მარი გაგუა ილიას სახელმწიფო უნივერსიტეტის სტუდენტია, რომელმაც სატელევიზიო გადაცემა „წიგნების თაროს“ მეხუთე და მეათე სტუდენტურ სეზონებში მიიღო მონაწილეობა.
ოდესმე თუ გაბრაზებულხარ ავტორზე სიუჟეტის განვითარების გამო?
დიახ, უფრო მეტად მოზარდობის პერიოდში. როცა პირველი წიგნის წაკითხვიდან საკმაოდ დიდი ხნის შემდეგ კითხვა ისევ დავიწყე, მაინ რიდის „უთავო მხედარი“ იყო წიგნი,რომლითაც დავინტერესდი. მიუხედავად იმისა,რომ კითხვის პროცესი ძალიან მომწონდა, მახსოვს ის გულისწყვეტა და ბრაზი, რაც მთავარი გმირის გარდაცვალებამ გამოიწვია.
სანიშნი თუ ფურცლის ჩაკეცვა?
სკოლის პერიოდში, სასკოლო წიგნების ფურცლებს ხშირად ვკეცავდი, მაგრამ მხატვრული ლიტერატურის კითხვისას სანიშნებს ვანიჭებ უპირატესობას. ვფიქრობ, რომ ფურცლების ჩაკეცვა წიგნებს ძალიან აზიანებს.
საყვარელი თანამედროვე ქართველი ავტორი?
სტუდენტობის პერიოდიდან, როცა წიგნების კითხვა დავიწყე, ნაირა გელაშვილი იყო პირველი თანამედროვე ქართველი ავტორი, რომელიც გავიცანი. მარტივი ენისა და საინტერესო სიუჟეტების გამო ის არაერთი მკითხველის საყვარელი ავტორია, მათ შორის ჩემთვისაც. იმის მიუხედავად, რომ მოთხრობები არ მიყვარს, ნაირას არაერთი მოთხრობის სიუჟეტი დღემდე მაქვს ჩაბეჭდილი გონებაში.
მოთხრობების კრებული თუ რომანი?
როგორც უკვე აღვნიშნე რომანი, მაგრამ ეს არ ნიშნავს იმას, რომ მოთხრობებს არ ვკითხულობ. მოთხრობები თავადაც დამიწერია, მაგრამ მკითხველის პოზიციიდან რომანი უფრო საინტერესოდ მეჩვენება. რადგან ვრცლად მოყოლილი ამბავი უფრო მეტად „ითრევს“ მკითხველს და იძლევა საშუალებას, რომ უფრო დიდი დრო გაატარო ავტორსა და პერსონაჟებთან ერთად, რაც ჩემთვის ბევრად უფრო საინტერესოა.
რომელი ქვეყნის ლიტერატურა გიყვარს ყველაზე მეტად და რატომ?
ჩემი საყვარელი მწერლები სხვადასხვა ქვეყნიდან არიან, თუმცა ქრონოლოგიურად გამოვარჩევდი შუა საუკუნეების ევროპულ მწერლობას, კერძოდ კი იტალიურსა და ინგლისურ ლიტერატურას. რადგან, მგონია, რომ სწორედ ამ პერიოდის ავტორებმა (დანტე; პეტრარკა…) თავიანთი შემოქმედებით მნიშვნელოვნად განავითარეს მსოფლიო დრამატურგია და პოეზია.
თაროებზე წიგნებს რა პრინციპით ალაგებ ხოლმე?
პერფექციონისტი არ ვარ, თუმცა ლამაზი წიგნის თაროები მომწონს. თუ ერთი და იმავე გამომცემლობის, სერიის ან ავტორის რამდენიმე წიგნი მაქვს, ისინი ყოველთვის ერთმანეთის გვერდით იკავებენ ადგილს. სხვა გამორჩეულ კანონზომიერებას ჩემს თაროზე ვერ იპოვით, მთავარია სასურველი წიგნს მოძებნა ადვილი იყოს.
შენი აზრით, რომელ ქართულ წიგნს შეუძლია, რომ მთელი მსოფლიო დააინტერესოს ქართული ლიტერატურით?
მსგავს კითხვებზე „ვეფხისტყაოსანი“ პასუხად ალბათ არაერთხელ მოგისმენიათ. მეც იგივე პასუხი მაქვს, რადგან მგონია, რომ ამ ნაწარმოებში გამოკვეთილადაა პირველ რიგში ავტორის ინდივიდუალიზმი და ყველა ის დეტალი, რაც საქართველოს უძლიერესი პერიოდის კულტურასა თუ ქვეყნის პოლიტიკურ გავლენებზე მიანიშნებს.
სასკოლო პროგრამაში რომელ წიგნს შეიტანდი აუცილებელ საკითხავად, რომელიც ახლა არ ისწავლება?
ვფიქრობ, რომ სკოლებში თარგმნილი ლიტერატურა უფრო აქტიურად უნდა ისწავლებოდეს. დრამატურგია კი არის ჟანრი, რომელიც სასკოლო პროგრამებში თითქმის არ არის, ამიტომ მგონია, რომ სკოლებში უნდა ისწავლებოდეს შექსპირის მინიმუმ ერთი პიესა. რომანებს შორის კი ალბათ კნუტ ჰამსუნის რომანები დიდ გავლენას მოახდენდა მოსწავლეთა გონებრივ განვითარებაზე.
რომელმა წიგნმა იქონია შენი მსოფლმხედველობის განვითარებაზე ყველაზე დიდი გავლენა?
„ჯეინ ეარი“ იყო წიგნი, რომელიც რამდენიმე წლის წინ მეგობრის რჩევით წავიკითხე და მას შემდეგ ჩემს უსაყვარლეს ნაწარმოებად რჩება. ჩემს შეხედულებებზეც იმოქმედა იმ კუთხით, რომ ხშირად ვხედავდი საერთოს ჩემსა და ჯეინს შორის და ხშირად მინდოდა კიდეც, მეც მასავით ძლიერი ვყოფილიყავი.
შენი აზრით, რომელი ეკრანიზაციაა ისეთი კარგი, რომ ლიტერატურულ პირველ წყაროს არაფრით არ ჩამოუვარდება?
ალბათ უცნაურია,მაგრამ ეკრანიზაციებს ხშირად არ ვუყურებ, რადგან კითხვას ვანიჭებ უპირატესობას. თუმცა განსაკუთრებულად მიყვარს ქართული ნაწარმოებების ეკრანიზაციები. განსაკუთრებულად რაც შემიძლია გამოვარჩიო, ეს არის რეზო ჭეიშვილის მოთხრობის მიხედვით გადაღებული ფილმი „ცისფერი მთები“. ეს ფილმი საეტაპოდ მიმაჩნია ქართული ეკრანიზაციების კუთხით და შეიძლება უფრო პოპულარულიც კია ვიდრე ლიტერატურული ნაწარმოები. სწორედ იმიტომ, რომ სიუჟეტის საინტერესოობასთან ერთად, ფილმში შექმნილი გარემო და საოცარი მუსიკა ნაწარმოებს ბევრად დიდ ღირებულებას მატებს.