ხანდახან სათანადოდ შეიძლება ვერც კი წარმოვიდგენდეთ, თუ რამდენად დიდი მნიშვნელობა აქვს ფინანსურ განათლებას ჩვენს ყოველდღიურობაში. შეიძლება, სხვადასხვა საფეხურზე განათლების მიღებისას ამას სათანადო ყურადღება არ ექცეოდეს, მაგრამ ფინანსურ განათლებასთან დაკავშირებული საბაზისო უნარების ფლობა აუცილებელიც კია: უნდა იცოდე, როგორ გამოიმუშაო, დახარჯო, გადაინახო ან დააბანდო. სწორედ ამას უზრუნველყოფს ფინანსური განათლება, რომლის ხელშეწყობასაც ისახავს მიზნად ახალი პროექტი — ფინანსური განათლების ოლიმპიადა.
პროექტს კინგსი საქართველო USAID-ის სამოქალაქო განათლების პროგრამის ფარგლებში, საქართველოს ბანკის მხარდაჭერით ახორციელებს. მასში მონაწილეობის მიღება სრულიად უფასოდ შეუძლიათ სკოლის მოსწავლეებს მე-7-დან მე-12 კლასის ჩათვლით.
ფინანსური განათლების ოლიმპიადა მასშტაბური პროექტია: ყველა ეტაპი ონლაინ ჩატარდება და მთელი საქართველოდან ყველას ექნება შესაძლებლობა, მონაწილეობა მიიღოს. რა თქმა უნდა, პროექტი მხოლოდ ტესტირებას და გამარჯვებულების დაჯილდოებას არ მოიცავს. თავდაპირველად, დარეგისტრირებულ მოსწავლეებს შესაძლებლობა ექნებათ, გაეცნონ შესაბამის სასწავლო მასალას და გამოსცადონ საკუთარი ცოდნა სავარჯიშო ტესტებით, რომელსაც ამ ბმულზე იხილავთ. გარდა ამისა, პროექტში ჩართული მოსწავლეებისთვის გაიმართება შეხვედრები საფინანსო სფეროს წამყვან სპეციალისტებთან. სპიკერების სესიას შეაჯამებს საქართველოს ბანკის წარმომადგენელი, რომელიც ფინანსური განათლების სხვადასხვა მნიშვნელოვან ასპექტზე ისაუბრებს. ამ ყველაფრის შემდეგ კი, 25 ნოემბერს, ოლიმპიადის დასკვნითი ეტაპი გაიმართება გამარჯვებულების გამოსავლენად.
პროგრამაში ჩასართავად რეგისტრაციის გავლას ამ ბმულზე შეძლებ.
და მაინც — რას ისწავლი პროექტის ფარგლებში და რატომ უნდა ჩაერთო მასში?
ფინანსური განათლების მნიშვნელობაზე დასაწყისშივე ვისაუბრეთ, მაგრამ აქ უფრო ვრცლად მოვყვებით, რის შესახებ მიიღებ ინფორმაციას და რაში გამოგადგება ეს.
პროექტის ფარგლებში შეიძენ ცოდნას ისეთ საკითხებზე, როგორიცაა ფული, გაცვლის საშუალებები, ინფლაცია, ეკონომიკა და სახელმწიფოს როლი ეკონომიკაში. ასევე, უკეთ გაერკვევი სხვადასხვა ფინანსური ოპერაციის პრინციპში: სესხება, საპროცენტო განაკვეთი, ინვესტიციები, დაზოგვა და დეპოზიტები. მოკლედ, პროექტი, ფაქტობრივად, სრულად მოიცავს საბაზისო ფინანსურ განათლებას.
ეს ყველაფერი კი, სამომავლოდ, უფრო მყარი და გააზრებული გადაწყვეტილებების მიღებაში დაგეხმარება. ადრეული ასაკიდან გამომუშავებული საჭირო უნარები კარიერის საწყის ეტაპზევე მოგცემს საშუალებას, გონივრულად მიუდგე ფინანსებთან ურთიერთობას და მალე მიაღწიო დასახულ მიზნებს.
ფინანსური განათლების ოლიმპიადას კი ისიც გამოარჩევს, რომ პროექტის პარტნიორები საფინანსო ინსტიტუტები არიან; საქართველოს ბანკი უკვე მესამე წელია, კინგსის გენერალური სპონსორია და ამ თანამშრომლობის ფარგლებში ქმნის განათლების უსაზღვრო შესაძლებლობებს ახალგაზრდებისთვის.
რაც შეეხება სამოქალაქო განათლების პროგრამას, მას PH international ახორციელებს USAID-ის დაფინანსებითა და საქართველოს განათლებისა და მეცნიერების სამინისტროს მხარდაჭერით.