გიორგი გიგაშვილისა და კატო კვარაცხელიას ერთობლივი კონცერტი – ,,ადამიანის ხმა”, რომლის მთავარი მხარდამჭერიც SOLO გახლდათ, 9 ივნისს ეროვნული სიმფონიური კონცერტის შენობაში გაიმართა. კონცერტზე ახალგაზრდა მუსიკოსებმა ქართველი კომპოზიტორების ნაწარმოებები შეასრულეს – რეპერტუარი მოიცავდა როგორც ძველ და შედარებით მივიწყებულ, ისე თანამედროვე და კარგად ნაცნობ სიმღერებს. კონცერტი გიორგის და კატოს პირველი მუსიკალური გადაკვეთა არ ყოფილა, თუმცა ასეთი მასშტაბური სოლო გამოსვლა ერთობლივად პირველად ჰქონდათ.
ქართული მუსიკა ძალიან თვითმყოფადი და უნიკალურია, არასდროს კარგავს აქტუალობას და პირიქით, დროთა განმავლობაში, მეტ სიღრმესა და მნიშვნელობას იძენს. საქართველოს ისტორიას ბევრი გამორჩეული კომპოზიტორი ახსოვს – მათი ნაწარმოებების ყოველი მორიგი ინტერპრეტაცია ახლებურად გვანახებს მუსიკის უსაზღვრო შესაძლებლობებს და კიდევ ერთხელ ამტკიცებს, თუ როგორ შეიძლება ნაცნობი მელოდია სრულიად ახლებურად აჟღერდეს და ახალი ემოციები გააღვიძოს მსმენელში.
როგორც გიორგი და კატო აღნიშნავენ, კონცერტზე მუშაობის პროცესი საკმაოდ თავისუფლად მიმდინარეობდა. რეპერტუარიდან მხოლოდ პირველი, გამხსნელი სიმღერა იცოდნენ – ,,იძინებს მზე”, დანარჩენი კი რეპეტიციების დროს, იმპროვიზებულად დაგეგმეს. ნელ-ნელა, ორგანულად მოდიოდა ეს სიმღერები მათ განწყობაში და ბუნებრივად ჯდებოდა რეპერტუარში. როგორც კატო აღნიშნავს, ამ კონცერტის ერთ-ერთი მთავარი მიზანი ქართველი კომპოზიტორების სათანადო დაფასება იყო.
,,ქართველი კომპოზიტორები, რომელთა ნაწარმოებებიც ამ კონცერტზე შევასრულეთ და რომელთა შესრულებაც, სამწუხაროდ, ვერ მოვახერხეთ, იმსახურებენ ისეთი აკადემიური ფორმის კონცერტს, როგორც მე და გიორგიმ ჩავატარეთ. ვფიქრობ, რომ მათი მუსიკა არაფრით ჩამოუვარდება სხვა კლასიკოსებს.”
კონცერტის სახელი – ,,ადამიანის ხმა” ჟან კოქტოს ამავე სახელწოდების პიესის მიხედვით აარჩიეს, რადგან პიესის მთავარი პერსონაჟისთვის, ისევე როგორც გიორგისა და კატოსთვის, ყველაზე მნიშვნელოვანი მისი ხმაა. სწორედ ამას უსვამს ხაზს კატოც, როდესაც კონცერტის სახელის სიმბოლურ მნიშვნელობაზე ჰყვება.
,,მიმაჩნია, რომ ადამიანისთვის ხმა ერთ-ერთი ყველაზე ძლიერი იარაღია, რომლითაც შეუძლია, საკუთარი სათქმელი გამოთქვას და პოზიცია დააფიქსიროს. ვფიქრობ, რომ ეს სათაური ჩვენს ქვეყანაში მიმდინარე მოვლენებსაც ეხმაურება – დღეს ადამიანის ხმა მნიშვნელოვანია ისე, როგორც არასდროს. საბოლოოდ, ამიტომაც გადავწყვიტეთ ეს სახელი – გვინდოდა, ჩვენი ხმა და აზრი დაგვეფიქსირებინა.”
გიორგი გიგაშვილს ქართველი მსმენელი კარგად იცნობს, მსოფლიოში წარმატებული პიანისტი არაერთი საერთაშორისო პრემიის გამარჯვებულია. კატო კვარაცხელიასთვის ეს კონცერტი პირველი სოლო გამოსვლა იყო. ახალგაზრდა მომღერალი ბავშვობიდან მუსიკასთან ერთად იზრდებოდა, მოგვიანებით თეატრალურ უნივერსიტეტში ჩააბარა, თუმცა მალევე მიხვდა, რომ მუსიკა იყო ის ერთადერთი რამ, რაც მისი ცხოვრების მთავარ არსს წარმოადგენდა.
,,როდესაც იმ საქმეს აკეთებ, რაც გიყვარს, შენდაუნებურად გიჩნდება ერთგული მსმენელი, რომელიც მუდმივად ელოდება შენგან რაღაც სიახლეს. ვფიქრობ, რომ ამ კონცერტით მოვახერხე, ადამიანებისთვის მადლიერება გამომეხატა და ის მოლოდინები, რასაც ჩემ მიმართ ჰქონდათ, გამემართლებინა. ეს ყველაფერი დიდ შრომის შედეგად შევძელი – თუ დარწმუნებული ხარ შენს თავში და გულწრფელი ხარ შენი ემოციებით, ამას შენი მსმენელიც იგრძნობს. გამიხარდა, რომ მათ ზუსტად ისე გაიგეს ყველაფერი, როგორც მე და გიორგის გვქონდა ჩაფიქრებული. “
როგორც გიორგი და კატო აღნიშნავენ, ხმა მართლაც ყველაზე მძლავრი იარაღია ადამიანისთვის – უნარი, საკუთარი სათქმელი, იქნება ეს სიხარული თუ ტკივილი, სხვა ადამიანებსაც გაუზიარო. სწორედ ამ ემოციების გაზიარება და ქართველი კლასიკოსი კომპოზიტორების მუსიკის გაცოცხლება იყო კონცერტის მთავარი მიზანი, რომელიც საბოლოოდ წარმატებით შედგა და რომელიც, როგორც მსმენელს, ისე შემსრულებლებს, დიდხანს ემახსოვრებათ.