ნესტან ნენე კვინიკაძე
კანის კინოფესტივლაზე, წელს კიდევ ერთი მსახიობის ფილმის პრემიერაა. ლუი გარელის კომედია “ჯვაროსნული ომი” დებიუსის დარბაზში უჩვენეს.
ლუი გარელი პრემიერას ლეტიცია კასთასთან ერთად დაესწრო. ჩვენებამდე სცენაზე ასულმა გადამღებ ჯგუფს მადლობა უთხრა; ფილმის ქრონომეტრაჟის, 67 წუთის გამო მოგვიბოდიშა და იქვე, მაყურებლის სიმრავლისთვის მოულოდნელი სიხარულიც გაგვიზიარა.
ფილმში, რომლის სცენარიც ჟან-კლოდ კარიერის თანაავტორობით შეიქმნა,ცოლ-ქმრის როლს თავად გარელი და კასთა ასრულებენ. მშობლები მოულოდნელად აღმოაჩენენ, რომ მათი თინეიჯერი შვილი ჯოზეფი (ჯოზეფ ენგელი უფროსებთან შეუთანხმებლად ოჯახიდან ნივთებს და მათ ძვირფას ტანისამოსს ყიდის. მიღებული თანხით კი აფრიკაში განსახორციელებელ ეკოლოგიურ პროექტს ეხმარება. სწორედ აფრიკაში სამოგზაუროდ ემზადება კლიმატის ცვლილების თემით მოცული თინეიჯერი, რომელსაც, თანამოაზრეებთან ერთად, ენჯეოც დაარსებული აქვს და ხელისუფლებასთან კომუნიკაციაც გაუმართავთ.
“ჯვაროსნული ომს” საინტერესო დასაწყისი აქვს, მსახიობები ოსტატურად ირგებენ ცოცხალ, იუმორით გაჯერებულ დიალოგებს. მეორე ნახევარი, კი ერთგვარად, ხელიდან უსხლტება რეჟისორს.
კინოსურათი რამდენიმე პლასტს აერთიანებს. აქტივიზმის, მშობლების შვილთან დამოკიდებულების და მოზარდის სასიყვარულო ისტორიის პარალელურად, ცოლ-ქმრის კრიზისიც იკვეთება. პარიზის რესპექტაბელურ ბინაში გამომწყვდეულები, საპირისპირო რეპლიკებით და განწყობით ესაუბრებიან შვილს. მარიანეს გმირი, ქმარს – აბელს ჯოსეფზე ეჭვიანობაშიც ამხელს, – “ადრე შენც გქონდა იდეები, მაგრამ ისინი დროსთან ერთად გაქრა”.
უფროსების გამქრალ ოცნებებზე და უმოქმედებაზე მოზარდები პირდაპირ და მკაფიოდ მიათითებენ. ფილმში, გრეტა თუნბერგის ცნობილი სიტყვაც გაიელვებს. თუმცა შესანიშნავი დასაწყისის შემდეგ უინტერესოდ განვითარებული სურათი, ამბავს ბანალურ კონტექსტში აქცევს.
ლუი გარელი უყვართ და მოსწონთ. “ჯვაროსნულ ომს” ბევრი ნახავს. ეს კი თემის აქტუალიზაციისთვის მნიშვენლოვანია.
ფილმი ჟან-კლოდ კარიერს ეძღვნება. ის წელს, 90 წლის ასაკში გარდაიცვალა.