27-28 აპრილს ქალაქ ბათუმში ბათუმობა აღინიშნება – საქართველოს გამორჩეული ზღვისპირა ქალაქის დღესასწაული დაკავშირებულია ბათუმისთვის ქალაქის მინიჭების თარიღთან. ესაა ქალაქის, დაახლოებით, 2500-წლიანი ისტორია, რომელიც 1888 წლის 28 აპრილიდან იწყება: 1885 წელს ამ ადგილის მკვიდრმა 90-მა ადამიანმა წერილობით მიმართა კავკასიის სამოქალაქო ნაწილის უფროსს, რომ ბათუმი გამხდარიყო ქალაქი – წერილიდან 3 წლის შემდეგ ასეც მოხდა.
ქალაქის კულტურული სივრცის უდიდესი ნაწილი უჭირავს ზღვას – გემები, პორტი, მეზღვაურები, ტურიზმი, შესაბამისად, დიდი მნიშვნელობა აქვს ბათუმის მთავარ სასწავლებელს – სახელმწიფო საზღვაო აკადემიას, რომელიც საუკეთესოდ იცნობს ქალაქს და ახალგაზრდა ბათუმელებს ბევრ შესაძლებლობას აძლევს.
საზღვაო აკადემია საქართველოს ბანკს კიდევ უფრო დაუმეგობრდა და მასშტაბური სასტიპენდიო პროგრამის ჩაერთო, რაც სტუდენტებისთვის სწავლის მთლიანად ან ნაწილობრივ დაფინანსებას გულისხმობს. უნივერსიტეტში კონკურსის შემდეგ გამოვლინდნენ ამ პროგრამის გამარჯვებულები, რომლებმაც თავად გაგვიზიარეს ემოციები – ქალაქსა და პროფესიაზე:
ბათუმი საპორტო ქალაქია, რომელსაც შავი ზღვის აუზში ერთ-ერთი ნავსადგური აქვს, აქედან გამომდინარე, გადაზიდვებისა და ლოჯისტიკის სფერო ყოველთვის მაინტერესებდა. საზღვაო აკადემიის ბიზნესის ადმინისტრირების პროგრამა გვაძლევს საშუალებას, ავირჩიოთ კონკრეტული მიმართულება, ანუ ლოჯისტიკის გარდა ვსწავლობთ ბიზნესის მართვას, მთლიანობაში პროგრამა ითვალისწინებს ბიზნესის სხვადასხვა სფეროს.
– რაქსანა მაკარიანი
რაც შეეხება სტიპენდიას, სლოგანი „არ გაჩერდე” ზუსტად შეესაბამება ამ პროგრამას, რადგან დიდი მოტივაცია მომცა იმისათვის, რომ არ გავჩერდე, უფრო დიდი მიზნები დავისახო და ყველაფერი გავაკეთო იმისათვის, რომ მივაღწიო ამ მიზნებს. დავრწმუნდი, რომ სწავლა და შრომა ყოველთვის ფასდება.
ბავშვობის ბედნიერი მომენტები ზაფხულის პერიოდთან და ზღვასთან ასოცირდება. ზღვა ძალიან მიყვარს. საზღვაო სფერო გაძლევს საშუალებას, გაეცნო სპეციფიკურ განხრას, რომელიც მოიცავს დიდ ისტორიას. საქმე რაღაც მხრივ სახიფათო, ამაღელვებელი და საინტერესოა. გარკვეული ტიპის გემებზე მუშაობისას გეძლევა საშუალება, მოინახულო ის ქვეყნები, რომლის პორტშიც შედის გემი. საზღვაო სფეროში ანაზღაურება მაღალია. ბევრი მოსმენილი ისტორია, ზღვის მითიური ცხოველები, კარიბის ზღვის მეკობრეები, ცურვის და ზღვის სიყვარული, არასტანდარტული ცხოვრების წესი – გარკვეულ წილს თამაშობენ ამ არჩევანში.
საქართველოს ბანკის სტიპენდია კიდევ ერთი ბიძგია იმისა, რომ ადამიანს ადრე თუ გვიან სწავლა რაღაც მხრივ დაუფასდება. ჩვენს შემთხვევაში ეს იყო სწავლის პერიოდში ფინანსური ბიძგი – შევძელით სამსახურის სამუშაო საათების განახევრება და მეტი დროის დათმობა სწავლისთვის და გართობისთვის. საქართველოს ბანკმა მოგვცა საშუალება, გვქონდა მეტი თავისუფალი დრო და მეტი ფინანსები, რომელსაც სხვადასხვა განხრით გამოვიყენებთ.
– ირაკლი მიქელაძე
ბათუმი ასოცირდება ზღვასთან, თოლიებთან და თეთრ ფორმიან მოქმედ თუ მომავალ მეზღვაურებთან. სტაბილური პროფესია, რომელიც სავსეა გამოწვევებით, სიახლეებით, თავგადასავლებით, ახალი კულტურისა და ხალხის გაცნობით ყველასათვის საინტერესო და მიმზიდველია. სირთულეები ყველა პროფესიაშია, მაგრამ შტორმი ქმნის გამოცდილ მეზღვაურებს. ამ გზაზე მხარდაჭერა კი სასიცოცხლოდ მნიშვნელოვანია არგაჩერებისთვის და სრული სვლით წინსვლისთვის.
– ჯონი კახიძე
რაქსანამ, ირაკლიმ და ჯონიმ თავიანთი საქმე სხვადასხვა მიმართულებით დაუკავშირეს ზღვას, რაც მხოლოდ და მხოლოდ საქმისა და მშობლიური ქალაქის სიყვარულით, დიდი ინტერესითა და მიზანდასახულობით აიხსნება. სტიპენდიის მიზანიც მათ მიერ არჩეულ გზაზე მაქსიმალურად ნაკლები გარე საფიქრალის გაჩენაა, რომ დასახული მიზნისკენ მიმავალ გზაზე არ გაჩერდნენ!
საქართველოს ბანკის სტიპენდიის შესახებ დეტალური ინფორმაციის გაგება ამ ბმულზე შეგიძლია.