ნეტავ, ეს წიგნი ჩვენს მშობლებს წაკითხული ჰქონოდათ

ისეთ ფუნდამენტურ და აქტუალურ თემაზე, როგორიცაა ბავშვის აღზრდა, მსოფლიოში ყოველწლიურად ასობით წიგნი იბეჭდება. ამ ზღვა ნაკადში მალევე გამოირჩევიან ხოლმე ისეთი ავტორები, რომლებიც თავიანთი განსხვავებული ხედვით, გულწრფელობითა და საინტერესო მიგნებებით მალევე აყვარებენ თავს მკითხველს. სწორედ ერთ-ერთი მათგანია ბრიტანელი ფსიქოთერაპევტის – ფილიპა პერის მსოფლიო ბესტსელერი − „ნეტავ ეს წიგნი ჩვენს მშობლებს წაკითხული ჰქონოდათ“, რომელიც უკვე 45 ენაზეა თარგმნილი.

წიგნის მთავარი თემა მშობლებისა და შვილების ურთიერთობების სპეციფიკაა – როგორ ვამყარებთ კომუნიკაციას ჩვენს შვილებთან, რა არის გადამწყვეტი და როგორ უნდა ვიპოვოთ სწორი ორიენტირები თუ პრიორიტეტები. წიგნში ვერ შეხვდებით შაბლონურ, გაცვეთილ რჩევებსა თუ მზა რეცეპტებს. მასში მოყვანილი თითოეული მაგალითი და დაკვირვება ავტორის რეალური, პირადი გამოცდილებებია, რომლებიც სხვა თვალით დაგანახებთ თქვენი და თქვენი შვილის შინაგან სამყაროს და მათი გადაკვეთის ჯანსაღ გზებს გაპოვნინებთ.

მემკვიდრეობითი აღზრდა

ერთ-ერთი ყველაზე მნიშვნელოვანი საკითხი, რასაც ფილიპა პერი თავის წიგნში განსაკუთრებით დიდ ყურადღებას უთმობს, არის ის, თუ რამდენად აუცილებელია მშობელმა, პირველ რიგში, საკუთარი ბავშვობა გადაიაზროს და საჭიროების შემთხვევაში, გაწყვიტოს წინა თაობების არაჯანსაღი აღმზრდელობითი ჯაჭვი. ხშირად მშობლები საკუთარი ბავშვობის გამოცილებებსა და აღზრდის პატერნს საკუთარ შვილებთან ურთიერთობის დროს ამჟღავნებენ, რასაც პერი მემკვიდრეობით აღზრდას უწოდებს. მნიშვნელოვანია, რომ ასეთ დროს მშობელმა დააფიქსიროს მსგავსი მომენტები და გააანალიზოს, მართლა რეალურია ეს განცდები თუ საჭიროებს გადააზრებასა და ცვლილებებს.

სწავლა ბავშვებისგან

ფილიპა პერი, რომელიც თავადაც არის დედა, წიგნში წერს – ,,იმის მაგივრად, ყოველთვის მე მივაჩეჩო შვილს გასართობად რაღაცები, პირიქით, ვცდილობ მასთან ერთად დავაკვირდე სამყაროს – იმას, რაც მას აინტერესებს და მოსწონს. მისგან ვსწავლობ, როგორც გავჩერდე და შევისწავლო გარემო, რადგან ჩემში ეს უნარი თითქოს მივიწყებულია.” მნიშვნელოვანია, რომ მუდმივად მოვუსმინოთ შვილებს, გავიაზროთ, თუ რატომ აქვთ კონკრეტული მიდრეკილებები და შეძლებისდაგვარად ავუწყოთ ფეხი მათ ინტერესებს. ასეთ დროს ბავშვებსაც აქვთ იმის განცდა, რომ თანასწორად თვლიან და მეტად უჩნდებათ ნდობა მშობლის მიმართ.

კომუნიკაცია და გულახდილობა

პერის ერთ-ერთი მთავარი რჩევა მშობლებისთვის არის ის, რომ მუდმივად ჰქონდეთ აქტიური კომუნიკაცია შვილებთან. მნიშვნელოვანია, რომ ბავშვები კომფორტულად და უსაფრთხოდ გრძნობდნენ თავს. იცოდნენ, რომ მათი ნებისმიერი აზრი თუ ემოცია მნიშვნელოვანი და პატივსაცემია. ყველაზე მეტად ბავშვები სწორედ მშობლების მაგალითიდან სწავლობენ, შესაბამისად, პირველ რიგში, მშობლებმა უნდა შეძლონ საკუთარი ემოციების მართვა და კლასიფიკაცია. როგორც პერი აღნიშნავს – ,,კარგი მშობლობა არ ნიშნავს, დამალო შენი ემოციები, როცა გაბრაზებული ხარ. უმჯობესია, შენი ემოციები რაციონალურ ახსნა და ისე გამოხატო, რომ მეორე ადამიანი არ დაადანაშაულო.”

შეცდომების აღიარება

კიდევ ერთი მნიშვნელოვანი და შეიძლება ითქვას, გადამწყვეტი უნარი, რისი გამომუშავებაც ყველა მშობელმა უნდა შეძლოს, შეცდომების აღიარებაა. არ არსებობს იდეალური მშობელი, ამას პერიც პირდაპირ აღნიშნავს თავის წიგნში. უნდა შეეგუო იმ ფაქტს, რომ რაღაცები აუცილებლად შეგეშლება, თუმცა ასეთ დროს, გადამწყვეტი სწორედ ის არის, თუ რამდენად შეგიძლია შეცდომების აღიარება. ამით ბავშვსაც აჩვენებ, რომ მასაც აქვს შეცდომების დაშვების უფლება – აძლევ მაგალითს, რომ ეს შეცდომები არ არის დიდი ტრაგედია და აუცილებლად გამოსწორებადია.

პირველი ქართულენოვანი გამოცემა

ფილიპა პერის წიგნი – ,,ნეტავ ეს წიგნი ჩვენს მშობლებს წაკითხული ჰქონოდა” SOLO Books-ისა და Visa-ს მხარდაჭერით და „ცნობისმოყვარე პანდასთან“ თანამშრომლობით ქართულ ენაზე პირველად ითარგმნა. წიგნის პრეზენტაცია და პანელური დისკუსია სულ ცოტა ხნის წინ გაიმართა, რომლის სპიკერიც წიგნის გამომცემელი – ნინო ჩიქოვანი გახლდათ. წიგნი ქართულ ენაზე ნუცა ალადაშვილმა თარგმნა და მისი შეძენა უკვე შეგიძლიათ SOLO ბუტკში.