ერთწლიანი პაუზის შემდეგ სუხიშვილები თაკარაზე ბრუნდებიან: 6 ივლისიდან 6 აგვისტომდე თაკარას ღია სცენაზე სუხიშვილების ანსამბლი ერთგულ მაყურებელს ახალ პროგრამას შესთავაზებს.
თაკარა, სადაც სუხიშვილების ანსამბლი მუდმივად განახლებულ ქორეოგრაფიულ დადგმებს წარმოადგენს, თბილისიდან რამდენიმე კილომეტრის დაშორებით, ნაფეტვრებში, მდებარეობს. ღია სივრცეში რეპეტიციების ჩატარების იდეა სუხიშვილების ანსამბლში პანდემიის პერიოდში გაჩნდა, რის ხორცშესხმასაც მხარი საქართველოს ბანკმა დაუჭირა. ახლა კი თაკარა ექსპერიმენტულ სივრცედ იქცა, რომელიც კონცერტებსაც მასპინძლობს. თუ როგორ იქცა თაკარა სუხიშვილებისთვის მნიშვნელოვან ადგილად, შემდგომში კი სცენად, ამის შესახებ უშუალო გამოცდილებაზე დაყრდნობით ანსამბლის მოცეკვავე თამარ დვალმა ისაუბრა.
„COVID-19-ის პანდემიის გამო იძულებული ვიყავით, საგასტროლო ტურნე შეგვეწყვიტა და სასწრაფოდ საქართველოში დავბრუნებულიყავით. წარმოიდგინეთ, ერთ დღეში როგორ რადიკალურად შეიცვალა ყველაფერი: პანდემიამდე ყოველი დღე ფიზიკური აქტივობით იწყებოდა და საღამო კონცერტით სრულდებოდა. პანდემიის გამო ჯერ 14 დღე თვითიზოლაციაში აღმოვჩნდით, შემდეგი 2 თვე კი — კარანტინში. ჩემთვის ამ პერიოდში ყველაზე რთული სცენის გარეშე ცხოვრება აღმოჩნდა.
ამ მძიმე პერიოდში ილიკო და ნინო სუხიშვილებს გაუჩნდათ უნიკალური იდეა — ახალი, ალტერნატიული, ღია სივრცე თაკარას სცენა შეექმნათ, რაც არა მარტო ანსამბლის თითოეული წევრისთვის, არამედ ქართველი მაყურებლისთვისაც უმნიშვნელოვანესი აღმოჩნდა. აქედან მოყოლებული, ყოველ წელს თაკარას სეზონის გახსნას მოუთმენლად ველით. წელს ჩვენი გენერალური პარტნიორის — საქართველოს ბანკის — დახმარებით განახლდა სცენა და ახალ სცენაზე მაყურებლის წინაშე ახალი შემართებით და ბევრი სიურპრიზით წარვდგებით “, — ამბობს თამარ დვალი.
პანდემია დასრულდა, თუმცა როგორც თამარი აღნიშნავს, სუხიშვილების მოცეკვავეებისთვის თაკარა მეორე სახლად იქცა. სუხიშვილების მოცეკვავეები თაკარას სცენაზე რეპეტიციებს კვლავ აგრძელებენ. ასევე, იმ შესაძლებლობების გათვალისწინებით, რასაც ტრადიციული სცენისგან განსხვავებით ღია სივრცე იძლევა, ანსამბლი მაყურებელს ყოველ სეზონზე განახლებულ ცეკვებსა და პროგრამებს სთავაზობს.
„ყოველ ზაფხულს თბილისის დარბაზიდან თაკარაზე ვინაცვლებთ და ყოველდღიური რეპეტიციებით ახალი სეზონისთვის ვემზადებით. ანსამბლის თითოეულ წევრს ისე გვიყვარს ეს სცენა, რომ თაკარას ჩვენ სახლსაც ვუწოდებთ. ჩემთვის, როგორც მოცეკვავისთვის, ნებისმიერი თეატრის სცენა მაინც შემოსაზღვრული სივრცეა, თაკარას სცენა კი სრულიად სხვა სამყაროა. უსაზღვროება და მთებთან კონტაქტი, მეტი თავისუფლება, მეტი სილაღე და ბუნებასთან შერწყმა — ეს ყველაფერი დიდი ენერგიით მავსებს და სხვა განზომილებაში გადავყავარ “, — დასძინა თამარმა.
განსხვავებული სცენა და თაკარას ღია სივრცე გავლენას ცეკვებზეც ახდენს. მაყურებელმა თაკარას სცენაზე პირველად სუხიშვილების პროგრამა არტეფაქტები იხილა. სუხიშვილების ანსამბლმა ძველი ხალხური ცეკვების ილეთები გააცოცხლა და ელექტრონული მუსიკის ფონზე მაყურებელს სრულიად ახალი იმპროვიზაცია შესთავაზა. გასულ წელს კი თაკარას სცენაზე კლასიკური და თანამედროვე დადგმების პროგრამები განაცალკევეს და ცეკვები მაყურებელს სწორედ ასე წარუდგინეს. ყოველ სეზონზე კი, პირველად თაკარას სცენის მაყურებელი ნახულობს ახალ საცეკვაო ნომრებს, რომლებიც შემდეგ თეატრის სცენაზეც იდგმება.
„თაკარას სცენა ახალი ენერგიის, ახალი შთაგონებისა და მოტივაციის წყაროა. ღია სცენაზე აქამდე არსებული ცეკვები და ტრადიციული მოძრაობები ტრანსფორმირდა, შედეგად კი თაკარა საინტერესო ექსპერიმენტების სივრცედ იქცა. ამ ზაფხულს თაკარას სცენაზე ძალიან საინტერესო საზაფხულო პროგრამა იდგმება, მაყურებელს კი ბევრი სიახლე და სიურპრიზი ელის. ასევე, გვექნება შარშანდელი დადგმა პროექტი ქარაბშა, რომელიც ჩვენს მაყურებელს ძალიან შეუყვარდა “, — ამბობს სუხიშვილების ანსამბლის მოცეკვავე.
თაკარას სცენაზე სუხიშვილების ანსამბლის საზაფხულო პროგრამაში მაყურებელს ახალი კომპოზიციები ელოდება. ამასთან ერთად, სუხიშვილების მოცეკვავეები უკვე ნაცნობი ცეკვების განახლებულ დადგმებსაც შემოგვთავაზებენ. თაკარას ღია სცენაზე ხორუმის, სვანურისა და მთიულურის ახალი ვერსიები ამ ზაფხულს პირველად შესრულდება. ასევე, შარშანდელი სეზონიდან ის კომპოზიციებიც შესრულდება, რომლებიც მაყურებელს განსაკუთრებით მოეწონათ. რაც მთავარია, სუხიშვილების ანსამბლის გულშემატკივარი კვლავ იხილავს ქარაბშას, რომელიც უმეტესად მოცეკვავეების იმპროვიზაციაზეა დამოკიდებული და ქართველი მაყურებლის დიდი სიმპათია დაიმსახურა.
ასე რომ, ქართული ტრადიციული ცეკვების მოყვარულებთან ერთად, თაკარას სცენას სიახლეებითა და ქორეოგრაფიული ექსპერიმენტებით დაინტერესებულებიც უნდა ეწვიონ. განსაკუთრებული შეთავაზებით სარგებლობა შეუძლიათ SOLO-ს მომხმარებლებს: სუხიშვილების ანსამბლის კონცერტზე დასასწრებ ბილეთებს ექსკლუზიურად SOLO Mastercard World Elite ბარათის მფლობელები 20%-იანი ფასდაკლებით შეიძენენ. კონცერტები 6 აგვისტომდე გაგრძელდება, ბილეთების შეძენა კი ამ ბმულზე შეგიძლიათ.