ჟურნალმა Euromoney, რომელიც საბანკო და საფინანსო სფეროში ერთ-ერთი ყველაზე გავლენიანი გამოცემაა, Awards for Excellence-ის ფარგლებში საქართველოს ბანკი ქვეყანაში საუკეთესო კორპორაციული სოციალური პასუხისმგებლობის მქონე ფინანსურ ინსტიტუტად დაასახელა.
Euromoney 1992 წლიდან არსებობს და მისი მთავარი მიზანი მსოფლიო საბანკო სფეროში პოზიტიური ცვლილებების აღმოჩენა და წახალისებაა. წელს ამ სფეროში განსაკუთრებული ფოკუსის ქვეშ კორპორაციული სოციალური პასუხისმგებლობის მიმართულება მოექცა და საქართველოს ბანკიც მოხვდა ამ პრესტიჟული გამოცემის რადარზე.
განათლების, დასაქმების და ბიზნესის მხარდაჭერა – ეს ის სამი ძირითადი მიმართულებაა, რომლებიც საქართველოს ბანკის ინტერესებში მთავარი პრიორიტეტია. სამივე ხაზი ერთიანდება იმ მნიშვნელოვანი ცნების ირგვლივ, რასაც უსაზღვრო შესაძლებლობები ჰქვია – კომპანია ქმნის სივრცეებს და შესაძლებლობებს, რომ ადამიანებმა მონახონ საკუთარი რეალიზებისთვის იმპულსი. ნებისმიერ ადამიანს შეუქმნა შესაძლებლობა, იპოვოს საკუთარი თავი – სწორედ ამას ნიშნავს ყველაზე მარტივად და გასაგებად კორპორაციული სოციალური პასუხისმგებლობა.
საქართველოს ბანკის მიერ განხორციელებული პროექტების სულ მცირე ჩამონათვალიც (საერთო ჯამში 120-ზე მეტი პროექტი) და მასშტაბიც საკმარისია იმის გასაგებად, თუ რატომ დაიმსახურა კომპანიამ ეს პრიზი. ეს არაა უბრალო სტატუსი: იმ ფაქტს, რომ ქართული ფინანსური ინსტიტუტი საერთაშორისო ასპარეზზეც აღიარეს, როგორც მაღალი კორპორაციული სოციალური პასუხისმგებლობის მქონე, ამას თავისი ლოგიკა აქვს.
120-ზე მეტი პროექტიდან განათლების მიმართულებას, რომელიც უშუალოდ ქვეყნისთვის ყველაზე პრიორიტეტული და მნიშვნელოვანია, 40 პროექტი ეთმობა, ბენეფიციარების რაოდენობა კი 120 000-ს აჭარბებს – ახალგაზრდები, მათ შორის მაღალმთიან, საზღვრისპირა თუ ეთნიკური უმცირესობებით დასახლებულ რეგიონებში მცხოვრები მოსწავლეები და სტუდენტები სხვადასხვა პროექტში ჩართულობით დამატებით შესაძლებლობას იღებენ, რომ ისწავლონ და იპოვონ საკუთარი საქმე, საკუთარი თავი და თვითრწმენა, რომ შესაძლებლობები უსაზღვროა.
იდეათეკა
ესაა მრავალფუნქციური ბიბლიოთეკა, რომელიც უკვე საქართველოს 8 რეგიონის 20 სკოლაში ფუნქციონირებს და 10 000-ზე მეტ მოსწავლეს აძლევს თანამედროვე საგანმანათლებლო რესურსებზე წვდომას. იმავე სივრცეებში შექმნილია STEM კუთხეები, რომლებიც მოსწავლეებს STEM [მეცნიერება, ტექნოლოგია, ინჟინერია, მათემატიკა] მიმართულებით საბაზისო ცოდნის შესაძლებლობას სთავაზობს.
სასტიპენდიო პროგრამები
საქართველოს ბანკის მხარდაჭერით, 3 საერთაშორისო სასტიპენდიო პროგრამა ხორციელდება – Chevening, Fulbright და ნიკა გუჯეჯიანის სახელობის სტიპენდია Miami Ad School Europe-ში, სასტიპენდიო პროგრამები ქართველ ახალგაზრდებს დასავლური განათლების შესაძლებლობას აძლევს – ევროპისა და აშშ-ის წამყვანი უნივერსიტეტები საქართველოდან უკვე 50-მდე სტუდენტს მასპინძლობენ და მომავალშიც ელიან სხვებს.
2023 წელს საბაკალავრო საფეხურის სტუდენტებისთვის შეიქმნა საქართველოს ბანკის სტიპენდია – 15 პარტნიორ უნივერსიტეტში, სადაც ნიჭიერ ახალგაზრდებს სწავლის 100%-იანი ან ნაწილობრივი დაფინანსების მიღების შესაძლებლობა აქვთ. ახალი პროექტი განგრძობითია და მომავალშიც მრავალი ახალგაზრდის განათლებას დაუჭერს მხარს.
საგანმანათლებლო ოლიმპიადები
საქართველოს ბანკი მხარს უჭერს და აფინანსებს სხვადასხვა ოლიმპიადას, განათლების ფესტივალს, ჰაკათონსა თუ გამოფენას. წელს GELi-ის ინიციატივითა და ბანკის მხარდაჭერით, ქვეყანაში პირველი ეკონომიკური ოლიმპიადა გაიმართა – მონაწილეობდა 291 სკოლის 1300-მდე მოსწავლე. საგანმანათლებლო ოლიმპიადებზე რეგისტრირებული მოსწავლეების რაოდენობით, საქართველო მთლიანი ქვეყნის მონაცემებით, რეგიონში ლიდერია, რაც ნიშნავს იმას, რომ მოსწავლეებში არსებობს სწავლის მოტივაცია და ქვეყანაში არსებობს ამ მოტივაციის რეალიზებისთვის საჭირო პროექტები.
იდეათეკა, სასტიპენდიო პროგრამები თუ საგანმანათლებლო ოლიმპიადები არასრული ჩამონათვალია იმ პროექტებისა, რომელსაც საქართველოს ბანკი სხვადასხვა პარტნიორებთან ერთად ახორციელებს.
ქვეყანაში საუკეთესო კორპორაციული სოციალური პასუხისმგებლობის მქონე ფინანსური კომპანიის, საქართველოს ბანკის სხვა პროექტების შესახებ – გაიგეთ მეტი.