10 წიგნი, რომლებსაც წიგნის დღეებზე პატარა მკითხველისთვის ფასდაკლებით შეიძენ

თბილისის წიგნის დღეები იწყება: 10 ნოემბრიდან 12 ნოემბრის ჩათვლით ექსპოჯორჯიას საგამოფენო სივრცე წიგნის მოყვარულებისთვის შემოდგომის ყველაზე საყვარელ ღონისძიებას უმასპინძლებს. განსაკუთრებული ფასდაკლებებისა და ახალი გამოცემების გარდა, წიგნის დღეებზე ნებისმიერი ასაკის მკითხველისთვის საინტერესო კულტურულ-საგანმანათლებლო აქტივობებიც დაგხვდება.

ამ ბლოგში გვინდა შემოგთავაზოთ პატარა მკითხველისთვის 10 გამორჩეული  წიგნი, რომლებსაც წიგნის დღეებზე ფასდაკლებით შეიძენ. თუმცა ისიც უნდა ითქვამს, რომ ქვემოთ ჩამოთვლილი ნაწარმოებები არც უფროსი თაობის მკითხველს დატოვებს გულგრილს.

1. მარჯან სატრაპი – პერსეპოლისი

,,პერსეპოლისს“  მხოლოდ საბავშვო ლიტერატურის თაროს ვერ მივაკუთვნებთ, თუმცა იუმორით სავსე ტექსტები, სახასიათო ილუსტრაციები მოზარდი მკითხველისთვის განსაკუთრებულად მარტივად აღსაქმელი და საინტერესოა. ეს არის ამბავი მეამბოხე ირანელი გოგოს შესახებ, რომელსაც საკუთარი სამშობლო ვერც ,,სამშობლოში“ და ვერც მისგან შორს, ევროპაში, ვერ უპოვია.

2. რ.ჯ პალაციო – საოცრება

,,საოცრება“  სტივენ ჩბოსკის ამავე სახელწოდების ეკრანიზაციით გახდა განსაკუთრებით ცნობილი, თუმცა თუნდაც ფილმი უკვე გქონდეს ნანახი, რ.ჯ პალაციოს წიგნის წაკითხვა ნამდვილად ღირს. ამ ისტორიის მთავარი გმირი, ავგუსტ პულმანი ჩვეულებრივი ბიჭია, რომელიც უჩვეულო სახის დეფორმაციით დაიბადა. ამბებს თავად ავგუსტი გვიყვება, რაც განსაკუთრებულ თანაგრძნობას უჩენს მკითხველს და აფიქრებს, რამდენად ტრაგიკული შეიძლება იყოს ბულინგი, რომელიც ხშირად უწყინარი ხუმრობა გვგონია.

3. რევაზ ინანიშვილის რჩეული საბავშვო მოთხრობები

რევაზ ინანიშვილის თხრობის სტილი, მხატვრული სიმარტივე და კეთილი ამბები, ზოგჯერ სევდიანად ლამაზიც, შეუძლებელია, არ შეგიყვარდეს. მოთხრობებში მოყოლილი ამბები თითქოს არც ისე დიდი ხნის წინ მოხდა, მაგრამ ბავშვები კითხვისას მარტივად მიხვდებიან, რომ  პერსონაჟების სამყარო ძალიან განსხვავდება თანამედროვე სამყაროსგან.

4. ანტუან დე სენტ-ეგზიუპერი – პატარა პრინცი

ალბათ წიგნების არცერთი სია არ უნდა დასრულდეს ანტუან დე სენტ-ეგზიუპერის ,,პატარა პრინცის“ გარეშე,  რომელიც საფრანგეთში XX საუკუნის საუკეთესო ნაწარმოებად აღიარეს. ავტორი დედამიწაზე ჩამოვარდნილი ასტეროიდელი პატარა პრინცის პირით გვიყვება ამბებს მარტოობაზე, მეგობრობაზე, სიყვარულსა და სასოწარკვეთაზე. ,,პატარა პრინცი“ სულაც არ არის მხოლოდ პატრებისთვის, ყველა ასაკში სხვანაირად გიყვარს და სხვანაირად განიცდი, რადგან  ,,ოდესღაც ყველა  დიდი ხომ ბავშვი იყო“.

5. ჯოან როულინგი – ჰარი პოტერის სერია

ჰარი პოტერის შვიდტომეული პოტერჰედებისთვის ალბათ საუკეთესო საჩუქარია. როულინგის სამყაროსა და ჰოგვორტსის უცნაურ ამბებს ბევრი საუბარი არ სჭირდება. წიგნის დღეებზე ბაკურ სულაკაურის გამომცემლობის 8-ტომეულზე განსაკუთრებული ფასდაკლება დაგხვდება.  იპოვი ,,ფილოსოფიური ქვისა“ და ,,საიდუმლო ოთახის“ ილუსტრირებულ გამოცემებსაც, რომლებშიც  საყვარელი პერსონაჟების სულ სხვანაირ ვერსიებს ნახავ.

6. ანე-კატერინე ვესტლი – დედა, მამა, რვა ბავშვი და საბარგო მანქანა

ნორვეგიელმა მწერალმა ანე-კატარინე ვესტლიმ შექმნა ამბების სერია ღარიბ და ძალიან კეთილ ოჯახზე, რომელიც მსოფლიოს სხვადასხვა კუთხიდან ყველა ბავშვმა შეიყვარა.  ,,დედა, მამა, რვა ბავშვი და საბარგო მანქანა“ სერიის პირველი წიგნია. თხრობის სადა და იუმორისტული სტილი, დინამიკური სიუჟეტები გვასწავლის რამდენად მხიარული შეიძლება გახდეს ყველაზე სევდიანი ამბებიც და რამდენად ცოტა შეიძლება გვეყოს ბედნიერებისთვის, თუ მოვინდომებთ.

7. ასტრიდ ლინდგრენი – ყაჩაღის ასული რონია

საბავშვო ლიტერატურაზე საუბარი ასტრიდ ლინდგრენის გარეშე უპატიებელი დანაშაულია.  ყველასთვის საყვარელმა შვედმა ავტორმა ბავშვობაში მამისგან მოსმენილი ამბების ინსპირაციით ყველა დროის საუკეთესო პერსონაჟები შექმნა. ცელქი პეპი, მსუნაგი მფრინავი ბიჭი კარლსონი, ალბათ, ყველა თაობის ბავშვს ძალიან უყვარს.   ,,ყაჩაღის ასული რონიაც“ ყველაზე დასამახსოვრებელი პერსონაჟების სიას ეკუთვნის. მეამბოხე და მამაცი გოგონა გვაჩვენებს, რომ მეგობრობის ძალას ყველა წინაღობისა და ბოროტების დამარცხება შეუძლია.

8. არჩილ სულაკაური – სალამურას თავგადასავალი

,,სალამურას თავგადასავალი“ გამორჩეული ქართული ლიტერატურული ზღაპარია სიკეთესა და მეგობრობაზე. ქონდარეთის ჯიუტმა და ძილისგუდა უფლისწულმა სიზმარში ნანახ ციცინათელების მწყემსთან თამაში მოინდომა. ღამის შიკრიკებმა ციცინათელების მზეთუნახავი მწყემსი მოიტაცეს და უფლისწულს მიჰგვარეს. მეგობრის გადასარჩენად სალამურა ქვეყნიერებას მოივლის და ფათერაკებიან მოგზაურობაში პატარა მკითხველსაც თან გაიყოლებს. სულაკაურის ჯადოსნური მინდვრები ციცინათელებით, ფერადი ყვავილებითა და ჭიამაიებით დაუვიწყარ შთაბეჭდილებას ქმნის.

9.რთურ კონან დოილი – ბასკერვილების ძაღლი

ვისაც დეტექტივები და საშიში ამბები ძალიან უყვარს, ვურჩევთ, წაიკითხოს შიშისმომგვრელი და მომაჯადოებელი,,ბასკერვილების ძაღლი“, უოტსონი და ჰოლმსი ერთად ცდილობენ ამოხსნან ბასკერვილების საგვარეულოს საიდუმლო. რაც ყველაზე საინტერესოა, კითხვისას მკითხველი თავად ცდილობს აჯობოს მსოფლიოს ყველაზე ცნობილ დეტექტივს და სამხილებით თავად მიაგნოს საიდუმლოს.

10. ჰარპერ ლი – ნუ მოკლავ ჯაფარას

ამერიკელი მწერლის ჰარპერ ლის ეს წიგნი თავის დროზე ყველაზე ჰუმანურ ნაწარმოებად აღიარეს. ავტორი პატარა ჭყიტას თვალით დანახული აბსურდული უსამართლობის შესახებ გვიყვება, ატიკუს ფინჩისა და ჭყიტას დიალოგებით გვაჩვენებს თანაგრძნობას, სამართლიანობასა და სიკეთის მაგალითს. ჩვენი წარმოდგენები სხვების შესახებ ხშირად მცდარია,  ,, ადამიანს ვერასოდეს ვერ გაუგებ, თუ არ შეეცდები, მისი თვალით შეხედო გარემოს. მის ტყავში უნდა ჩაძვრე, მერე კი ასე ცოტა გაიარ-გამოიარო“.   

წელს თბილისის წიგნის დღეების გენერალური სპონსორი საქართველოს ბანკია და გამომცემლობების სტენდებთან საქართველოს ბანკის სტუდენტური ბარათით საქართველოს ბანკის ტერმინალზე გადახდისას იმოქმედებს 30% ქეშბექი: გადახდილი თანხის 30 პროცენტს (მაქსიმუმ 50 ლარს) საკუთარ ანგარიშზე 2-3 სამუშაო დღეში დაიბრუნებ. ასევე, იგივე პირობები მოქმედებს sCool Card-ით გადახდისასაც, ამისთვის უბრალოდ საჭიროა, რომ შეთავაზება წინასწარ გააქტიურდეს sCoolApp-ში.

არ გაჩერდე, გააგრძელე კითხვა