კინგსის ოლიმპიადის 2023 წლის შემოდგომის სეზონი დასრულდა. კინგსი საქართველოში ყველაზე მასშტაბური ოლიმპიადაა, რომელიც ყველა მოსწავლეს საქართველოს სხვადასხვა კუთხიდან საკუთარი ცოდნის შეფასების, გამოვლენისა და განვითარების საშუალებას აძლევს. ოლიმპიადის მთავარი პარტნიორი საქართველოს ბანკია, რადგან კინგსის მსგავსად საქართველოს ბანკის მიზანი მოსწავლეების წახალისება და მოტივირებაა.
საქართველოს ბანკი სხვადასხვა პროექტით ყოველთვის ცდილობს განათლების სფეროში არსებული სოციალური თუ გეოგრაფიული ბარიერები დაძლიოს. წელს სოციალურად დაუცველ მოსწავლეებს ოლიმპიადის ფინალში მონაწილეობის საფასური სრულიად დაუფინანსდათ, sCool Card-ის მფლობელ ნებისმიერ კინგსელს კი 20%-იანი ფასდაკლებით შეეძლო ესარგებლა. გარდა ამისა, საქართველოს ბანკმა ყველა მონაწილეს ხელოვნურ ინტელექტზე შექმნილი საგანმანათლებლო პლატფორმის, ლუპის, ერთთვიანი პაკეტი უფასოდ გადასცა.
კინგსის ოლიმპიადა წელს სამ საგანში ჩატარდა: ქართულში, მათემატიკასა და ინგლისურ ენაში. ოლიმპიადაზე რეგისტრაცია შეეძლო ყველა მოსწავლეს II-დან XII კლასის ჩათვლით. ტესტირებები კი საქართველოს 12 დიდ ქალაქში ჩატარდა: თბილისი, რუსთავი, ქუთაისი, ბათუმი, ზუგდიდი, გორი, თელავი, ახალციხე, ზესტაფონი,ოზურგეთი, სამტრედია, ფოთი. ოლიმპიადებზე გამოცხადებული მოსწავლეების რაოდენობა ასე გამოიყურება:
- ინგლისური ენა – 12 894;
- ქართული ენა – 13 819;
- მათემატიკა – 22 118.
საბოლოოდ, მონაწილეების 40.18% თბილისიდან, ხოლო 59.82% რეგიონებიდან იყვნენ.
თითოეულ საგანში ოლიმპიადა ორი ტურისაგან შედგება, პირველი ტურის ტესტები მეტწილად ეყრდნობა სასკოლო მასალებს, ხოლო ფინალური ტესტები ორიენტირებულია კრიტიკული აზროვნებისა და ცოდნის ინტერპრეტირების უნარებზე. გამარჯვებულების გამოსავლენად ფინალიც არ აღმოჩნდა საკმარისი, რადგან ბევრმა მოსწავლემ დაიმსახურა ტესტირებაში უმაღლესი ქულა. სამივე საგანში ჩატარდა სუპერფინალები, როგორც კინგსის მარკეტინგის მენეჯერი, სოფო სრესელი, გვეუბნება, სუპერფინალები თითქმის ყოველ წელს ტარდება, რაც ოლიმპიადას უფრო საინტერესოს ხდის, სუპერფინალების საჭიროება ნიშნავს, რომ მოსწავლეებს არ უჭირთ თავი გაართვან სააზროვნო დავალებებს.
სუპერფინალების ბოლოს თითოეული საგნის ყველა საკლასო კატეგორიაში ჯამში 90 გამარჯვებული გამოვლინდა. გამარჯვებულების 64% დედაქალაქის სხვადასხვა სკოლის, ხოლო 36% რეგიონის სკოლების მოსწავლეები არიან. სუპერგამარჯვებულიც სწორედ რეგიონიდან არის, რომელმაც შეძლო სამივე საგანში ჯამურად ყველაზე მაღალი ქულის დაგროვება. სასიხარულოა, რომ წელს გამარჯვებულები საქართველოს თითქმის ყველა კუთხიდან გვყავს. გამარჯვებულები გაემგზავრნენ კინგსის ბანაკში, ბაკურიანში, სადაც სასიამოვნოდ დატვირთული, საინტერესო და მხიარული 4 დღე გაატარეს.
კინგსი სამომავლოდ გეგმავს სასწავლო პლატფორმების განვითარებას და წარმატებული მოსწავლეების საერთაშორისო პროექტებში ჩართვას. კინგსის აკადემია, რომელმაც პანდემიის პერიოდში ვირტუალურ სივრცეში გადაინაცვლა, ეტაპობრივად უბრუნდება ფიზიკურ სივრცეს. აკადემიას ჰყავს ახალი მასწავლებლები, რომლებიც მათემატიკას, ინგლისურს და ციფრულ მარკეტინგს შეასწავლიან მოსწავლეებს. კინგსი საშუალებას აძლევს ქართველ მოსწავლეებს ჩაერთონ საერთაშორისო ოლიმპიადებში, გაზაფხულის სეზონზე წარმატებულ მონაწილეებს შესაძლებლობა ექნებათ, გაემგზავრონ ლიეტუვაში და იქაურ მოსწავლეებთან გამოცადონ თავიანთი ცოდნა.
ოლიმპიადის ახალი სეზონი თებერვლის ბოლოს დაიწყება. კინგსელებს კი წინ კიდევ ბევრი თავგადასავალი, გამოწვევები და საინტერესო ამბები ელით.