მეზღვაურთა დღე და მეზღვაურის პროფესია საქართველოში — ინტერვიუ გივი ციცქიშვილთან

25 ივნისს SOLO-ს მხარდაჭერით ბათუმში მეზღვაურთა საერთაშორისო დღე საზეიმოდ აღინიშნა. მეზღვაურთა დღისადმი მიძღვნილი ღონისძიებები ბათუმის სახელმწიფო საზღვაო აკადემიის სტუდენტთა მსვლელობით დილიდან დაიწყო, რასაც ტრადიციულად, სასულე ორკესტრი აფორმებდა. სტუდენტების მსვლელობა ბათუმის საზღვაო ნავსადგურის მე-10 ნავმისადგომთან დასრულდა და საზეიმო ცერემონიაც გაიხსნა. ცერემონიაზე საზღვაო სფეროში შეტანილი განსაკუთრებული წვლილისთვის საზღვაო პროფესიების წარმომადგენლები დააჯილდოვეს, შემდეგ კი გარდაცვლილ მეზღვაურებს პატივი მიაგეს.

აღსანიშნავია, რომ საქართველოში სხვა საზღვაო ქალაქების მსგავსად, მეზღვაურთა საერთაშორისო დღის აღნიშვნა 2011 წლიდან დაიწყო. აქედან მოყოლებული, ბათუმში 25 ივნისს საზეიმო ცერემონია შემეცნებით-კულტურული პროგრამებითა და გასართობი ღონისძიებებით სრულდება. მეზღვაურთა დღის მნიშვნელობისა და ბათუმის საზღვაო აკადემიაში სწავლის პროცესის შესახებ ნავიგაციის ფაკულტეტის ასოცირებულ პროფესორს, დოქტორსა და მეზღვაურ გივი ციცქიშვილს ვესაუბრეთ.

გივი ციცქიშვილის თქმით, მსოფლიო მეზღვაურთა საერთაშორისო დღეს ყოველწლიურად აღნიშნავს, რითაც ეკონომიკასა და საერთაშორისო ვაჭრობაში მეზღვაურების ფასდაუდებელ წვლილს აღიარებენ. ზღვების გავლით ტვირთისა და საქონლის გადაზიდვებში მნიშვნელოვან როლს სწორედ მეზღვაურები ასრულებენ. რაც შეეხება ქართველ მეზღვაურებს, გივი ციცქიშვილის აზრით, ბათუმში გამართული ზეიმი ქვეყნის ეკონომიკურ ზრდასა და განვითარებაში მათი როლის დაფასებას უსვამს ხაზს.

„25 ივნისი იძლევა შესაძლებლობას, რომ მეზღვაურების წინაშე მდგარი გამოწვევების შესახებ, როგორიცაა ოჯახებთან განშორება და არანორმირებული სამუშაო განრიგი, სტრესი და სხვა. ხალხის ცნობიერება ამაღლდეს. გარდა ამისა, 25 ივნისს საქვეყნოდ ვაფასებთ და ვაღიარებთ მეზღვაურების ძალისხმევას, რაც მეზღვაურის პროფესიის დაუფლებაში ახალი თაობის წახალისებას უწყობს ხელს “, — ამბობს გივი ციცქიშვილი.

მეზღვაურობა იმ პროფესიებს შორისაა, რომელთა მიმართაც საზოგადოებას დიდი ინტერესი აქვს. ზოგს მეზღვაურობა ბავშვობიდან სურს და მიზანს აღწევს კიდეც, თუმცა ზოგი შედარებით ზრდასრულ ასაკში იღებს ამ გადაწყვეტილებას.

“პროფესიის არჩევა ჩემს შემთხვევაში, ალბათ, ოჯახის ტრადიციით იყო განპირობებული. მამაჩემის ორი ბიძა მეზღვაური იყო, მამამაც პროფესია შეიცვალა და მეზღვაური გახდა. ბავშვობაში მამას ისეთი საჩუქრები ჩამოჰქონდა, როგორებიც აქ არ იშოვებოდა, რამაც ამ პროფესიის მიმართ ჩემი სიყვარული გააღვივა. ჩვენთან სახლში კი, სულ მეზღვაურები იკრიბებოდნენ და ბუნებრივია, მეც მზად ვიყავი მეზღვაური გამოვსულიყავი“.

დამწყებ მეზღვაურებს, რომლებსაც საქმის პროფესიონალურ დონეზე შესწავლა სურთ და ასევე მომავალ სტუდენტებს, რომლებმაც მეზღვაურობა პროფესიად ახლახან აირჩიეს, ბათუმის სახელმწიფო საზღვაო აკადემია მრავალფეროვან პროგრამებს სთავაზობს. როგორც გივი ციცქიშვილმა აღნიშნა, საზღვაო აკადემიის სტუდენტები თეორიულ უნარებთან ერთად პრაქტიკასაც აქტიურად შეისწავლიან, რაც გემზე ყოფნისა და ზღვაში გასვლის გამოცდილების მიღებასაც გულისხმობს.

“ბათუმის სახელმწიფო საზღვაო აკადემიის სტუდენტები ბაკალავრიატის საფეხურზე 4-წლიან სწავლებას გადიან. ამ 4 წლიდან 6 თვე საზღვაო პრაქტიკას ეთმობა, დანარჩენი კი საზღვაო მეცნიერების შესწავლას, რაც სპეციალურ საწვრთნელ სივრცეებში, ლაბორატორიებსა და რეალურთან მიახლოებულ სასიმულაციო ტრენაჟორებზე აუცილებელი უნარების გამომუშავებას გულისხმობს. საზღვაო პრაქტიკის გასავლელად სტუდენტმა ნაოსნობისათვის აუცილებელი საბაზისო თეორიული ნაწილი უნდა შეისწავლოს და ჯანმრთელობის შემოწმებაც უნდა გაიაროს. გემზე ყოფნის პერიოდში კი, სტუდენტმა სპეციალური წვრთნის აღრიცხვის ჟურნალი უნდა შეავსოს და ამ ჟურნალით გათვალისწინებული დავალებები ზემდგომი ოფიცრის მეთვალყურეობის ქვეშ უნდა შეასრულოს”— აღნიშნა გივი ციცქიშვილმა.

ასე რომ, მეზღვაურობა შრომატევადი, თუმცა თავგადასავლებით სავსე და საინტერესო პროფესიაა. იმათ კი, ვინც მეზღვაურობას სამომავლოდ აპირებს, გამოცდილი მეზღვაური ასეთ რჩევას აძლევს: “დამწყებ მეზღვაურებს ვურჩევდი, რომ ყურადღება მიაქციონ სამ ფაქტორს: გამძლეობას, დისციპლინას და განათლებას. რაც უფრო ძლიერად არის განვითარებული ეს სამი ფაქტორი, უფრო მაღალია პროფესიონალური დონე, ადვილია შედეგის მიღწევა და საზღვაო საქმეში თავის დამკვიდრება“, — აღნიშნა გივი ციცქიშვილმა.

SOLO უკვე წლებია, მეზღვაურთა დღის მხარდამჭერია და მისი ორგანიზებით ეს დღე ყოველთვის საზეიმოდ აღინიშნება. SOLO წელს მეზღვაურის საერთაშორისო დღის ღონისძიების წარმდგენი სპონსორი იყო და ბათუმის საზღვაო აკადემიის გამორჩეული სტუდენტები — მომავალი მეზღვაურები — საქართველოს ბანკის სტიპენდიით დააჯილდოვა. წლევანდელი სტიპენდიის ფარგლებში, SOLO-მ ბათუმის სახელმწიფო საზღვაო აკადემიის 11 სტუდენტს 2023-2024 სასწავლო წლის საფასური სრულიად დაუფინანსა.

გახდით SOLO

არ გაჩერდე, გააგრძელე კითხვა