მასწავლებლის ეროვნული ჯილდო, რომელიც 2017 წელს დაარსდა, არა მხოლოდ ცალკეული მასწავლებლების მიღწევების დაფასებას ისახავს მიზნად, არამედ განათლების სფეროში ჩართულ ადამიანებს პროფესიული გამოცდილების გაზიარებას საშუალებასაც აძლევს – კონკურსის მეშვეობით, მასწავლებლები უკეთ იცნობენ ერთმენეთს, უზიარებენ კოლეგებს საკუთარ აღმოჩენებს, ცოდნასა და სწავლის მეთოდებს. პროექტის მთავარი მხარდამჭერი საქართველოს ბანკია.
მიხეილ ლაბარტყავა სწორედ ერთ-ერთი გამორჩეული პედაგოგი და მასწავლებლის ეროვნული ჯილდოს ათეულთა კლუბის წევრია. მისი საქმიანობა მხოლოდ პედაგოგობით არ შემოიფარგლება და მრავალფეროვან პროფესიულ მიღწევებს მოიცავს. ის ერთდროულად არის გამოცდილი მკვლევარ-მეცნიერი, უნივერსიტეტის ასოცირებული პროფესორი, USAID-ის ექსპერტი და მრავალი კვლევითი პროექტისა და ინიციატივის აქტიური მონაწილე. ამ ყველაფერთან ერთად, მისი მთავარი ინტერესი მაინც მოსწავლეებთან ურთიერთობაა და სკოლაში ქიმიის პედაგოგადაც მუშაობს.
ცოდნის გაზიარება
ბატონ მიხეილს ბავშობაში ძალიან კარგი ქიმიის მასწავლებლები ჰყავდა. სწორედ მათ შეაყვარეს ეს საგანი იმდენად, რომ საბოლოოდ მთელი ცხოვრება ქიმიას მიუძღვნა. წლების შემდეგ მიხეილი უკვე თავად ცდილობს ქიმიის განსაკუთრებული მნიშვნელობა თავის მოსწავლეებს გაუზიაროს. სკოლაში მისი და მისი მოსწავლეების ინიციატივით, დამატებით საკვირაო გაკვეთილებსაც ატარებენ. ასევე, აქტიურად მონაწილეობენ სხვადასხვა სამეცნიერო კონკურსებში, სადაც ხშირად პირველი ადგილიც დაუმსახურებიათ.
ამჟამად მისი ყოფილი მოსწავლეები სხვადასხვა ქვეყნებში, პრესტიჟულ უნივერსიტეტებში აგრძელებენ სწავლას. მიხეილ ლაბარტყავასთვის, როგორც მასწავლებლისთვის, მთავარი სიხარულიც სწორედ ესაა – იმის დანახვა, რომ მისი მოსწავლეები ქიმიის მიმართულებით ირჩევენ პროფესიას და წარმატებულ კარიერას იწყობენ.
,,ქიმია ერთ-ერთი ისეთი მეცნიერებაა, რომელიც ბავშვის ცნობისმოყვარეობას აბსოლუტურად აკმაყოფილებს. ამჟამად ჩვენს სკოლაში ოთხი კვლევითი ჯგუფია შექმნილი, სადაც ყველას ცალ-ცალკე სამუშაო აქვს განაწილებული. მასალა, რომელსაც ისინი დამატებით გაკვეთილებზე გადიან, სასკოლო პროგრამას ემთხვევა. ბავშვებს ძალიან აინტერესებთ ეს ყველაფერი და იმდენად არიან ჩართული პროცესში, რომ საბოლოოდ კედლის გაზეთიც კი გამოვუშვით – ,,ყოველდღიური ქიმია”. გაზეთი, რომელიც თვეში ორჯერ გამოვა შეეხება ისეთ თემებს, რომლებიც ბავშვებს უკეთ დაანახებს ქიმიის მნიშვნელობას ყოველდღიურ ცხოვრებაში.“
რატომ არის ქიმია მნიშნელოვანი
ხშირად ბავშვები ბოლომდე ვერ ხვდებიან ქიმიის საჭიროებას, შესაბამისად, მეტად უსარგებლო და უინტერესო საგნადაც კი მიაჩნიათ ის. როგორც ბატონი მიხეილი აღნიშნავს, თანამედროვე სამყაროში ჩვენ ქიმიურ გარემოში ვცხოვრობთ, სადაც შეუძლებელია გვერდი აუარო მას. ქიმიას შეუძლია ბევრი სარგებელიც მოგვიტანოს და ამასთანავე, უარყოფითი გავლენაც იქონიოს ჩვენზე. იმისთვის, რომ ბავშვებმა მეტად გააცნობიერონ როგორც ქიმიის, ისე ფიზიკის ბიოლოგიის და სხვა სამეცნიერო დარგების მნიშვნელობა, აუცილებელია, რომ საგანი მეტად ხელშესახები და პრაქტიკული გახდეს. მიხეილის გაკვეთილებიც სწორედ ამ მიზანს ემსახურება.
,,იმისთვის, რომ ბავშვი დაინტერესდეს ქიმიით, აუცილებელია ლაბორატორიული სამუშაოების ჩატარება, ოღონდ ამ სამუშაოს არ უნდა ჰქონდეს ფორმალური ხასიათი. მიზანი უნდა იყოს ის, რომ ბავშვმა დაინახოს რეალური გამოყენება. ჩვენს დამატებით გაკვეთილებზე სწორედ ამას ვაკეთებთ. მაგალითად, მოსწავლეებს ბევრი გაუგიათ c ვიტამინის შესახებ სახელმძღვანელოებიდან, თუმცა სხვა არის, როდესაც c ვიტამინს აფთიაქში ყიდულობ და სხვაა, როცა ამას სხვადასხვა ხილიდან ან ბოსტნეულიდან გამოყოფ. მსგავსი ექსპერიმენტის შემდეგ, მოსწავლემ უკვე იცის, რომ როდესაც ის ამა თუ იმ მცენარით იკვებება, შესაბამის ნივთირებასაც იღებს.”
მასწავლებლის ეროვნული ჯილდო
დღეს, მასწავლებლის პროფესია ნაკლებად დაფასებულია იმ შრომასთან და ცოდნასთან შედარებით, რასაც ისინი ყოველდღიურად გასცემენ. თუმცა, ეს ტენდენცია ნელ-ნელა იცვლება, რაც მასწავლებლის ეროვნული ჯილდოს დამსახურებაა, რომელიც უკვე მე-9 წელია ტარდება.
,,დაახლოებით ორჯერ მეტ დროს მასწავლებელი იმის გაანალიზებაში ხარჯავს, თუ როგორ ჩაიარა გაკვეთილმა, რა და როგორ უნდა გააკეთოს შემდგომში. ძალიან დიდი ენერგია სჭირდება, რომ მასალა მოამზადო, ამოცანები შეადგინო და ა.შ. ეს ყველაფერი დამატებითი შრომაა, რომელიც რეალურად არასდროს ფასდება. მართალია, სკოლაში ყოველდღე მხოლოდ სამი გაკვეთილი მაქვს, თუმცა გაკვეთილების დასრულების შემდეგ ბავშვებთან ერთად ხშირად დამატებით 5-6 საათსაც ვმუშაობ ხოლმე.”
კონკურსში მონაწილეობისთვის განცხადებების მიღება უკვე დაიწყო. 30 მაისის ჩათვლით ნებისმიერ მსურველს აქვს შესაძლებლობა საყვარელი მასწავლებელი ან საკუთარი კანდიდატურა წარადგინოს კონკურსზე.
ჯილდოს შესახებ დამატებითი დეტალები შეგიძლიათ ვებ-გვერდზე იხილოთ.
ინფორმაციისთვის, მასწავლებლის ეროვნული ჯილდო საქართველოში 2017 წლის 13 მაისს დაწესდა. ინიციატივა გლობალური კამპანიის – „The Global Teacher Prize“-ის ნაწილია, რომლის მიზანიც მასწავლებლების პროფესიის პოპულარიზაციაა. მასწავლებლის ეროვნული ჯილდოს მხარდამჭერები არიან: მთავარი მხარდამჭერი – საქართველოს ბანკი; გენერალური სპონსორი – გუდავაძე-პატარკაციშვილის ფონდი.