ლონდონის წამყვან უნივერსიტეტში სწავლა საქართველოს ბანკის სტიპენდიით – Chevening-ის გამარჯვებულის გამოცდილება

ბრიტანული სწავლისა და სწავლების ხარისხი საერთაშორისოდ ცნობილი და გამორჩეულია, Chevening-ის სასტიპენდიო პროგრამა კი ამ გამორჩეულ საგანმანათლებლო სივრცეში მოხვედრის საუკეთესო შესაძლებლობაა. საქართველოს ბანკის სტიპენდია Chevening-ის პროგრამაში საშუალებას გაძლევს, დიდი ბრიტანეთის სასურველ უნივერსიტეტში 1-წლიან სამაგისტრო პროგრამაზე ისწავლო!

ამ დროის განმავლობაში უკვე 27 ქართველი სტუდენტი გაემგზავრა სასწავლებლად. საქართველოს ბანკის სტიპენდიატებს შორის არის გიორგი კვინიკაძე, რომელიც თავის გამოცდილებას გვიზიარებს:

ლონდონი

„ჩავაბარე MS Data Science-ის ფაკულტეტზე The London School of Economics and Politics-ში, რომელიც ლონდონის ცენტრში მდებარეობს. ზოგადად, ლონდონი მსოფლიოს ერთ-ერთ ცენტრად არის მიჩნეული, მრავალფეროვნებისა და ცხოვრების ტემპის გათვალისწინებით. ადაპტაციის პროცესშიც ქალაქის მულტიკულტურული გარემო დამეხმარა.

ამ ქალაქში ნებისმიერ ადამიანს შეუძლია მისთვის კომფორტული საცხოვრებელი ადგილი და სივრცე იპოვოს და მარტივად ინტეგრირდეს. ძირითად სირთულეს ქალაქის სიდიდე და ჩქარი ცხოვრების ტემპი წარმოადგენს, რაც დატვირთული სასწავლო პროცესის დროს მოდუნების საშუალებას არ გაძლევს და კარგი დროის მენეჯმენტის უნარებს მოითხოვს. უპირატესობებს რაც შეეხება, ლონდონი არის შესაძლებლობების და ახალი აღმოჩენების ქალაქი, სახასიათო არქიტექტურითა და მრავალფეროვანი მუზეუმების ქალაქი.

ბევრი მცდელობა არ დაგჭირდებათ, ლონდონი თქვენი საყვარელი ქალაქი გახდება.“

სწავლა

„The London School of Economics and Political Science – ერთ-ერთი პრესტიჟული უნივერსიტეტია როგორც ლონდონში, ისე – მსოფლიოში. შესაბამისად, სასწავლო პროგრამები ძალიან ინტენსიური და ბაზრის მოთხოვნებთან მაქსიმალურად ახლოსაა. დიდი ყურადღება ექცევა სტუდენტურ ცხოვრებას, რაც სხვადასხვა აქტივობაში ჩართულობასა და საგანმანათლებლო კლუბებში გაწევრიანებას მოიაზრებს. ყოველკვირეულად გვაქვს შესაძლებლობა, შევხვდეთ სხვადასხვა ტექნოლოგიური კომპანიის წარმომდგენლებს და რეალურ ბიზნესქეისებზე ვიმუშაოთ.

LSE-ში სასწავლო გარემოც ძალიან საინტერესოა: ლექციები სხვადასხვა შენობაში მიტარდება – ზოგი მოდერნისტულია, ზოგიც ისტორიული, და სხვა ყველაფერთან ერთად გარემოს მსგავსად ცვლილება სიახლის შეგრძნებებს იწვევს. განსხვავებული დამოკიდებულება იგრძნობა ფაკულტეტისა და პროფესორებისგანაც; ყოველთვის გრძნობ, რომ შენ ხარ მთავარი. თუმცა, ჩემთვის ყველაზე მნიშვნელოვანი ის არის რომ კვლევით ნაშრომზე ფინანსურ კომპანია WISE-ის გუნდთან ერთად ვმუშაობ.“

გარემო

„ბრიტანელები ძალიან თავაზიანი და მეგობრული ხალხია. როგორც უკვე აღვნიშნე, ლონდონში მულტიკულტურული გარემოა, რაც ადამიანების გაცნობასა და დამეგობრებაში გეხმარება. ჩემს შემთხვევაში, უნივერსიტეტი და სტუდენტური კლუბები მეხმარება სამეგობრო წრის გაფართოებასა და ახლო ურთიერთობის ჩამოყალიბებაში.“

თუკი შენც გსურს, გიორგის მსგავსად გაემგზავრო დიდ ბრიტანეთში და შენთვის უნიკალური გამოცდილება მიიღო, გაეცანი კონკურსში მონაწილეობის წესებს აქ.

გიორგი კი გირჩევთ:

„მაქსიმალურად ყურადღებით წაიკითხე აპლიკაციის მოთხოვნები და სწორად შეარჩიე სასწავლო პროგრამა, რომელზეც გსურს სწავლის გაგრძელება. გაითვალისწინე შენი პროფესიული და აკადემიური გამოცდილება და სამომავლო გეგმები.

მიუხედავად იმისა, რომ სააპლიკაციო პროცესი საკმაოდ დიდხანს გრძელდება, მნიშვნელოვანია, თითოეულ ეტაპზე მაქსიმალურად კარგად მოემზადო და კარგად წამოაჩინო ის მიზნები, რისთვისაც გჭირდება Chevening-ის პროგრამაში გამარჯვება.

შრომატევადი პროცესია და უმნიშვნელოვანესია, დაიჯერო საკუთარი თავის შესაძლებლობის და არცერთ ეტაპზე არ გაჩერდე.“

Chevening-ის სასტიპენდიო პროგრამასთან ერთად საქართველოს ბანკი კიდევ არაერთ საგანმანათლებლო პროექტს ახორციელებს და ყველა ასაკის ადამიანისთვის განათლების შესაძლებლობებს ქმნის. შენს ინტერესებს მორგებული შესაძლებლობების შესახებ მეტი შეგიძლია გაიგო CSR.BOG.GE-ზე.

არ გაჩერდე, გააგრძელე კითხვა