“ნებისმიერი ადგილიდან შეგიძლიათ დიდ წარმატებას მიაღწიოთ” – ინტერვიუ მასწავლებლების ჯილდოს ათეულის წევრ ნუკრი კარკაძესთან

პატარა სოფელში ცხოვრობ თუ დიდ ქალაქში, ბევრი რესურსი გაქვს თუ ცოტა, ყველაზე პოპულარულ საგანს ასწავლი თუ ზოგისთვის უმნიშვნელოს, თუ დაუღალავად შრომობ და შენი საქმე გიყვარს, ნებისმიერი ადგილიდან შეგიძლია წარმატებას მიაღწიო – სწორედ ამის მაგალითია პედაგოგი ბაღდათიდან, ნუკრი კარკაძე. ის პირველი მუსიკის მასწავლებელია, რომელიც მასწავლებლის ეროვნული ჯილდოს საუკეთესო ათეულში მოხვდა.

იმ მასწავლებლების გამოსავლენად, რომლებსაც განათლების სფეროში განსაკუთრებული წვლილი შეაქვთ, ეს კონკურსი წელს მეცხრედ ხორციელდება. პროექტის მთავარი მხარდამჭერი საქართველოს ბანკია.  ინიციატივა გლობალური კამპანიის – „The Global Teacher Prize“-ის ნაწილია, რომლის მიზანიც მასწავლებლების პროფესიის პოპულარიზაციაა.

კონკურსში მონაწილეობის მისაღებად ნებისმიერ ადამიანს შესაძლებლობა აქვს 30 მაისის ჩათვლით ნომინირება გაუწიოს მასწავლებლებს ან თავად შეავსოს აპლიკაცია ვებგვერდზე www.tprize.ge.

„როდესაც მე საჯარო სკოლაში მივედი მუსიკა აღიქმებოდა, როგორც სხვადასხვა თემატური საღამოების გაფორმების საშუალება. მიზნად დავისახე, რომ საგნად მექცია… ყველაზე მეტად გამიხარდა, როცა 2024 წელს პირველად გაჟღერდა მუსიკის მასწავლებლის სახელი ასეთ დიდ ჯილდოზე და მოტივაციად იქცა ჩემი კოლეგებისთვის“, – ამბობს ნუკრი კარკაძე და გვიყვება, როგორ შეცვალა ეროვნულმა ჯილდომ მისი ცხოვრება.

ნუკრი კარკაძე არის პოეტი, ავტორ–შემსრულებელი, ფილოლოგიის დოქტორი, მუსიკას ასწავლის ბაღდათის პირველ და როკითის საჯარო სკოლებში. შექმნილი აქვს მუსიკალური სასწავლო თამაშები და არაფორმალური განათლების კუთხით 100 მუსიკალური რესურსი, დაარსებული აქვს რეგიონული ფესტივალები,  2022 „ბაღდათის წლის ადამიანადაც“ დასახელდა, თუმცა მასწავლებლის ეროვნულ ჯილდოს მის ცხოვრებაში მაინც განსაკუთრებულად გამორჩეული ადგილი უჭირავს.

„მასწავლებლის ეროვნულმა ჯილდომ მთლიანად შეცვალა ჩემი ცხოვრება. იმ დღეს, როდესაც საგანმანათლებლო სისტემაში შეტანილი წვლილისთვის სპეციალური პრიზით დავჯილდოვდი, მივხვდი, ალბათ ამ სიტყვებისთვის ღირდა ცხოვრება“, – იხსენებს ნუკრი კარკაძე.

როგორც გვიყვება, მასწავლებლის ეროვნულ ჯილდოზე დაარსების დღიდან იცოდა, მუდმივად თვალს ადევნებდა და აკვირდებოდა, ვის ირჩევდა ჟიური, მაგრამ ვერ ბედავდა მონაწილეობის მიღებას. მოტივაცია, სხვა პედაგოგების მსგავსად, მასაც საკუთარმა მოსწავლემ მისცა:

„რომ გითხრათ, რომ ველოდი ათეულში მოვხვდებოდი – არა, მიმაჩნდა, რომ გასაკეთებელი კიდევ ძალიან ბევრი მაქვს და ჩემზე მაგარი მუსიკის მასწავლებლები ჰყავს ამ ქვეყანას, თუნდაც ჩემი პედაგოგი, რომელიც 87 წლისაა და დღემდე ეწევა პედაგოგიურ საქმიანობას. როგორ ვიფიქრებდი, რომ მის წინ დავმდგარიყავი და მონაწილეობა მიმეღო, მაგრამ კონკურსში როკითის საჯარო სკოლიდან ჩემმა მოსწავლემ წარმადგინა. ამას შემდეგ ისეთი აქტიურობა მოჰყვა, წარდგენები ბავშვების, კოლეგების მხრიდან, ამ პროცესშ მთელი რაიონი ჩაერთო, ახლაც კი მერიდება და მაჟრიალებს“.

პირადი გამოცდილებიდან გამომდინარე, სხვა მასწავლებლებსაც ურჩევს, არ დაკარგონ დრო და აუცილებლად შეავსონ აპლიკაცია. ნუკრი კარკაძის თქმით, შეიძლება ერთი კონკრეტული პროექტი გახდეს მათთვის დიდი წარმატების მომტანი.

„ეს განცდა, რომ მე ჯერ რა გავაკეთე, მე ჯერ რა შევქმენი, ეს ბარიერი უნდა გადავლახოთ. ვმუშაობ, რომ ეს  გავაქრო მასწავლებლებში. ჩემზე მაგარ პროექტებს აკეთებენ და როგორ შეიძლება, რომ ისინი არ გაიცნოს ქვეყანამ ისე, როგორც იმსახურებენ… ეროვნულმა ჯილდომ მომცა ძალა და იმედი. ჩემთვის, როგორც მუსიკის მასწავლებლისთვის, უმნიშვნელოვანესია საჯარო სკოლებში ამ საგნის პოპულარიზაცია. ზოგადად, მასწავლებლებისთვის, ეს არის უმნიშვნელოვანესი პროექტი, რადგან საკუთარი შესაძლებლობების, მიდგომების, თუნდაც შეცდომების სხვა თვალით გადახედვა ხდება. მოსწავლის თვალითაც ხედავ, როგორი მასწავლებელი ხარ,  მასწავლებლის შრომა ფასდება“, – ამბობს ნუკრი კარკაძე.

როგორც ის აღნიშნავს, ათეულთა კლუბი ერთი დიდი ოჯახია, რომელიც თითოეულ მასწავლებელს უდგას გვერდით და აძლიერებს. ამ კლუბში მოხვედრით პედაგოგებს არაერთ საინტერესო პროექტში ჩართვის, ინფორმაციის გაზიარებისა და ახალი გამოცდილების მიღების შესაძლებლობა ექნებათ.

სოფელ როკითის ერთ-ერთი გამოწვევა მიგრაციაა. ნუკრი კარკაძე მოსწავლეებს მუდმივად არწმუნებდა, რომ წარმატების მიღწევა ნებისმიერი ადგილიდან შეეძლოთ და არ დაეტოვებინათ სოფელი. მთავარი, რაც მას მასწავლებლის ეროვნულმა ჯილდომ მოუტანა, ამ იმედის გამართლებაა:

„მიგრაცია იყო საშინელი, მე ბავშვებს ვაჯერებდი, რომ აქედანაც შესაძლებელია დიდი წარმატების მიღწევა. თან ვფიქრობდი, ამას კი ვეუბნები ამ ბავშვებს, მაგრამ მე, მუსიკის მასწავლებელს, რა ძალა მაქვს ისეთი, რა იმედით ვეუბნები, რომ ბავშვები აქ გაჩერდით, აქედან მიაღწიეთ წარმატებას?! სწორედ ამ პროექტებმა მომცა ძალიან დიდი იმედი, რომ გამართლდა ჩემი სიტყვები. მეთორმეტეკლასელმა მოსწავლემ მითხრა, ნუკრი მასწავლებელო, რომ გვეუბნებოდით აქედან შესაძლებელია წარმატების მიღწევაო, თქვენ იქეცით მაგალითადო. შარშან არ ჰყავდა პირველკლასელი ამ საუკუნოვან სკოლას, პირველად მოხდა ასეთი რამ და ჩემი მესამე შვილი იქცა იმ წლის გამაგრძელებლად. რომ შეხედეს, ჩემი ბავშვი შევიდა ამ სკოლაში,  სხვა ადამიანებმაც მომბაძეს და ქალაქში გადაყვანილი ბავშვები უკან წამოიყვანეს. ეს ძალიან დიდი იმედია.  ის ეროვნულ ჯილდოზე იყო, აქედან შეძლო, სოფლიდან შეძლო, ამას ხშირად იმეორებს უკვე მოსახლეობაც და ეს იმედი რომ გამიმართლდა, მარტო ამისთვისაც კი მადლიერი ვარ ამ ჯილდოსი“.

ინფორმაციისთვის, მასწავლებლის ეროვნული ჯილდო საქართველოში 2017 წლის 13 მაისს დაწესდა. ინიციატივა გლობალური კამპანიის – „The Global Teacher Prize“-ის ნაწილია, რომლის მიზანიც მასწავლებლების პროფესიის პოპულარიზაციაა. მასწავლებლის ეროვნული ჯილდოს მხარდამჭერები არიან: გენერალური სპონსორი – გუდავაძე-პატარკაციშვილის ფონდი; მთავარი მხარდამჭერი – საქართველოს ბანკი.