14 იანვარს, 7 საათზე, თბილისის საკონცერტო დარბაზში დისნეის ლეგენდარული ანიმაციის „ურჩხული და მზეთუნახავის“ ჩვენება მოეწყობა. ოღონდ ეს არ იქნება ერთი რიგითი ჩვენება: საქართველოში პირველად ანიმაციის მელოდიებს თქვენ თვალწინ სცენაზე გაცოცხლებს საქართველოს ეროვნული სიმფონიური ორკესტრი ტიაგო ტიბერიოს დირიჟორობით.
ღონისძიება თბილისის საკონცერტო დარბაზში გაიმართება, სადაც − დიდ ეკრანზე იხილავთ Beauty and the Beast-ის სრულ ვერსიას და პარალელურად მოისმენთ ანიმაციის მელოდიებს საქართველოს ეროვნული სიმფონიური ორკესტრისა და სახელგანთქმული დირიჟორის, ტიაგო ტიბერიოს, შესრულებით.


ტიაგო ტიბერიო მუსიკალური სინქრონიზაციის სპეციალისტია და თავისი კარიერის განმავლობაში არაერთი საკულტო ფილმისა თუ ანიმაციის მუსიკა შეუსრულებია სცენაზე, მათ შორისაა „ბეჭდების მბრძანებელი“, „ვარსკვლავური ომები“ და „კოკო“ დისნეის კონცერტისთვის.
14 იანვარს კი ქართველ პუბლიკასაც ექნება შესაძლებლობა, ტიაგო ტიბერიოს დაუვიწყარ მუსიკასთან ერთად „ურჩხული და მზეთუნახავის“ ზღაპარში იმოგზაუროს და ახალი წლის სადღესასწაულო პერიოდი კიდევ უფრო ჯადოსნურად აქციოს. ფილმთან სინქრონიზებული მუსიკა მაყურებლისთვის წარმოუდგენლად შთამბეჭდავია, ატმოსფერო ქმნის განცდას, რომ თქვენც ანიმაციის პერსონაჟი ხართ და სასახლის დარბაზებიდან უყურებთ ბელისა და ურჩხულის ცეკვას.


„ურჩხული და მზეთუნახავი“ დისნეის 1991 წლის ანიმაციური ფილმია, რომელიც ფრანგული ზღაპრის მიხედვით შექმნეს. ამ ანიმაციურმა ფილმმა დაიმსახურა ოქროს გლობუსი საუკეთესო მიუზიკლის ან კომედიის კატეგორიაში და ოსკარი საუკეთესო ორიგინალური მუსიკისთვის და საუკეთესო ორიგინალური სიმღერისთვის. მიუხედავად ათეულობით წლისა, ანიმაცია დღესაც იმსახურებს პატარების, და არა მხოლოდ მათი, გაუნელებელ სიყვარულს.
ახლა კი თაობებს, რომლისთვისაც ეს ანიმაცია საკულტო სანახაობად იქცა, შესაძლებლობა ეძლევა, სრულიად ახლებური ინტერპრეტაციით აღმოაჩინოს და ხელახლა შეიყვაროს.
ექსკლუზიურად SOLO CLUB-ის წევრებისთვის ბილეთების წინასწარ გაყიდვა უკვე დაიწყო. დანარჩენი SOLO მომხმარებლებისთვის ბილეტების შეძენა 25 დეკემბრიდან იქნება შესაძლებელი.