შარლოტა გინსბურგის სადებიუტო დოკუმენტური ფილმი დედის, ჯეინ ბირკინის შესახებ
ნესტან ნენე კვინიკაძე
შარლოტ გინსბურგი, კანის კინოფესტივალის ყოველწლიური სტუმარია, როგორც წესი, ფესტივალს ის მსახიობის სტატუსით ესწრება ხოლმე და გამორჩეული სტილით, წითელ ხალიჩაზე გამოჩენისას, ათასგვარ სამოსში გამოწყობილ სტუმარებს მარტივად ჩრდილავს.
წელს,ფესტივალზე 49 წლის მსახიობის სარეჟისორო დებიუტია, მისი დოკუმენტური ფილმი “შარლოტის ჯეინი” კანის პრემიერის სექციაში უჩვენეს.
გინსბურგი ამბობს, რომ საკუთარ შვილებს აქამდე ბებია-ბაბუის ისტორიით არ ტვირთავდა, ახლა კი დროა, იცოდნენ მათი ამბავიო.
ჯეინ ბირკინი და სერჟ გინსბურგი ყველა დროის საუკეთესო წყვილის ჩამონათვალში ახლაც მნიშვნელოვან პოზიციას იკავებენ. მათ ცნობილ სიმღერას “Je t’aime … moi non plus” დღემდე ვნებით ღიღინებენ. ჯეინი და სერჟი ესაა ზღაპარი, ან შთაბეჭდილება, რომელიც ახლაც აღელვებს მაყურებელს და მსმენელს, შესაბამისად, ფილმს, სადაც შარლოტა დედისგან ინტერვიუს იღებს, მაყურებელი განსაკუთრებული ემოციით შეხვდა.
ესაა 74 წლის დედასთან ახლოს მისვლა, თუმცა ფრთხილი მიახლოება. ჯეინ ბირკინი ღიად და გულწრფელად აქ პირველად საუბრობს გარდაცვლილი შვილის, ახალგაზრდობის, ქმართან ურთიერთობის და დროის შესახებ.
დროსთან ერთად, გეოგრაფიაც იცვლება, იაპონიიდან ნიუ -იორკში ვინაცვლებთ. შემდეგ, საკუთარ სადა, მცენარეებით, ნახატებით და წიგნებით სავსე სახლში დავყვებით ქალს, რომელიც ნახევარი საუკუნის განმავლობაში მილიონობით ადამიანის ყურადღებას იქცევდა; მისი სტილიც, წლების განმავლობაში რიგითი ადამიანების და დიზაინერების შთაგონების წყარო იყო.
დედა-შვილის საუბარი, პერიოდულად, მაგიდის ირგვლივ, ზოგჯერ საძინებელში, ან სტუდიაში მიმდინარეობს. შარლოტა დედას ფოტოებს უღებს. ახლო ხედით, როგორც ერთ დროს მიქელანჯელო ანტონიონის ბრწყინვალე “Blow up” შია. უახლოვდება და თითქოს, ასე ცდილობს კიდევ უფრო ღრმად შევიდეს ქალის ისტორიაში, სიმტკიცეში, იდუმალებაში. შარლოტს სურს მოიმწყვდიოს დრო, რომელმაც ჯეინ ბირკინი შეცვალა.
ანიეს ვარდას ჯეინის შემდეგ დიდი დრო გავიდა. ამიტომ, ეს, ყველა თვალსაზრისით, მართლაც შარლოტის ჯეინია. სხვასთან ასეთი საუბარი არ გამოვიდოდა. სხვას არც სითამამე ეყოფოდა, ახლო ხედით ეჩვენებინა მეტისმეტად შეცვლილი ნაკვთები და სხეული. სხვებმა, შესაძლოა, ვარსკვლავს დაბერებაც არ აპატიონ. შარლოტი კი დედის ძვირფას, აღიარებით, ტკივილით სავსე ცხოვრებას და სხეულს გულში იკრავს.