ლიტერატურის კითხვა და წაკითხულის განხილვა თვითგამოხატვის, შემეცნების, განვითარებისა და მეგობრებისა თუ თანამოაზრეების შეძენის ერთ-ერთი საუკეთესო საშუალებაა, რომელიც ხშირად წიგნების კლუბის სახეს იძენს. წიგნებზე საუბრის ფორმატი, შეხვედრების ადგილი და სიხშირე, წევრების რაოდენობა და მათი გემოვნება თითოეულ ლიტერატურულ კლუბში განსხვავებულია, მაგრამ ყველას ერთი რამ — კითხვის სიყვარული აერთიანებს.
ლიტერატურული კლუბები იმდენად პოპულარულია, რომ მათ ფილმებსა და სერიალებშიც ხშირად ვხვდებით. ამ სტატიაში სწორედ 4 ცნობილ წიგნის კლუბზე მოგიყვებით:
“მკვდარი პოეტების საზოგადოება”
Buena Vista Pictures Distribution
შესაძლოა, “მკვდარი პოეტების საზოგადოება” წიგნის კლუბის ტრადიციულ გაგებას არ ემთხვეოდეს, თუმცა მისი წევრები სწორედ იმ ღირებულებებს ემსახურებიან, რომლებიც წიგნის კლუბს ქმნის. წევრები ერთმანეთს საიდუმლოდ ხვდებიან, პოეზიას ხმამაღლა კითხულობენ, ერთმანეთს საკუთარ გრძნობებსა და ნაწერებს უზიარებენ და პატივს სცემენ ლიტერატურას, როგორც ხელოვნებას. პოეზიის სიყვარულით გაერთიანებული ადამიანები “კლუბში” შთაგონებას, საკუთარ თავსა და თანამოაზრეებს პოულობენ.
“ჯეინ ოსტინის მკითხველთა კლუბი”
“ჯეინ ოსტინის მკითხველთა კლუბი” 6 ადამიანს აერთიანებს, რომლებიც ჯეინ ოსტინის წიგნებს კითხულობენ და ყველასათვის საყვარელი ინგლისელი მწერლის შემოქმედებას განიხილავენ. საინტერესო ისაა, რომ წიგნის კლუბის წევრების პირადი ცხოვრება, ხასიათი თუ პრობლემები, გარკვეულწილად, ჯეინ ოსტინის შემოქმედებისა და ცხოვრების ანარეკლია. პერსონაჟები კლუბის დახმარებით ახალ მეგობრებს იძენენ, წიგნების განხილვა კი შიშებთან გამკლავებასა და საკუთარი თავის პოვნაში ეხმარებათ.
„დაკარგულების“ წიგნების კლუბი
შეიძლება არ გახსოვდეთ, მაგრამ წიგნების კლუბი ყველასათვის საყვარელ სერიალ “დაკარგულებშიც” არის. მესამე სეზონის პირველ ეპიზოდში, როცა “სხვებს” უფრო კარგად ვეცნობით, ვხედავთ, როგორ მასპინძლობს ჯულიეტი წიგნების კლუბს, სადაც წევრებთან ერთად სტივენ კინგის “კერის” განიხილავს. ეს სცენა გარკვეულ კონტრასტს ქმნის კუნძულზე “დაკარგულების” პერსონაჟების ყოველდღიურ, საფრთხით სავსე ცხოვრებასთან. აღსანიშნავია, რომ სერიალის პერსონაჟებსა და სიუჟეტურ ხაზებში ცნობილ წიგნებთან პარალელების დანახვაც მარტივია.
წიგნების კლუბი „ოფისში“
ის თუ გახსოვთ, როგორ დააფუძნეს პემმა, ტობიმ და ოსკარმა ოფისში კლუბი? ამ კლუბში ლიტერატურასა და ხელოვნებაზე საუბარს თან ჩაისა და სასუსნავებს აყოლებდნენ. უნდა ვაღიაროთ, რომ წიგნების კითხვაზე მეტად, ერთმანეთთან საუბარი და სამსახურის მოსაწყენი ყოველდღიურობისგან თავის დაღწევა უფრო უნდოდათ, მაგრამ წიგნების კლუბის დანიშნულებაც ხომ ხშირად უბრალოდ თანამოაზრეებისა და კომფორტული სივრცის პოვნაა? ასე რომ, პერსონაჟებს ნამდვილად ვერ ვუსაყვედურებთ.
თუ სტატიის კითხვისას წიგნების კლუბში გაწევრიანება მოგინდათ, მაშინ საინტერესო სიახლე გვაქვს. SOLO ახალ პროექტს — SOLO Book Club-ს იწყებს, რომლის ფარგლებშიც შეგიძლიათ დათო გორგილაძესთან ერთად ლიტერატურულ შეხვედრებს დაესწროთ. დათო შეხვედრებს სპეციალურად SOLO მომხმარებლებისთვის ჩაატარებს. წიგნის კლუბში წინასწარ შერჩეულ ლიტერატურულ ნაწარმოებზე დისკუსია გაიმართება, რომლის დროსაც შეხედულებებისა და ემოციების გაზიარება ნებისმიერ წევრს შეეძლება.
პროექტის შესახებ გაცნობითი პრეზენტაცია 20 ნოემბერს, ჭავჭავაძის SOLO ლაუნჯში გაიმართება, სადაც SOLO Book Club-ის პირველი შეხვედრის თარიღი და ნაწარმოებიც დაანონსდება.