ზოგჯერ არც კი ვიცით, რომ რაღაც განსაკუთრებული ნიჭი გვაქვს, სანამ შემთხვევით არ აღმოვაჩენთ ჩვენში ახალ უნარებს. ძიების პროცესში კი ხშირად გამოწვევები გვეხმარება.
ინგლისურ ენაზე მოლაპარაკეთა კავშირი (The English-Speaking Union – ESU) 1918 წელს დაარსდა ინგლისური ენის პოპულარიზაციისა და სხვადასხვა ერებს შორის მეგობრული ურთიერთობების დამყარების მიზნით. ESU ამ მისიის ფარგლებში ბევრ საინტერესო პროექტს ახორციელებს, მათ შორის გამოირჩევა საჯარო მეტყველების კონკურსი, რომელიც საქართველოში ყოველწლიურად ტარდება, გამარჯვებული კი დიდ ბრიტანეთში მიემგზავრება.
გამოცდილება, რომელიც ყოველდღიურ ცხოვრებაში გამოგადგება
საჯარო მეტყველების უნარი არ არის მხოლოდ პოლიტიკოსებისა და პროფესიონალი ორატორების პრივილეგია. მსგავსი გამოცდილება ხშირად გვეხმარება ყოველდღიურ ცხოვრებაში – იქნება ეს სოციალური ურთიერთობების დახვეწა, პროფესიული უნარების გამომუშავება, საკუთარი შიშების გადალახვა თუ ახალი ენის სიღრმისეულად შესწავლა. სწორედ ამ შესაძლებლობას უსვამს ხაზს ბაჩო უგრეხელიძეც, რომელიც კონკურსის შარშანდელი გამარჯვებულია.
„უნივერსიტეტში ინგლისურ ფილოლოგიას და ფილოსოფიას ვსწავლობ, სამომავლოდაც ვგეგმავ, რომ ინგლისური ლიტერატურის ლექტორი და პროფესორ-მკვლევარი გავხდე. ჩემს პროფესიაში კარგი საჯარო მეტყველება აუცილებელია, სწორედ ამიტომ გადავწყვიტე კონკურსში მონაწილეობაც. როგორი საინტერესოც არ უნდა იყოს სალექციო თემა, აუცილებელია, რომ მისი სწორად გადმოცემა შეძლო და აუდიტორიას არ მოსწყინდეს შენი მოსმენა.“
კონკურსში გამარჯვება და მოგზაურობა ინგლისში
ბაჩომ კონკურსში მონაწილეობა პირველად 2023 წელს მიიღო, სადაც მეორე ადგილი დაიკავა. მიღებული გამოცდილებისა და შეცდომების გაანალიზების წყალობით, მან მეორე მცდელობაზე გამარჯვება შეძლო და დიდ ბრიტანეთში გაემგზავრა. თავისი გამოცდილებით ბაჩო გვიზიარებს იმ კრიტერიუმებს, რომლებსაც, მისი აზრით, ჟიური ყველაზე მეტ ყურადღებას აქცევს შეფასებისას.
,,ჟიურის წევრებს ბევრ სხვადასხვა კრიტერიუმი აქვთ – პირველ რიგში, რა თქმა უნდა, დახვეწილი მეტყველება. გარდა ამისა, თავდაჯერებულობა, ჟესტიკულაცია, ზოგადი განათლება, თემის შინაარსი და სტრუქტურა. საბოლოო ეტაპზე, რომელიც ინგლისში იმართება, კონკურენცია გაცილებით მაღალია, რადგან იქ თავიანთ ქვეყნებში გამარჯვებული საუკეთესო მონაწილეები იკრიბებიან. დაძაბულობის მიუხედავად, მაინც არ იყო სტრესული გარემო, რადგან ძალიან კარგად დაგვხვდნენ – დაგვათვალიერებინეს ბევრი საინტერესო ადგილი და საბოლოო ჯამში, კონკურსის პარალელურად ძალიან სასიამოვნო დრო გავატარეთ.”
ინდივიდუალობა, როგორც მთავარი იარაღი
ყველა ადამიანი განსხვავებულია, შესაბამისად, მრავალფეროვანი და თავისებურია მათი გამოსვლის სტილიც. როგორც ბაჩო აღნიშნავს, სწორედ ამ ინდივიდუალობას ეძებენ ჟიურის წევრებიც მონაწილეებში.
,,ყველაზე მნიშვნელოვანი რჩევა, რაც შემიძლია სხვა მონაწილეებს მივცე, არის ის, რომ მაქსიმალურად ავთენტურები და გულწრფელები იყვნენ. ჟიური ამას ყოველთვის აკვირდება და სიყალბესაც ადვილად ამჩნევს. ყველაზე ეფექტურია, რომ შენი საკუთარი სტილი იპოვო და კონკურსში მოცემული თემები პირად ინტერესებს დაუკავშირო. როცა გეტყობა, რომ შენ თვითონ გაინტერესებს რაზეც ლაპარაკობ, ეს თემა მით უფრო დააინტერესებს და ჩაითრევს მსმენელსაც.”
კონკურსის დეტალები
კონკურსი სამი ეტაპისგან შედგება. პირველ ტურში მონაწილეები წინასწარ მოცემულ თემაზე ამზადებენ ხუთწუთიან პრეზენტაციას. მეორე ეტაპზე გამოსვლას ემატება იმპროვიზაციული ტური. ხოლო ფინალურ ტურში კონკურსანტის გამოსვლას ბრიტანეთის ელჩი, სამინისტროს წარმომადგენლები და სხვა საპატიო სტუმრები აფასებენ.
საქართველოს ბანკის მხარდაჭერით, ESU-GEORGIA წელსაც აცხადებს კონკურსს საჯარო მეტყველებაში, სადაც მონაწილეობის მიღება 16-დან 20 წლამდე ასაკის ახალგაზრდებს შეეძლებათ. დამატებითი დეტალები შეგიძლიათ British corner-ის ვებგვერდზე იხილოთ ან დაუკავშირდეთ მეილზე – britishcornerbc@gmail.com