მიზანდასახული და მონდომებული ახალგაზრდების განათლებაზე ზრუნვა საქართველოს ბანკის ერთ-ერთი პრიორიტეტული მიმართულებაა. სწორედ ამიტომ, საქართველოს ბანკი 2013 წლიდან ჩივნინგის პროგრამის პარტნიორია და ყოველწლიურად ასახელებს სტიპენდიატებს, რომლებიც დიდ ბრიტანეთში სასურველ სამაგისტრო პროგრამაზე სრულიად უფასოდ აგრძელებენ სწავლას.
ჩივნინგი დიდი ბრიტანეთის მთავრობის გლობალური სასტიპენდიო პროგრამაა, რომელიც 1983 წლიდან დღემდე 118 ქვეყნის სტუდენტებს დიდ ბრიტანეთში ერთწლიან სამაგისტრო საფეხურზე სწავლის შესაძლებლობას სთავაზობს. საქართველოს ბანკის სტიპენდიატებს სასურველ უნივერსიტეტში სწავლის საფასურის გარდა, მგზავრობის, ცხოვრებისა და ვიზის ხარჯებიც უფინანსდებათ.
საქართველოს ბანკის სტიპენდია 30-ზე მეტ სტუდენტს აქვს მოპოვებული. მათ რიცხვს წელს უკვე მარიამ მაჭარაშვილი, ლევან თევდორაძე და ნანა გელაშვილი შეემატნენ. ნანა ლიდსის უნივერსიტეტში განათლების პროგრამაზე ჩაირიცხა, მარიამი ექსეტერის უნივერსიტეტში ინკლუზიურ განათლებას ისწავლის, ლევანმა კი ლონდონის კინგის კოლეჯის პოლიტიკური ეკონომიის სამაგისტრო პროგრამა აირჩია. ჩვენთან საუბრისას მათ საზღვარგარეთ სწავლის მსურველებს სტიპენდიის მოპოვებამდე განვლილი გზა, სამომავლო გეგმები და აუცილებლად გასათვალისწინებელი რჩევები გაუზიარეს.
კითხვაზე, თუ რატომ გადაწყვიტეს ჩივნინგის პროგრამაში მონაწილეობა, მარიამი, ლევანი და ნანა მსოფლიოში ცნობილ უნივერსიტეტებში სწავლას, გამორჩეულად საინტერესო პროგრამებსა და საქართველოს სამომავლო განვითარებაში წვლილის შეტანის შესაძლებლობას ასახელებენ. სამივე სტიპენდიატისთვის განსაკუთრებულად საამაყოა პროგრამაში მონაწილე უნივერსიტეტების პრესტიჟულობა და წარმატებულ ჩივნინგელთა შორის ყოფნა.
აპლიკაციის შევსების პროცესი სამივესთვის საინტერესო და ნაყოფიერი აღმოჩნდა, რადგან შესაძლებლობა მიეცათ, კიდევ უფრო ჩაღრმავებოდნენ საკუთარ შესაძლებლობებსა და მიზნებს.
“რთული, ალბათ, აპლიკაციის სწორად და მოთხოვნილი სტანდარტების შესაბამისად შევსება და მასში საკუთარ თავზე საქმიანად და საინტერესოდ საუბარი იყო. სასიამოვნო კი თავად პროცესი იყო, რადგან ჩემთვის თვითრეფლექსიისა და საკუთარი მიზნების გადააზრების კარგი შესაძლებლობა აღმოჩნდა“, – ამბობს ლევანი
“აპლიკაციის შევსების პროცესი საკმაოდ შრომატევადია, რაც მიზნების და სამომავლო გეგმების სწორად ჩამოყალიბებას მოითხოვს”, — იხსენებს ნანა.
“ყველაზე მნიშვნელოვანი რამდენიმე თვის გამუდმებული ფიქრისა და ნააზრევის კომისიამდე მიტანა იყო. ჩივნინგიდან გამარჯვების თაობაზე მიღებული მეილის გახსნისას კი ვიგრძენი, რომ ადამიანის შესაძლებლობები ამოუწურავია”, — ასე აფასებს აპლიკაციის შევსების პროცესს მარიამი.
აპლიკაციის შევსებიდან სტიპენდიის მიღებამდე განვლილმა გზამ სამივეს მნიშვნელოვანი გაკვეთილები ასწავლა და ახლა შეუძლიათ, ცოდნა იმ ადამიანებსაც გაუზიარონ, რომლებსაც ჩივნინგის პროგრამაში მონაწილეობა უნდათ.
მნიშვნელოვანია, რომ კარგად გაიაზროთ თქვენი ისტორია — საიდან მოდიხართ, რა გამოცდილება გაქვთ და როგორ უკავშირდება ის იმ პროგრამებს, რომლებიც ჩივნინგის ფარგლებში შეარჩიეთ. ასევე, ალბათ, მნიშვნელოვანია ნათლად გესმოდეთ, რა პოზიტიური ზეგავლენის მოხდენა შეგიძლიათ თქვენს ქვეყანაზე/საზოგადოებაზე სწავლის დასრულების შემდეგ.
– ამბობს ლევანი.
ნანას თქმით, პროგრამაში მონაწილეობის მსურველებმა მიზნები სწორად უნდა დაისახონ და სამომავლო ხედვებიც ნათლად ჩამოაყალიბონ. თვლის, რომ წარმატების მისაღწევად ყველაზე მნიშვნელოვანი შრომისმოყვარეობა და რწმენაა: “იყავით მომთმენი, ირწმუნეთ საკუთარი შესაძლებლობების და წარმატებას აუცილებლად მიაღწევთ. შესაძლოა, წარმატებისკენ მიმავალ გზაზე უამრავი დაბრკოლება შეგხვდეთ, მაგრამ დაბრკოლება აქციეთ შესაძლებლობად, რაც დასახულ მიზნამდე აუცილებლად მიგიყვანთ”.
მარიამი კი თვლის, რომ ჩივნინგის პროგრამაში გამარჯვება ნებისმიერს შეუძლია, ვისაც საკმარისი მოტივაცია აქვს:
“თუ შევძელი მე, შეძლებ შენც. ქვეყანას სჭირდები შენი განათლებით და საუკეთესო წინ გელოდება”.
ნანას, მარიამსა და ლევანს საქართველოში დაბრუნებისას დიდი სამომავლო გეგმები აქვთ. ნანა მუშაობას საგანმანათლებლო სექტორში გააგრძელებს და ახალგაზრდებთან ურთიერთობას დიდ დროს დაუთმობს. მარიამი საქართველოში ინკლუზიური განათლების განვითარებაში საკუთარი წვლილის შეტანას საგანმანათლებლო რესურსცენტრებთან და განათლების სამინისტროსთან თანამშრომლობით გეგმავს. ლევანი ეკონომიკური პოლიტიკისა და ინსტიტუციური განვითარების კუთხით საკონსულტაციო და კვლევითი საქმიანობის გაგრძელებას აპირებს და უნივერსიტეტებში ლექტორობაც უნდა.
რაც მთავარია, განსხვავებული მიზნების მიუხედავად, საქართველოს ბანკის სამივე სტიპენდიატს ერთი სურვილი — საკუთარი ქვეყნის უკეთესობისკენ შეცვლა ამოძრავებთ.
2025-2026 წლის ჩივნინგის პროგრამის სასტიპენდიო კონკურსი უკვე გამოცხადდა, მონაწილეობის მისაღებად კი 5 ნოემბრის ჩათვლით ეს აპლიკაცია უნდა შეავსო.
აღნიშნული პროექტი სიცოცხლის ხის ფონდის მხარდაჭერით ხორციელდება. ფონდი 2008 წელს დაარსდა და დღემდე ისეთი სოციალურად მნიშვნელოვანი მიმართულებებით მუშაობს, როგორებიცაა განათლება, გარემოს დაცვა და შშმ პირების მხარდაჭერა.