კანის 75-ე კინოფესტივალის ჟიურის თავჯდომარემ ვენსან ლენდონმა პრესკონფერენციაზე დღევანდელობას “ტურბულენტული დრო” უწოდა და კულტურის, როგორც სარკის და ისტორიის საუკეთესო მთხრობელის ფუნქციაზე ისაუბრა.
ფესტივალის გახსნის ცერემოლიანზე უკრაინის პრეზიდენტის ვოლოდიმირ ზელენსკის ვიდეო ჩართვაში გამოჩენას და მის ემოციურ სიტყვას საზოგადოება აპლოდისმენტებით, ფეხზე მდგარი, შეხვდა. რამდენიმე წამში კი საერთაშორისო მედია ზელენსკის ციტატებით გადაივსო: მსოფლიოს სჭირდება ახალი ჩაპლინი, რათა კინო არ იყოს მუნჯი, – თქვა პრეზიდენტმა.
თითქოს, არ იძებნება ზუსტი სიტყვა, რომელიც წლევანდელი ფესტივალის განწყობას აღწერს:
ერთ კინოდარბაზში აუდიტორია, კვლავ შესანიშნავ ფორმაში მყოფ, 60 წლის ტომ კრუზს ხვდება, მეორე დარბაზში – უკრაინაში, ქალაქ მარიუპოლში მოკლული, მანტას კვედარავისიუსის, ლიეტუველი კინოდოკუმენტალისტის ბოლო ნამუშევარს უჩვენებენ. გახსნის ფილმად მიშელ ჰაზანავიჩუსის კომედია შეარჩიეს, უკრაინელი სერგეი ლოზნიცა კი, რომლის ფესტივალზე დასწრებას, ასევე, ორაზროვანი შეფასება მოჰყვა, კინოსურათს სახელწოდებით “დესტრუქციის ბუნებრივ ისტორია” წარადგენს.
კანის ფესტივალი ტრადიციულად გამომწვევი და თვალისმომჭრელია, აქ ისევ გაშლილია წითელი ხალიჩა, ფრაკების და საღამოს კაბების დეფილეებია, მაგრამ ფესტივალის დირექციას ახსოვს, რომ პუტინის პატიმარი ოლეგ სენცოვი უკრაინაში იბრძვის, ვალენტინ ვასიანოვიჩიც იმავე ომშია და ვიდეოკამერით ადამინების ტანჯვას იღებს.
წლევანდელი უპრეცენდენტო გადაწყვეტილება, რაც ფესტივალზე რუსული დელეგაციის დასწრების შეზღუდვას გულისხმობდა, გამონაკლისი კინორეჟისორ კირილ სერებრენიკოვისთვის აღმოჩნდა. პუტინის პატიმრად წოდებული, “ზაფხულის”, “პეტროვები გრიპისას” შემდეგ , ის ფესტივალზე “ჩაიკოვსკის ცოლით” დაბრუნდა.
რეჟისორი ცნობილი კომპოზიტორის ცოლის დრამას რეალურ ფაქტებზე დაყრდნობით, ირეალურ სამყაროსთან კომბინაციით ჰყვება.
კანის 75-ე კინოფესტივალზე, ამ დროისთვის, მხოლოდ ორი საკონკურსო ფილმი უჩვენეს. კინოკრიტიკოსები ჟან პიერ და ლუკ დარდენების, რუბენ ოსტლუნდის,დევიდ კრონენბერგის,კრისტიან მუნჯიუს, ალბერტ სერას, სალი აბასი და სხვების ნამუშევრებს ელოდებიან.
ფანები კი ტრადიციულად, წლების განმავლობაში მოპოვებულ ადგილებს იცავენ, იმისთვის, რომ ამჯერად, ტომ კრუზის, ჯულია რობერტსის, ენტონი ჰოპკინსის და სხვა საპატიო სტუმრების ავტოგრაფები მოიპოვონ.