ნიკა გუჯეჯიანის სახელობის სტიპენდია 2019 წლიდან ქართველ ნიჭიერ და საინტერესო ახალგაზრდებს ბერლინში Miami Ad School-ში სრული დაფინანსებით სწავლის შესაძლებლობას აძლევს. Miami Ad School მსოფლიოს ერთ-ერთ წამყვან კრეატიულ სკოლად მიიჩნევა ციფრული მარკეტინგის, სტრატეგიული იდეების, გრაფიკული დიზაინისა და ფოტოხელოვნების მიმართულებით. საინტერესოა, რომ კონკურსის კომისია ყურადღებას აქცევს კანდიდატის პორტფოლიოს, რეალურ ნამუშევრებს, რომლებშიც ჩანს არა მხოლოდ ტექნიკური უნარები, არამედ განსხვავებული ხედვა, იდეები და პოტენციალი.
2024 წლის გამარჯვებული ივა ქიმერიძე გახდა და Art Direction-ის მიმართულებით სწავლობს ბერლინში. როგორც თავად ამბობს, უშუალოდ Art Direction-ის მიმართულებით გამოცდილება არ ჰქონია, თუმცა ცოდნა და უნარები, რომლებიც ვიზუალურ ხელოვნებაში დააგროვა, საკმარისი აღმოჩნდა შთამბეჭდავი პორტფოლიოს შექმნისთვის. ბერლინიდან ივამ გაგვიზიარა საკუთარი გამოცდილება და რჩევები მომავალი კონკურსანტებისთვის:
„სწავლის დასაწყისში Art Direction-ისა და Copywriting-ის კლასები ერთად ტარდება. აქამდე მეგონა, რომ Copywriting-ი საერთოდ სხვა მიმართულება იყო, ახლა გავიაზრე, რომ სიტყვები, გრაფიკა, ანიმაცია თუ ვიზუალური ხელოვნების სხვა ხერხები ერთმანეთთანაა გადაჯაჭვული, ერთმანეთს ავსებენ. სინამდვილეში, შეიძლება ქოფიდან წამოვიდეს ახალი და საინტერესო სარეკლამო კამპანიის იდეა. აქ სწავლა ყველასთვის სხვადასხვანაირი გამოცდილებაა, არიან უფრო გამოცდილებიც და გამოუცდელებიც. საბოლოოდ, ბევრ ახალ, ნიჭიერ ადამიანს ხვდები, რომლებთან საუბარი და აზრების მიმოცვლაც კი განვითარებაში გეხმარება. ბერლინში ცხოვრებაც სრულიად ახალი გამოცდილებაა. კრეატიული ინდუსტრია აქ დახვეწილი და განვითარებულია, ბევრ რეალურ ნამუშევარს და წარმატებულ კამპანიას ვნახულობთ, ლექციებზე პრაქტიკულად ვსწავლობთ, როგორ ავაგოთ კონცეფცია იდეისგან და როგორ შევქმნათ სრულყოფილი კამპანია მონახაზისგან“.
პორტფოლიო Miami Ad School-ში მოსახვედრად და საკმაოდ დიდი კონკურენციის დასაძლევად მთავარი ინსტრუმენტია. ივა მომავალ სტუდენტებს ურჩევს, ყურადღება გაამახვილონ გულწრფელობასა და სიმარტივეზე:
„ვფიქრობ, ყველაზე მნიშვნელოვანია, თითო პროექტს დაუთმო 3-4 სლაიდი. ყოველწლიურად უამრავ პორტფოლიოს იღებენ და აუცილებელია, ლაკონიურად მოახერხო საკუთარი სათქმელის მიტანა კომისიამდე. სწორად უნდა შეარჩიო პროექტები, რომლებზეც მოჰყვები, მაქსიმალურად ბევრი უნარი და შესაძლებლობა უნდა გამოავლინო. პროექტები ქაოსური არ უნდა იყოს, ამიტომ უმჯობესია იპოვო რაღაც საერთო ხაზი, იდეა, რომლითაც შენს ნამუშევრებს გააერთიანებ. ფინალურ ეტაპზე შენი საყვარელი პროექტი უნდა წარადგინო. აქ გადამწყვეტი მნიშვნელობა აქვს, როგორ ისაუბრებ, როგორ ახსნი, რატომ არის განსაკუთრებული ეს ნამუშევარი შენთვის. მთავარია იყო საკუთარი თავი და არ ეცადო, რომ ვიღაც უფრო გამოცდილი ითამაშო, გულწრფელი ინტერესი და ენთუზიაზმი უნდა ჩანდეს შენს თითოეულ სიტყვაში.“
ივას ნამუშევრებსა და პორტფოლიოს, რომელიც ბევრ აპლიკანტს შორის გასულ წელს საუკეთესოდ დასახელდა, პორტფოლიოს აქ ნახავ.
წელს Miami Ad School-ში სწავლის ფორმატი შეიცვალა. 1-წლიან პროგრამაზე სტუდენტი ჰიბრიდულ რეჟიმში ისწავლის, სასწავლო წლის ნახევარს ბერლინში გაატარებს, ნახევარს კი − საქართველოში და ონლაინ დაესწრება ლექციებს. აპლიკაციების მიღების ბოლო ვადა 25 ივლისია. ასე რომ, თუ შენც მოგწონს კრეატიულ იდეებზე ფიქრი და ამ იდეების სიტყვებად თუ ვიზუალებად გაცოცხლება, აუცილებლად გამოიყენე შანსი, გახდე ნიკა გუჯეჯიანის სახელობის სტიპენდიის შემდეგი გამარჯვებული!
აპლიკაციის შევსებისა და სასწავლო პროგრამების შესახებ დეტალურ ინფორმაციას ამ ბმულზე იპოვი.
განათლების გზაზე არ გაჩერდე!