Art Direction-ის ან Copywriting-ის მიმართულებით დაინტერესებული სტუდენტებისთვის, რომლებსაც თავიანთი კრეატიული იდეების რეალობად ქცევა სურთ, საქართველოს ბანკმა და Miami Ad School Europe-მა ნიკა გუჯეჯიანის სახელობის სასტიპენდიო პროგრამა 2019 წელს შექმნეს. Miami Ad School Europe (MASE) ციფრული მარკეტინგის, სტრატეგიული იდეების, გრაფიკული დიზაინისა და ფოტოხელოვნების მიმართულებით მსოფლიოს ერთ-ერთი ყველაზე ცნობილი და წარმატებული კრეატიული სკოლაა. ნიკა გუჯეჯიანის სახელობის სტიპენდიატებს კი შესაძლებლობა აქვთ, Miami Ad School Europe-ში Art Direction-ის ან Copywriting-ის 2-წლიან პორტფოლიო პროგრამაზე 100%-იანი დაფინანსებით ისწავლონ.
ნიკა გუჯეჯიანი 2014-2016 წლებში Miami Ad School Europe-ში Art Direction-ის მიმართულებით სწავლობდა. აღსანიშნავია, რომ ნიკა გუჯეჯიანის სახელობის სტიპენდიით ბერლინში სასწავლებლად სამი ქართველი სტუდენტი უკვე გაემგზავრა, მალე კი წლევანდელი სტიპენდიატის ვინაობაც დასახელდება. მანამდე კი, წლევანდელი შედეგებისა და ზოგადად, ნიკა გუჯეჯიანის სახელობის სტიპენდიის მნიშვნელობის შესახებ Miami Ad School Europe-ის მმართველი დირექტორი, საბინ გეორგი ვრცლად გვესაუბრა.
“რამდენიმე წლის წინ, როდესაც ნიკა გუჯეჯიანის სახელობის სტიპენდია დავაფუძნეთ, კონკურსში მონაწილეობის მისაღებად და ბერლინში, კრეატიულ ინდუსტრიის ერთ-ერთ წამყვან სკოლა — MASE-ში, სწავლის გასაგრძელებლად მხოლოდ ათეული სტუდენტი თუ ავსებდა აპლიკაციას. თუმცა ყოველ წელს აპლიკანტების რაოდენობა მკვეთრად იზრდებოდა.
წელს უკვე 160 კანდიდატი გვყავს, რაც ინიციატივის მნიშვნელობას ნათლად უსვამს ხაზს.
გამომდინარე იქიდან, რომ აპლიკანტები განაცხადის შევსების პროცესში საკუთარ პორტფოლიოსთან და რეზიუმესთან ერთად სამოტივაციო წერილსაც გზავნიან, მათი ტექსტებიდან გამომდინარე კიდევ უფრო ნათლად ვხედავთ იმ შესაძლებლობის მნიშვნელობას, რომელსაც ქართველ სტუდენტებს ვაძლევთ: ორი წლის განმავლობაში იცხოვრონ ბერლინში, მიიღონ განათლება მსოფლიოში ერთ-ერთ წამყვან კრეატიულ სკოლაში სრული დაფინანსებით და ევროპის მასშტაბით ჩვენს პარტნიორ სააგენტოებში დასაქმდნენ”, — ამბობს საბინ გეორგი.
სასტიპენდიო კონკურსის პირველ ეტაპზე ის აპლიკანტები გამოვლინდნენ, რომელთა პორტფოლიო იდეათა ორიგინალურობითა და ნამუშევრების შესრულების ტექნიკური ხარისხით გამოირჩეოდა, მათგან კი საუკეთესო შედეგების მქონე 5 მონაწილე შეირჩა, რომელთაგან ერთი გამარჯვებულად დასახელდება. აღსანიშნავია ისიც, რომ ჟიურის ხუთივე კონკურსანტის პორტფოლიო განსაკუთრებით მოეწონა. ამასთანავე, რამდენიმე მათგანი უკვე სხვადასხვა ჯილდოს მფლობელია, ხუთივეს კი ქოფირაითინგისა თუ art direction-ის მიმართულებით მრავალწლიანი გამოცდილება აქვთ.
“გამარჯვებულების გამოსავლენად არჩევანის გაკეთება ყოველთვის გამორჩეული და შთამბეჭდავი პორტფოლიოს მქონე კონკურსანტებს შორის გვიწევს. შესაბამისად, ჩვენი რჩეულები ყოველთვის გამოირჩევიან როგორც სხვა მონაწილეებს, ასევე MASE ბერლინის სტუდენტებს შორის.
ისინი ყოველთვის აჭარბებენ ჩვენს მოლოდინებს როგორც პროფესიული, ასევე ადამიანური კუთხით. აღსანიშნავია, რომ კანდიდატები იმდენად მოტივირებულნი არიან სტიპენდიის მოპოვების შესაძლებლობით, რიგ შემთხვევებში აპლიკაციას მეორედ და მესამედაც კი ავსებენ. ეს კი ნათლად მიუთითებს იმ ნდობასა და ინტერესზე, რომელსაც სტუდენტები ნიკას სახელობის სტიპენდიის მიმართ იჩენენ”, — აღნიშნა MASE-ის მმართველმა დირექტორმა.
ის ფაქტი, რომ საქართველო მრავალი გამოწვევის წინაშე მდგარი პატარა ქვეყანაა, ქართველ ახალგაზრდებს სულაც არ უშლის ხელს, რომ საკუთარი პორტფოლიოს შექმნაზე იმუშაონ. ხშირად ქართული ნარატივის ამსახველი ელემენტები სწორედ ისაა, რაც ქართველ სტუდენტებს სხვებისგან გამოარჩევს.
“კონკურსანტებს შორის როგორც საშუალო, ასევე მაღალი დონის პროფესიონალები გვხვდებიან. ზოგიერთ მათგანს დიზაინისა თუ მაღალი ხარისხის იდეისთვის არაერთი ჯილდო აქვს მიღებული. ზოგი კონკურსანტი გამორჩეულ UX დიზაინს ქმნის, რაც აჩვენებს, რომ ეს მიმართულება სიღრმისეულად ესმით. საინტერესოა ისიც, რომ მონაწილეების დიდი ნაწილი თვითნასწავლია, იქნება ეს ვიდეოების შექმნის, ანიმაციების, 3D ტექნოლოგიებისა თუ ხელოვნური ინტელექტის მიმართულება. ჩვენ ასევე ვიღებთ დამწყებთა დაუსრულებელ ნამუშევრებსაც, რომლებშიც “გენიალური იდეების” აღმოჩენა ჯერ კიდევ ჩანასახშია შესაძლებელი.
ქართველი კონკურსანტების პორტფოლიოებს გამოარჩევს ისიც, რომ მათში ხშირად ქართული ტრადიციების, ქართველი ხალხისა თუ ობიექტების ხაზი იგრძნობა. მნახველისთვის ნათელია, რომ ახალგაზრდები საქართველოთი და მათი კულტურული მემკვიდრეობით ამაყობენ”, — დასძინა საბინ გეორგმა.
MASE-ის მმართველმა დირექტორმა ქართველი სტუდენტებისთვის სწავლის ხელშეწყობაში საქართველოს ბანკის განსაკუთრებულ ჩართულობას ხაზი გაუსვა. ნიკა გუჯეჯიანის სახელობის სტიპენდია 50+50%-იანი დაფინანსებაა, საიდანაც სტუდენტს სწავლის 50%-ს Miami Ad School Europe უფინანსებს, 50%-ს კი — საქართველოს ბანკი. ასე რომ, გამარჯვებული სტიპენდიატის სწავლის საფასური 100%-ით სწორედ საქართველოს ბანკის დახმარებით ფინანსდება.
“საქართველოსნაირი პატარა ქვეყნისთვის საქართველოს ბანკის მსგავსი ძლიერი ფინანსური ინსტიტუტის ასეთ პროცესებში ჩართულობა გადამწყვეტ მნიშვნელობას ატარებს — იქნება ეს სტუდენტებისთვის სწავლის გადასახადის დაფინანსება თუ განათლების შესაძლებლობების შექმნისთვის საჭირო სხვა ინიციატივების მხარდაჭერა. ეს ყველაფერი ახალგაზრდების მხრიდან თვითგანვითარებისა და საკუთარი პოტენციალის სრულად გამოვლენისთვის ახალი შესაძლებლობების აღმოჩენას უწყობს ხელს. ჩვენთვის ძალიან სასიხარულოა, რომ დიდი რაოდენობით აპლიკაციებს ვიღებთ და ამის ახსნა მხოლოდ ქართველი ახალგაზრდების ცვლილებისადმი სწრაფვით შემიძლია”, — აღნიშნა საბინ გეორგმა.
ასე რომ, ნიკა გუჯეჯიანის სახელობის სტიპენდია ის ინსტრუმენტია, რომელიც ახალგაზრდებს საკუთარი თავის აღმოჩენის შესაძლებლობას აძლევს. ის მთავარი ღირებულება კი, რომელსაც საქართველოს ბანკისა და Miami Ad School Europe-ის თანამშრომლობა ემყარება, ქართველი ახალგაზრდებს მიმართ გამოცხადებული ნდობაა. ქართველი ახალგაზრდები ამ ნდობას ყოველთვის ამართლებენ, რისი მაგალითიც თავად ნიკა გუჯეჯიანია.
“რადგან ნიკა გუჯეჯიანი MASE-ში სწავლობდა და შემდეგ საქართველოს ბანკში კრეატიული მარკეტერის პოზიციაზე მუშაობდა, ეს ჩვენ მიერ შექმნილ სტიპენდიას კიდევ უფრო მეტად ავთენტურს და ჩვენთვის ძალიან პერსონალურს ხდის. ვფიქრობთ, რომ ამით ნიკას ხსოვნას პატივს მივაგებთ. საქართველოს ბანკსა და MASE-ს გვიყვარს ის, რაც ნიკამ დაგვიტოვა: შთამბეჭდავი პორტფოლიო და კრეატიული როლ მოდელის მემკვიდრეობა, რადგან ის არა მხოლოდ ძალიან ნიჭიერი დიზაინერი და არტ დირექტორი იყო, არამედ ძალიან თბილი და ყველასთვის საყვარელი ადამიანიც. ჩვენი თანამშრომლობის ფარგლებში კი გვაქვს შესაძლებლობა, ნიკას სახელით ნიჭიერი ახალგაზრდები აღმოვაჩინოთ”, — დასძინა MASE-ის მმართველმა დირექტორმა.
2023-2024 სასწავლო წლის ნიკა გუჯეჯიანის სახელობის სტიპენდიის მფლობელი მალე დასახელდება, ხოლო მათ, ვისაც სამომავლოდ სურთ კონკურსში მონაწილეობას მიღება, MASE კიდევ უფრო მეტ შესაძლებლობას შესთავაზებს. კრეატიული სკოლის კურსებში მალე ისეთი ახალი ტექნოლოგიების ინტეგრირება იგეგმება, როგორებიც ხელოვნური ინტელექტი და ვირტუალური რეალობაა. საქართველოს ბანკის დაფინანსებით MASE-ში უფასოდ სწავლის შესაძლებლობა უკვე არაერთ სტუდენტს მიეცა, შემდეგი კი შენ შეიძლება იყო.