მასწავლებელი ბავშვებს წარმატებისკენ მიმავალ გზაზე პირველი ნაბიჯების გადადგმაში ეხმარება, ძერწავს მათ უნარებს, უზიარებს ცოდნას და მათ სრულფასოვან მოქალაქეებად ჩამოყალიბებას უწყობს ხელს. წარმატებული და განათლებული თაობა კი ქვეყნის უკეთეს მომავალს ქმნის.
ჩვენ ხშირად ვსაუბრობთ მოსწავლეებისთვის მოტივაციის ამაღლებაზე, მათი სასწავლო გარემოს გაუმჯობესებაზე, სხვადასხვა მეთოდებით სწავლებაზე, თუმცა იშვიათად გვახსენდება, რომ მოტივაცია და მხარდაჭერა მასწავლებლებსაც სჭირდებათ.
მეცხრე წელია, მასწავლებლის ეროვნული ჯილდო გლობალური ინიციატივის „Global Teacher Prize“- ის ფარგლებში ტარდება და მიზნად ისახავს გამორჩეული მასწავლებლების გამოვლენას, მათი შრომის დაფასებას და აღნიშნული პროფესიის პოპულარიზაციას. პროექტის მთავარი მხარდამჭერი საქართველოს ბანკია.
სტატიაში კონკურსის შესახებ პირად გამოცდილებას ხათუნა ნოზაძე გვიზიარებს, რომელიც 15 წელზე მეტია ქიმიას ასწავლის.
როგორც გვიყვება, მასწავლებლის ეროვნული ჯილდო მისთვის ყოველთვის პრესტიჟული კონკურსი იყო, მონაწილეობის მიღებას კი იქამდე ვერ ბედავდა, სანამ ელექტრონულ ფოსტაზე მოულოდნელად შეტყობინება არ მიიღო:
„2022 წელს მეილზე მომდის შეტყობინება, რომ წარმადგინეს მასწავლებლის ეროვნულ ჯილდოზე. იმდენად ემოციური იყო, ამ დროს ვიმყოფებოდი ტრანსპორტში და ვერ შევიკავე ცრემლები, მახსოვს მგზავრების გაოცებული სახეები, ახლაც ძალიან მეტირება…“
ქიმია ერთ-ერთ რთულ საგნად მიიჩნევა, დაფაზე დაწერილი ფორმულები მოსწავლეებშიც ნაკლებ ინტერესს იწვევს. ხათუნა ნოზაძესაც ახსოვდა ბავშვობის ეს გამოცდილება, ამიტომ მისთვის პრიორიტეტი პრაქტიკაში სწავლება გახდა – მოსწავლეების ყოველდღიური ცხოვრებიდან სხვადასხვა მაგალითებს იღებს და მათ მეცნიერებით აჯერებს, გაკვეთილებს ღია სივრცეში, სტადიონზე, მუზეუმში ატარებს, და იყენებს თამაშით სწავლების მეთოდს.
„საგანი ქიმია არის გზა ადამიანის საქმიანობის ნებისმიერი სფეროსკენ – იქნება ეს მედიცინა, კვება, სამზარეულოს ქიმია, მშენებლობა, კოსმეტიკა და ასე შემდეგ. მე მეჭირა ხელში ძალიან კარგი იარაღი ცოდნის მიმართულებით, რომ ეს საგანი მექცია ყველაზე საყვარელ საგნად ჩემი მოსწავლეებისთვის“, – ამბობს ის.
ხათუნა ნოზაძე აღნიშნავს, რომ მუდმივად ცდილობს მოსწავლეებს სწორი მოქალაქეობრივი ღირებულებები ჩამოუყალიბოს. ისინი ხშირად სტუმრობენ სმენისა და მეტყველების დარღვევის მქონე მოსწავლეებს, მიაქვთ სხვადასხვა თვალსაჩინოებები და ექსპერიმენტები, ბავშვები ასევე ეხმარებიან მოხუცთა თავშესაფარს. „ტელესკოლის“ ფარგლებში ჩატარებული მისი გაკვეთილები კი იყო რესურსი ნებისმიერი სკოლისთვის სოფელში თუ ქალაქში.
„მასწავლებლის ეროვნულმა ჯილდომ იმაზე მეტი მომცა, ვიდრე სიტყვა ჯილდო იტევს. დააფასეს თუ რამეს ვაკეთებდი – არა მარტო საგაკვეთილო პროცესი, არა მარტო ქიმიის მიმართულებით, არამედ ის მოქალაქეობრივი ღირებულებები, რაც ჩემ მოსწავლეებში ჩავდე“ – გვიყვება ხათუნა ნოზაძე და იხსენებს, რომ აპლიკაციის შევსებისას აღმოაჩინა, რომ არაერთი საინტერესო პროექტი ჰქონდა განხორციელებული, როგორც საქართველოს მასშტაბით, ისე მის ფარგლებს გარეთ.
კონკურსში მონაწილეობის მსურველებს 30 მაისის ჩათვლით შეუძლიათ აპლიკაციის შევსება ვებგვერდზე – tprize.ge. გარდა ამისა, ნებისმიერ ადამიანს, ორგანიზაციებს თუ საზოგადოებრივ ჯგუფებს შეუძლიათ კონკურსზე მასწავლებლები წარადგინონ.
„მასწავლებლის ვურჩევდი, შეავსონ აპლიკაცია, იყვნენ უფრო თამამები. აპლიკაციის შევსების დროს თავი მოვუყარე 16-წლიან მუშაობს, დავინახე არა მარტო ჩემს მოსწავლეებთან და გუნდთან ერთად გაკეთებული საქმეები, არამედ რა შეიძლება კიდევ გავაკეთოთ, განვითარების ახალი შესაძლებლობები“, – აღნიშნავს ხათუნა ნოზაძე.
მისი თქმით, ათეულთა კლუბის წევრობა ყველა პედაგოგს აძლევს განვითარების, საკუთარი გამოცდილების გაზიარებისა და ქვეყნის მასშტაბით საუკეთესო პედაგოგების პრაქტიკის გაცნობის საშუალებას:
„ჩვენ საკმაოდ ხშირად ვიკრიბებით, ვუზიარებთ ერთმანეთს საკუთარ გამოცდილებას. განვითარება და განათლება არ არის მხოლოდ ერთი კონკრეტული ვიწრო სპეციალობა, ეს არის მთელი ნაკრები, რომელსაც სხვა ადამიანებისგან იღებ. ათეულთა კლუბში მე გავიცანი საქართველოს მასწავლებლების საუკეთესო გუნდი და ბევრი რამ ვისწავლე მათგან. ეს მეხმარება ვიყო კიდევ უფრო საინტერესო ჩემი მოსწავლეებისთვის. როცა მოსწავლე ხედავს, რომ მისი მასწავლებელი ვითარდება და წარმატებულია, ეს მაგალითია მისთვის. ძალიან სჭირდება ქვეყანას, რომ ჰყავდეს ამ დონის მასწავლებლები, რომელთაგანაც სხვები კიდევ მეტს ვისწავლით“.
როგორც ის გვიყვება, მასწავლებლის ეროვნული ჯილდოს ათეულში მოხვედრამ ძალა და ენერგია მისცა, რომ კიდევ უფრო მეტი გააკეთოს მომავალი თაობისთვის და ქვეყნისთვის, ასევე, ამ აღიარებამ მოუტანა პასუხისმგებლობაც, რომ განათლების გზაზე არ გაჩერდეს.
„მე ვთვლი რომ მასწავლებელს ძალიან დიდი მხარდაჭერა სჭირდება, იმიტომ რომ მათ უმეტესობას საქართველოში არ აქვს რესურსი, ამიტომ საკუთარი ხელით ქმნიან მას და ძალიან ბევრი მასწავლებელი თავჩაღუნული, ჩუმად, დიდი თავდადებით მუშაობს მათი მოსწავლეების წარმატებისკენ მიმავალი გზის გასაკვალად და ეს მარტო საგაკვეთილო პროცესში არ ხდება, ეს წლობით მიმდინარეობს. ჩვენ ვმეგობრობთ ჩვენ მოსწავლეებთან და სკოლის მერეც გრძელდება ურთიერთობები. ძალიან მინდა დაფასებული იყოს ნებისმიერი მასწავლებლის შრომა. მხარდაჭერა ძალიან მნიშვნელოვანია ჩვენი ქვეყნის უკეთესი მომავლისთვის“, – ამბობს ის.
ხათუნა ნოზაძეს თავადაც რამდენიმე მასწავლებელი ჰყავს წარდგენილი წლევანდელ კონკურსზე და სხვებსაც მოუწოდებს, არ დაიზარონ, გააცნონ საზოგადოებას გამორჩეული პედაგოგები, რადგან „ამ წარმატების უკან ჩვენი მომავალი თაობის წარმატება იშლება, მოტივირებული ადამიანი კიდევ უფრო უკეთეს მომავალს ქმნის ჩვენი ქვეყნისთვის“.
ინფორმაციისთვის, მასწავლებლის ეროვნული ჯილდო საქართველოში 2017 წლის 13 მაისს დაწესდა. ინიციატივა გლობალური კამპანიის – „The Global Teacher Prize“-ის ნაწილია, რომლის მიზანიც მასწავლებლების პროფესიის პოპულარიზაციაა. მასწავლებლის ეროვნული ჯილდოს მხარდამჭერები არიან: მთავარი მხარდამჭერი – საქართველოს ბანკი; გენერალური სპონსორი – გუდავაძე-პატარკაციშვილის ფონდი.