ფულის გლობალური კვირეული დაიწყო. ყოველწლიური ღონისძიება, რომელიც 170-ზე მეტ ქვეყანაში აღინიშნება, ფინანსურ განათლებაზე ცნობიერების ამაღლებას ისახავს მიზნად. კვირეული 2012 წლიდან აღინიშნება, ხოლო 2014 წლიდან მასში უკვე საქართველოცაა ჩართული. პროექტი საქართველოში ეროვნული ბანკის კოორდინირებით ხორციელდება, საქართველოს ბანკი კი ღონისძიებაში წელსაც მონაწილეობს.
გასულ წელს კვირეული შთამბეჭდავი რიცხვებით დასრულდა: საქართველოდან მასში 120 ორგანიზაცია ჩაერთო, პირდაპირი ბენეფიცირების რაოდენობამ კი 3 500 მოზარდი და 300 ზრდასრული შეადგინა. ჯამში პროექტის წვდომამ ქვეყნის მასშტაბით 1,5 მილიონს მიაღწია, აი, მსოფლიოში კი ეს რიცხვი 120 მილიონია.
და მაინც — რა არის ფულის გლობალური კვირეული და რას მოიცავს ის?
სწორი ფინანსური გადაწყვეტილებები ფინანსური კეთილდღეობისთვის
როგორც გითხარით, კვირეული 2012 წლიდან აღინიშნება. მისი ორგანიზატორი ფინანსური განათლების საერთაშორისო ქსელია (OECD/INFE). პროექტის მთავარი სამიზნე აუდიტორია მოზარდები და ახალგაზრდები არიან, მისი მისია კი ბენეფიციარებისთვის ფინანსური განათლების მიწოდება, მათში შესაბამისი უნარ-ჩვევების გამომუშავებაა. ორგანიზატორები ხაზს უსვამენ, რომ მნიშვნელოვანია, ეს უნარები, დამოკიდებულებები და ქცევები ადრეული ასაკიდანვე გამომუშავდეს, რათა მომავალში ადამიანებმა სწორი ფინანსური გადაწყვეტილებები მიიღონ.
ფულის გლობალური კვირეულის სლოგანია „ისწავლე. დაზოგე. გამოიმუშავე“. ეს ფრაზა თავდაპირველად 2017 წლის ღონისძიებისთვის იყო განკუთვნილი, მოგვიანებით კი მთელ პროექტზე განზოგადდა. ის კვირეულის მისიას ზედმიწევნით გადმოსცემს: რომ მოზარდებმა არა მხოლოდ ფულთან ურთიერთობა ისწავლონ, არამედ საკუთარი მომავლისთვის ფინანსების დაზოგვა და გამომუშავებაც შეძლონ. ამ მიზნით, ყველა ქვეყანაში მონაწილე ორგანიზაციები გეგმავენ და ახორციელებენ სხვადასხვა პროექტს.
ფულის გლობალური კვირეული 2024
აი, წლევანდელი კვირეულის თემას რაც შეეხება, ესაა „დაიცავი შენი ფული, დაიცავი შენი მომავალი“. წელს პროექტი მიზნად ისახავს, აამაღლოს ცნობიერება პირადი ფინანსების მართვის პასუხისმგებლობაზე და პოტენციურ საფრთხეებზე.
უფრო კონკრეტულად, 2024 წლის კვირეულის მთავარი საკითხებია: ფულის უსაფრთხო მართვა, პირადი ფინანსებისადმი პასუხისმგებელი და ინფორმირებული მიდგომა, კიბერ-საფრთხეები, მონაცემთა კონფიდენციალურობასთან დაკავშირებული რისკები და ფინანსური თაღლითობა. ამ თემებზე ახალგაზრდებისთვის სათანადო ცოდნის მიწოდება კი განსაკუთრებით მნიშვნელოვანია, რადგან ყველაზე ხშირად მოიხმარენ ციფრულ სერვისებს და დიდია ალბათობა, რომ თაღლითობის სამიზნე გახდნენ.
წლევანდელი კვირეული 18 მარტიდან 24 მარტამდე გაიმართება.
კვირეულის მნიშვნელობა საქართველოს ბანკისთვის
საქართველოს ბანკისთვის, როგორც ქვეყნის ერთ-ერთი წამყვანი საფინანსო ინსტიტუტისთვის, ფულის გლობალურ კვირეულში მონაწილეობას დიდი მნიშვნელობა აქვს. თავის მხრივ, ბანკი უკვე წლებია, არაერთ პროექტს ახორციელებს ფინანსური განათლების ხელშესაწყობად; მათ შორისაა sCoolApp – მოსწავლის აპლიკაცია, რომელიც ხელს უწყოვს ფინანსურ განათლებას. ასევე, USAID და PH International-თან თანამშრომლობით შექმნილი პროგრამა „ფინანსური განათლება სკოლებში“, King’s-ის ოლიმპიადა ფინანსურ განათლებაზე და ბლოგების სერია, რომელსაც აქ ნახავ.