ქართული მოდის წარმატებაზე საუბრისას, პირველ რიგში, რამდენიმე გამორჩეული ბრენდი და დიზაინერი გვახსენდება, რომლებმაც უკვე მოიპოვეს საერთაშორისო აღიარება. მათ შორის გამოირჩევა ირაკლი რუსაძის მიერ დაარსებული SITUATIONIST, რომელიც ყოველწლიურად სულ უფრო მეტ პოპულარობას იძენს. ამ წარმატებას, პირველ რიგში, მნიშვნელოვანი საერთაშორისო ჩვენებები განაპირობებს, სადაც ბრენდი თავის უნიკალური ხელწერით – ქართული თვითმყოფადობისა და თანამედროვე მოდის ტენდენციების ჰარმონიული თანხვედრით, იმკვიდრებს ადგილს.
ქართულმა მოდის ბრენდმა SITUATIONIST კიდევ ერთხელ დაამტკიცა, რომ მისი ადგილი გლობალურ მოდის ინდუსტრიაში მტკიცედ არის განსაზღვრული. ამჯერად, ბრენდი პარიზის მოდის კვირეულზე წარდგება, სადაც ახალი კოლექციის პრეზენტაციას გამართავს და მსოფლიო მოდის კრიტიკოსების, ინფლუენსერებისა და პროფესიონალების ყურადღებას მიიპყრობს. აღსანიშნავია ისიც, რომ SITUATIONIST ერთადერთი ქართული ბრენდია, რომელიც პარიზის მოდის კვირეულის ოფიციალურ განრიგში იკავებს ადგილს. ამ გრძელ, საპასუხისმგებლო და მნიშნელოვან გზაზე SITUATIONIST-ის მთავარი მხარდამჭერები SOLO და Visa არიან.
მზადება პარიზის მოდის კვირეულისთვის
SITUATIONIST მეხუთე წელია, რაც პარიზის მოდის კვირეულის წევრია. ბრენდი წლევანდელ კვირეულზე 2025-2026 წლის შემოდგომა-ზამთრის კოლექციას წარადგენს. როგორც კრეატიული დირექტორი, ირაკლი რუსაძე აღნიშნავს, დროთა განმავლობაში კონკურენცია სულ უფრო იზრდება, ჩნდება მეტი ახალი თემა და შესაძლებლობა, შესაბამისად, რთულდება მუშაობაც – კრეატიულ გუნდს მეტი ძალისხმევის გამოჩენა უწევს, რომ საინტერესო შედეგამდე მივიდეს, ბრენდმა შეინარჩუნოს წარმატება და სამომავლოდ მეტ აღიარებასაც მიაღწიოს.
,,რაც უფრო ახლოვდება კვირეული, მით მეტი იდეა ჩნდება და აზარტიც იმატებს. მოკლე დროის მიუხედავად, გიჩნდება სურვილი, რომ ბევრი ახალი რამ სცადო. მთელი გუნდი დღე და ღამე მუშაობს, რომ საინტერესო შედეგი მივიოთ, ახლებული სილუეტი შევქმნათ. გარდა კოლექციაზე მუშაობისა, ბევრი საკითხია, რომელიც ასევე დიდ ყურადღებას მოითხოვს – იქნება ეს ქასთინგი, გადაღება თუ მაკიაჟის და თმის ტესტი, შემდეგ უკვე გაყიდვებიც.”
ახალი კოლექცია
SITUATIONIST-სთვის ქართული იდენტობა ყოველთვის ამოსავალი წერტილია, თუმცა ყოველი მომდევნო კოლექცია და ნამუშევარი ახლებური, თანამედროვე და აქამდე აღმოუჩენელი იდეებითა და ხედვითაა შექმნილი. კოლექციის ყველა დეტალი თუ დიზაინერული გადაწყვეტილება გულდასმით არის გააზრებული და მრავალი ადამიანის ერთობლივი შრომისა და შემოქმედებითი იდეების ნაყოფს წარმოადგენს.
ბრენდისთვის განსაკუთრებით მნიშვნელოვანია ისეთი სამოსის შექმნა, რომელიც დროს გაუძლებს და ნაკლები ზიანის მომტანი იქნება გარემოსთვის. სწორედ ამ პრინციპებს უსვამს ხაზს ირაკლიც, როდესაც თანამედროვე სამყაროში მდგრადი მოდის მნიშვნელობასა და აუცილებლობაზე საუბრობს.
,,ძირითადი მასალები, რაც ახალი კოლექციის შექმნისთვის გამოვიყენეთ ხელოვნური ბეწვი, ტყავი, შალია. მაქსიმალურად შევარჩიეთ ისეთი მასალები, რომლებიც მდგრად მოდასთან ასოცირდება, რადგან დღესდღეისობით მდგრადობა მოდის სფეროსთვის ძალიან გარდამტეხი საკითხია. SITUATIONIST-იც სწორედ ამას ცდილობს – მაქიმალურად დანერგოს მდგრადი პრაქტიკები და ხელი შეუწყოს მის პოპულარიზაციას. “
ბრენდის ხედვა და სათქმელი
რთული წარმოსადგენია ისეთი ხელოვნება, რომელიც სრულიად მოწყვეტილია იმ გარემოსა და კონტექსტს, სადაც ის იქმნება. ირაკლი რუსაძესთვის განსაკუთრებით მნიშვნელოვანია თანამედროვე საზოგადოებრივ პროცესებზე დაკვირვება და მათზე რეაგირება, რადგან დისტანცირება და გულგრილობა იმისგან, რაც ირგვლივ ხდება, უარყოფითად აისახება შემოქმედებაზეც.
,,ახლა, როცა მთელს მსოფლიოში და მათ შორის ჩვენს ქვეყანაშიც რთული ვითარებაა, განსაკუთრებით მნიშვნელოვანია, რომ ხელოვანებმა, როგორც დიზაინერმა, ისე სხვა ნებისმიერი სფეროს წარმომადგენლებმა, თავისი შემოქმედებით იმედი მისცენ ხალხს. ისეთ სიტუაციაში, რომლის წინაშეც ახლა ვდგავართ, ხელოვანის ერთ-ერთი მთავარი როლი სწორედ იმედის გაჩენაა ადამიანებისთვის.”
მოდის ინდუსტრიაში საერთაშორისო აღიარება ადვილი არ არის, მაგრამ SITUATIONIST ამ პროცესს ღირსეულად უძღვება. პარიზის მოდის კვირეული იქნება კიდევ ერთი დადასტურება იმისა, რომ თბილისიდან წამოსული ბრენდი მსოფლიო ასპარეზზე თავის ადგილს იმკვიდრებს.