რთულად მოიძებნება ისეთი ქართული ბრენდი, რომლის ჩვენებებიც პარიზის მოდის კვირეულზე ჩვეულ მოვლენად იქცა. SITUATIONIST უკვე მეხუთე წელია, რაც მსოფლიოს ერთ-ერთი ყველაზე მნიშვნელოვანი ღონისძიების კალენდარშია, სადაც შემოდგომა/ზამთრის ახალი კოლექცია წარადგინა.
საქართველოს ბანკი, რომელიც მუდმივად უჭერს მხარს ქართველ ხელოვანებს, ამჯერადაც SITUATIONIST-ის მთავარი სპონსორი გახლდათ – SOLO და VISA წლების განმავლობაში არიან ბრენდის ერთგული პარტნიორები.
შთაბეჭდილებები მოდის კვირეულიდან
პარიზის მოდის კვირეული ერთ-ერთი ყველაზე მნიშვნელოვანი პლატფორმაა, სადაც ბრენდები არამარტო თავიანთ კოლექციებს წარადგენენ, არამედ ახალ ბიზნეს-პარტნიორებს, მყიდველებსა და მედიას უკავშირდებიან. ირაკლი რუსაძე SITUATIONIST-ის დამფუძნებელი და დიზაინერი, პარიზში გატარებულ დღეებს საინტერესო გამოცდილებად და გამოწვევად იხსენებს.
,,ჩვენება ძალიან ემოციური და დინამიური იყო. მიუხედავად იმისა, რომ სამყაროში უამრავი გაურკვევლობა და არასტაბილურობაა, ჩვენ შევძელით ეს ენერგია კრეატიულად და კონცეპტუალურად გადმოგვეცა კოლექციაში. ატმოსფერო იყო ინტენსიური, ძლიერი, და ვფიქრობ, ჩვენმა სტუმრებმა ნამდვილად იგრძნეს ის მესიჯი, რომლის გადმოცემასაც ვცდილობდით.
ხშირად მოდის სფერო მხოლოდ ესთეტიურ, ფასადურ ხელოვნებად აღიქმება, სადაც კოლექციის შექმნისას მხოლოდ ვიზუალურ მხარეს აქვს მნიშვნელობა. ბევრმა თანამედროვე დიზაინერმა დაამტკიცა, რომ მოდა შესაძლოა ისეთივე მრავლისმთქმელი იყოს, როგორც ხელოვნების სხვა დარგები.
,,SITUATIONIST-ის ახალი კოლექცია პასუხობს სამყაროს, რომელიც სავსეა გაურკვევლობებითა და პოლიტიკური არასტაბილურობით. ჩვენი მიზანი იყო, ეს სირთულეები გარდაგვექმნა ხელოვნებაში და ამ გზით გვეპოვა გამძლეობისა და თავდაჯერებულობის ფორმა. ჩვენთვის მნიშვნელოვანი იყო, რომ კოლექცია არა მხოლოდ ესთეტიკური, არამედ ღრმა შინაარსის მატარებელიც ყოფილიყო. შთაბეჭდილებები დადებითი იყო, და განსაკუთრებულად სასიამოვნოა, როცა ჩვენი ჩანაფიქრი ემთხვევა აუდიტორიის აღქმას.”
ბრენდის სახასიათო სტილი
SITUATIONIST არა მხოლოდ ესთეტიკით გამოირჩევა, არამედ ძლიერი კონცეფციითაც – ის აერთიანებს თბილისურ ურბანულობას, ქართული კულტურის ელემენტებს და გლობალურ ხედვას. სწორედ ამ იდეალური თანხვედრის წყალობით შეიქმნა ის ნიშა, რომელიც სამომავლოდ კიდევ ბევრ ახალ აღმოჩენას გააკეთებს და საინტერესო ნამუშევრებს შექმნის.
განსაკუთრებით საინტერესოა SITUATIONIST-ის შემოდგომა-ზამთრის ახალი კოლექცია, სადაც მთავარი აქცენტი ბუნებრივ, მდგრად მასალებზეა გაკეთებული.
,,ახალი 2025 წლის კოლექცია აერთიანებს სტრუქტურულ ტყავს, რბილ მატერიებს, რთულ ორნამენტებსა და კონტრასტულ ფერებს. პარიზის მოდის კვირეულზე განსაკუთრებული მოწონება დაიმსახურა ხელოვნური ბეწვის პალტოებმა და იმ ნამუშევრებმა, რომლებიც მკაცრ სილუეტებს რბილი დეტალებით აბალანსებდნენ.”
ხუთი წელი PFW-ზე
SITUATIONIST-ის კოლექციები ყოველთვის გამოირჩევა თავისი მძლავრი ნარატივით. ბრენდი თავის სამოსში ხშირად ასახავს თანამედროვე რეალობას, ხელოვნებასა და არქიტექტურას, რითაც ახალ ტრენდებს ქმნის.
წლების განმავლობაში SITUATIONIST გაიზარდა, როგორც შინაარსობრივად, ასევე ტექნიკურად. ბრენდის ხედვა მეტად მკაფიო გახდა, ხოლო მოდის ინდუსტრიაში ქართული ხელწერა კიდევ უფრო წარმოჩინდა. საკო ინწკირველი, SITUATIONIST-ის PFW პროექტის ხელმძღვანელი ბრენდის მუდმივი განვითარებისა და პროგრესის აუცილებლობას უსვამს ხაზს.
,,პარიზი ყოველთვის გვაძლევს შესაძლებლობას, საკუთარი თავი სხვანაირად დავინახოთ. პირველ ჩვენებაში უფრო მეტი დაუცველობა იყო, ახლა კი SITUATIONIST გაცილებით თავდაჯერებულია. მოდის ინდუსტრია სწრაფად იცვლება, მაგრამ ჩვენთვის მთავარია, რომ საკუთარი სტილი და იდენტობა მუდმივად შევინარჩუნოთ და განვავითაროთ.”
პარტნიორები და მხარდაჭერა
ირაკლისთვის, ისევე როგორც SITUATIONIST-ის მთელი გუნდისთვის, განსაკუთრებით მნიშვნელოვანია იმ პარტნიორებისა და სპონსორებს მხარდაჭერა, რომლებიც მთელი პროცესის განმავლობაში მათ გვერდით არიან და ბრენდის წარმატებაში მნიშვნელოვან როლს თამაშობენ.
,,ამ სეზონზე განსაკუთრებული იყო მეგობრების მხარდაჭერა, რომლებმაც მთელი თავიანთი რესურსები და კონტაქტები გამოიყენეს, რათა ეს შოუ წარმატებით ჩატარებულიყო. ეს თანადგომა ჩვენთვის უზარმაზარი ძალა იყო და გვაძლევს საშუალებას, უფრო თამამად და თავისუფლად ვიმუშაოთ. ასეთი თანამშრომლობა მხოლოდ ფინანსური არ არის – ეს არის ერთობლივი ხედვის გაზიარება და ქართული მოდის განვითარებაში მნიშვნელოვანი ნაბიჯის გადადგმა.”