საქართველოს ბანკი კომაროვის სკოლასთან ერთად მასშტაბურ STEM ოლიმპიადას იწყებს, რომელშიც მოსწავლეები სკოლის სახელით იასპარეზებენ. ამ ბლოგში გაეცნობით გუნდების შექმნის პრინციპს და მიიღებთ რჩევებს კომაროვის სკოლის პროფესიონალებისგან.
ოლიმპიადაში მონაწილეობას 100 სკოლა და, შესაბამისად, 100 გუნდი შეძლებს. თითოეულ გუნდში 6 მონაწილე უნდა იყოს – მეშვიდე კლასიდან მეთერთმეტე კლასის ჩათვლით.
ოლიმპიადა ორ ეტაპად ჩატარდება:
I ეტაპი
საწყის ეტაპზე გუნდებმა კონკურენტებს თეორიულ ცოდნაში უნდა აჯობონ. ტესტი სამ საგანში: ფიზიკა, მათემატიკა, ინფორმატიკა ჩატარდება, გუნდიდან სამმა მონაწილემ უნდა დაწეროს მათემატიკის , ორმა – ფიზიკის, ერთმა კი – ინფორმატიკის ტესტი.
ასე რომ, თუ გუნდი ჯერ არ შეგიდგენიათ, ეცადეთ, გუნდში ის მოსწავლეები მოხვდნენ, რომლებიც ამ საგნებს საუკეთესოდ ფლობენ. არ დაგავიწყდეთ იმის გათვალისწინება, რომ გუნდში სამი მოსწავლე უნდა შეირჩეს მათემატიკის, ორი – ფიზიკის, ხოლო ერთი ინფორმატიკის ცოდნის მიხედვით, თითოეულმა მოსწავლემ კი თავის საგანში უნდა დაამტკიცოს ცოდნა პირველ თეორიულ ტურში. მოსწავლეები წინასწარ გაეცნობიან თითოეული საგნის ოლიმპიადისთვის მოსამზადებელ მასალას. გუნდს დარეგისტრირებისას აუცილებლად დასჭირდება მენტორი, რომელიც მოსამზადებელ პერიოდში უხელმძღვანელებს, დაეხმარება მეცადინეობაში და გაუზიარებს სავარჯიშო დავალებებს. მენტორი ამავე სკოლის საბუნებისმეტყველო ან ტექნიკური საგნის მასწავლებელი უნდა იყოს (მათემატიკა, ფიზიკა, ქიმია, ბიოლოგია, ინფორმატიკა, ისტ, ინჟინერია).
პირველი ეტაპის ბოლოს, გუნდის წევრების მიერ თითოეულ საგანში მიღებული ქულა შეჯამდება და გამოვლინდება 10 საუკეთესო გუნდი, რომლებიც გამარჯვებისთვის ბრძოლას მეორე ტურში გააგრძელებენ.
II ეტაპი
შემდეგ ეტაპზეგადასული გუნდები თეორიულ ცოდნას პრაქტიკაში გამოცდიან: საუკეთესო ათეული ერთმანეთს ინჟინერიის პრაქტიკული ამოცანების ამოხსნაში შეეჯიბრება. გუნდები 8 საათის განმავლობაში კომფორტულ და ყველა საჭირო რესურსით აღჭურვილ ოთახში იმუშავებენ. სამართლიანობასა და ობიექტურობას კი ოლიმპიადის საორგანიზაციო ჯგუფი უზრუნველყოფს.
ერთ სკოლაში ოლიმპიადაზე დარეგისტრირების სურვილი შეიძლება ბევრმა მოსწავლემ გამოთქვას, საუკეთესო ექვსეულის შესარჩევად სკოლამ შესაძლოა სასურველი მეთოდი და ფორმა გამოიყენოს, თუმცა კომაროვის სკოლის გამოცდილი პროფესიონალები ყველას უზიარებენ რამდენიმე რჩევას, რომლებიც კანდიდატების შერჩევაში დაგეხმარებათ:
- ,,მათემატიკოსი“, ,,ფიზიკოსი“ და ,,პროგრამისტი“ მოსწავლეების შესარჩევად სასურველია, სკოლის შიდა გამოცდა ჩატარდეს, წერების ფორმატისა და შინაარსის შედგენისას კი შეგიძლიათ ოლიმპიადის სარეგისტრაციო გვერდზე ატვირთული პროგრამა გამოიყენო.
- უმჯობესია, ტესტის უმეტესი ნაწილი იყოს ღია და არა შემოსახაზი დავალება, ასე უკეთ შეძლებთ შეაფასოთ მოსწავლის ლოგიკური აზროვნება და მსჯელობის უნარი.
- ეცადეთ, შიდა წერების დროები სხვადასხვა საგანში ერთმანეთს არ დაემთხვეს, შეიძლება, რომელიმე მოსწავლეს სურდეს ბედი რამდენიმე საგანში სცადოს.
- სასურველია, საგამოცდო პროცესს დამკვირვებელმა გაუწიოს მეთვალყურეობა, რაც მოსწავლეებისთვის ერთგვარი ,,რეპეტიციაც“ იქნება მომავალი ოლიმპიადისთვის.
- ოლიმპიადის ფინალში გამარჯვებისთვის მონაწილეებმა გუნდურად უნდა იმუშაონ და გაუმკლავდნენ პრაქტიკულ დავალებებს ინჟინერიაში, ამიტომ უმჯობესია, კანდიდატებს მიკროკონტროლერი Arduino-ს ცოდნა უპირატესობად ჩაეთვალოთ, მაგალითად: შესაძლებელია, ასეთ მოსწავლეებს შიდა შესარჩევ ტურზე დაემატოთ ქულების 10%, ან ერთნაირი ქულების მიღების შემთხვევაში ის მოსწავლე შეირჩეს, რომელმაც იცის მიკროკონტროლერთან მუშაობა.
- ნუ შეარჩევთ გუნდის წევრების მხოლოდ Arduino-ს ცოდნის მიხედვით, მიკროკონტროლერთან მუშაობა მათ მხოლოდ ფინალურ ეტაპზე მოუწევთ, ფინალამდე მისასვლელად კი ჯერ თეორიულ ცოდნაში მინიმუმ 90 გუნდს უნდა აჯობონ და მოხვდნენ საუკეთესო ათეულში. თანაც, ფინალში გადასული გუნდების მენტორებისთვის სრულიად უფასოდ ჩატარდება სამთვიანი გადასამზადებელი კურსი Arduino-ს შესასწავლად. მტკიცე თეორიული ცოდნისა და სხარტი აზროვნების მოსწავლე მენტორის დახმარებით მარტივად შეძლებს ალღო აუღოს Arduino-სა და პრაქტიკულ ამოცანებს.
- გუნდების დაკომპლექტებისას, სჯობს, გაითვალისწინოთ გამოცდებზე მიღებული შედეგი და არა მოსწავლეების ასაკი, საოლიმპიადო პროგრამები დაბალი (მე-7, მე-8) კლასების სასკოლო პროგრამის მიხედვით არის შედგენილი და შესაძლებელია დაბალკლასელმა მონაწილემ აჯობოს მაღალკლასელს.
შეგახსენებთ, რომ 2023-2024 წლის STEM ოლიმპიადის რეგისტრაცია 3 დეკემბრის ჩათვლით გაგრძელდება, ასე რომ, საკმარისი დროა, გუნდის წევრები და მენტორები სათანადოდ რომ შეირჩეს ყველა სკოლაში.