ქუთაისის გახსენებისას ბევრი რამ ერთდროულად ცოცხლდება გონებაში. ეს ქალაქი, თავისი მდიდარი ისტორიით, ჩვენს კულტურულ მეხსიერებაში მკაფიოდაა შემონახული და წლებთან ერთად ბევრი მიზეზიც დაუგროვდა საამაყოდ – ფილმები, რომლებიც ქუთაისის ქუჩებში გადაღებულა, წიგნები თუ სიმღერები, რომლებიც აქ, ამ ქალაქის შთაგონებით შეიქმნა. ბევრი გამოჩენილი ადამიანის მშობლიური ქალაქი სწორედ ქუთაისი იყო. მათ შორისაა ბუდუ ზივზივაძეც – ფეხბურთელი, რომლის სახელიც ბოლო წლებში ყველა ქართველისთვის კარგად ნაცნობია.
ნამდვილად არ იქნება გასაკვირი იმის აღნიშვნა, რომ ბუდუსთვის ქუთაისში გატარებული ბავშვობა და პირველი მოგონებები, ისევ და ისევ ფეხბურთს უკავშირდება – საფეხბურთო სკოლასა და მოედნებს, სადაც პირველად აღმოაჩინა და შეუყვარდა თავისი მომავალი პროფესია. ასევე, მამიდაშვილთან ერთად გატარებული დღეებს, რომელთან ერთადაც, როგორც თავად იხსენებს, ნებისმიერი მრგვალი ნივთით, რასაც სახლში თუ გარეთ იპოვიდნენ, ფეხბურთს თამაშობდნენ.
ამჟამად ბუდუ გერმანიაში ცხოვრობს და გერმანიის ბუნდესლიგის მონაწილე საფეხბურთო კლუბ „ჰაიდენჰაიმში” თამაშობს. თუმცა თავისი კარიერა თავდაპირველად სწორედ ქუთაისის სკოლაში დაიწყო 8 წლის ასაკში. ბუდუს ქუთაისი, პირველ რიგში, მაინც ბავშობის მეგობრები და ოჯახია – ახლობელი ადამიანები, რომლებიც ისევ იქ ცხოვრობენ.
,,როგოც კი დასვენება მეწყება, მეორე დღესვე ვცდილობ, რომ თუ ფრენა ემთხვევა, პირველ რიგში ქუთაისში ჩავიდე. გერმანიაში ყოფნის დროს ძალიან მენატრება იქაურობა და მინდა, რომ დასვენების რამდენიმე დღე ოჯახთან, მეგობრებთან და იქაურ ხალხთან ერთად გავატარო – გავიხსენო ძველი მოგონებები, რომლებიც ყოველ ჩასვლაზე თავიდან ცოცხლდება.”
ბუდუს მეხსიერებაში შემონახული ქუთაისი ერთი დიდი ოჯახია, ურთიერთობები და სითბო, რაც იქ მცხოვრებ ადამიანებს ერთმანეთის მიმართ აკავშირებთ. როგორც ბუდუ აღნიშნავს, ქუთაისის ხასიათს, პირველ რიგში, იქ მცხოვრები ხალხი ქმნის – სტუმართმოყვარე ადამიანები, რომლებსაც თავიანთი ქალაქი ძალიან უყვართ და ეს ზრუნვა ყველაფერზე ეტყობათ.
,,თავიდან ქუთაისიდან თბილისში რომ გადმოვედი, ძალიან გაკვირვებული ვიყავი, რომ არცერთ მეზობელს არ ვიცნობდი. ქუთაისში მეზობელს დაუკაკუნებლადაც კი შეუძლია შემოვიდეს სახლში, ოჯახის წევრებად აღვიქვამთ ერთმანეთს.”
ქუთაისი ბევრი საინტერესო ადგილით გამოირჩევა, თუმცა ბუდუსთვის ორი ადგილი მაინც განსაკუთრებულად ძვირფასია – მესხიშვილის თეატრი, რომელიც ქუთაისში მე-19 საუკუნეში აშენდა და ქალაქის ერთ-ერთი უმნიშვნელოვანესი ისტორიული ძეგლია და ასევე, ბაგრატის ტაძარი, საიდანაც ქუთაისის ხედი ყველაზე იდეალურად მოჩანს.
რაც არ უნდა შორს იყოს ქვეყნიდან, ბუდუსთვის ქუთაისი მაინც ყველაზე ძვირფას ადგილად რჩება. ფიქრებში ყოველთვის უბრუნდება იმ მოგონებებსა და განსაკუთრებულ სითბოს, რასაც მხოლოდ მშობლიური ქალაქის მიმართ შეიძლება გრძნობდე.
,,გერმანიაში ავტოგრაფ-ბარათები გვაქვს, რომელსაც ჩემი დაბადების ადგილი – ქუთაისი აწერია. ყველა ჯერზე, როცა ამ ბარათს ვინმეს ვჩუქნი, მიხარია, რადგან ვიცი, რომ იმ ადამიანების უმრავლესობა, ვინც ამ ბარათს ნახავს, მინიმუმ დაინტერესდება მაინც ამ ქალაქით. ვიღაცებს სურვილიც კი გასჩენიათ თავიანთი შვებულება საქართველოში გაეტარებინათ, რაც ყველაზე მეტად მახარებს.”