საახალწლო განწყობის შესაქმნელად უამრავი გზა არსებობს: ნაძვის ხის მორთვა, Secret Santa-ს თამაში, საჩუქრების ყიდვა და, რა თქმა უნდა, საახალწლო ფლეილისთის შექმნა, რომლის ფონზეც ყველაფრის მოსწრებაა შესაძლებელი.
თუ საახალწლო ფლეილისთის შექმნა ან განახლება გინდა, რამდენიმე სიმღერას ჩვენც გირჩევთ:
Somewhere In My Memory – John Williams
Somewhere In My Memory ყველასათვის საყვარელი “მარტო სახლშის” საუნდტრეკია, რომელიც სადღესასწაულო განწყობას წამში შეგიქმნის. ეს კომპოზიცია საახალწლო სამზადისისთვის იდეალური არჩევანია და ყველაზე რუტინულ საქმეებსაც კი ჯადოსნურ ელფერს შესძენს.
This December – Ricky Montgomery
This December სიყვარულზე, დანაკარგზე, დეკემბერსა და სადღესასწაულო სეზონზე ისეთი გულშიჩამწვდომი ტექსტითა და დასამახსოვრებელი მელოდიით გვიყვება, რომ შეუძლებელია, ეს სიმღერა არ აგეკვიატოს – თანაც მხოლოდ დეკემბერში კი არა, მთელი წლის განმავლობაში.
Santa Tell Me – Ariana Grande
საახალწლო ზანზალაკების ჟღარუნით სავსე სიმღერაში არიანა გრანდე სანტას სთხოვს, ნამდვილ სიყვარულს შეახვედროს. თუ ახალ წელს შენც ახალ ურთიერთობებს ეძებ, ეს სიმღერა შენი გრძნობების გადმოცემას მშვენივრად მოახერხებს.
I’ve Got My Love To Keep Me Warm — Ella Fitzgerald, Louis Armstrong
თუ შობა-ახალ წელს პარტნიორთან ერთად ხვდები და თავს ბედნიერად გრძნობ, ალბათ, დეკემბრის სიცივე და ყინვა ვერაფერს დაგაკლებს. შენთვის ზამთრის ყველაზე ნაცრისფერი დღეებიც კი ფერადია, რადგან შენს გულსა და სამყაროს სიყვარული ათბობს. თუ ამ გრძნობის აღსაწერად სიტყვები არ გყოფნის, I’ve Got My Love To Keep Me Warm დაგეხმარება.
You Make It Feel Like Christmas – Gwen Stefani (feat Blake Shelton)
თუ შენს ცხოვრებაში გამოჩნდა ადამიანი, ვინც თავს ისე გაგრძნობინებს, თითქოს ყოველი დღე შობა-ახალი წელია და ყოველ მომენტს უნდა აღნიშნავდე, You Make It Feel Like Christmas საშენო სიმღერაა. თუ ამ ადამიანისთვის შენი გრძნობები ჯერ კიდევ არ გაგიმხელია, რაღას უცდი?
One I’ve Been Missing – Little Mix
თუ სადღესასწაულო და რომანტიკულ განწყობაზე ხარ, One I’ve Been Missing ერთდროულად აგამღერებს და აგაცეკვებს კიდეც. ეგ კი არა, ამ სიმღერის მომსმენისას შეიძლება თავი რომელიმე საახალწლო ფილმის მთავარ პერსონაჟადაც იგრძნო.
შიშველი ხეები – წერილი
ირგვლივ საახალწლო ორომტრიალისა და სადღესასწაულო განწყობის ფონზე ხშირად გვავიწყდება, რომ უფლება გვაქვს, მოწყენილები ვიყოთ და ამის გამო თავი ცუდად არ ვიგრძნოთ. ზამთრის სუსხიან დღეებში ჩვენს გულებში ჩაბუდებულ დარდზე ყველაზე შთამბეჭდავად წერილი გვიმღერის.
Santa’s Coming For Us – Sia
საახალწლო ფლეილისტის შედგენისას შეუძლებელია, Sia-ს ცნობილი სიმღერა Snowman არ გაგახსენდეს, თუმცა შემსრულებელს შობა-ახალი წლისთვის მთელი ალბომი აქვს მიძღვნილი. Santa’s Coming For Us ალბომის Everyday Is Christmas პირველი სიმღერა და საუცხოო განწყობის შესაქმნელად შესანიშნავი არჩევანია.
Thank God It’s Christmas – Queen
ზოგიერთ ადამიანს შობა-ახალი წელი იმდენად უყვარს, რომ ამ დღესასწაულს მთელი წელი სულმოუთქმელად ელოდება. თუ შენც მათ შორის ხარ, შეგიძლია შენი ბედნიერება Queen-ის ამ უკვდავი სიმღერით გამოხატო.
Tubthumping – საუკეთესო წინ არის
და ბოლოს, ყველასთვის კარგად ცნობილი სიმღერის სრულიად ახლებული ვერსია, რომელიც საქართველოს ბანკის წლევანდელი საახალწლო ვიდეორგოლიდან უკვე აიკვიატა უამრავმა ადამიანმა.