ლიდერატორი!