თუ შემოქმედებითი ადამიანი ხარ, საინტერესო იდეები მოსვენებას არ გაძლევს და თან Art Direction-ის ან Copywriting-ის მიმართულებით გსურს სწავლის გაგრძელება, Miami Ad School Europe ის ადგილია, რომელსაც ეძებ. სწორედ Art Direction-ის მიმართულებით დაინტერესდა თავიდან ლიზა ღლონტიც, თან იმდენად, რომ მანამდე არჩეული პროფესიის შეცვლა გადაწყვიტა და Miami Ad School Europe-ის სტუდენტიც გახდა. ახლა კი, Miami Ad School Europe-ში სწავლის, მიღებული გამოცდილებისა და წარმატებული პროექტების შესახებ ლიზა ღლონტი თავის ისტორიას უზიარებს მათ, ვინც მომავალ პროფესიას Art Direction-ის მიმართულებას უკავშირებს.
“ჯერ კიდევ ქიმია/ბიოქიმიის სტუდენტი ვიყავი, როცა Miami Ad School Europe-ის (MASE) შესახებ გავიგე და Art Direction-ის პროგრამა გონებაში ჩამრჩა. მალევე მივხვდი, რომ ძალიან მნიშვნელოვანია ის საქმე აკეთო, რომელიც ძალიან გიყვარს. პროფესიის შეცვლა არ დავაყოვნე და საქართველოში აუდიო-ვიზუალური ხელოვნების სწავლა დავიწყე, პარალელურად კი პატარა და საშუალო ბიზნესების ბრენდიგზე, კომერციულ და არაკომერციულ შემოქმედებით პროექტებზე ვმუშაობდი. სხვათა შორის, პროფესიულად საქართველოს ბანკს სწორედ ერთ-ერთ ასეთ პროექტზე მუშაობისას დავუკავშირდი. ეს იყო პროექტი გზა სულ არის, რომლის ფარგლებშიც საქართველოს ბანკის რეკლამისთვის მე და ჩემმა მეგობრებმა კადრი სტრატოსფეროდან გადავიღეთ.
MASE-ში სწავლა წლების განმავლობაში შორეულ გეგმად მეჩვენებოდა. ერთ დღესაც გადავდგი ნაბიჯი — გავაგზავნე მეილი, რათა გამერკვია, როდის ცხადდებოდა ნიკა გუჯეჯიანის სახელობის სტიპენდია და რომელ ფაკულტეტებზე იყო სწავლა შესაძლებელი. MASE-ის სკოლის დირექტორმა, საბინა გეორგმა მომწერა, რომ აპლიკაციების მიღება დაწყებული იყო და სკოლა Art Direction-ის მიმართულებით 5-6 ნამუშევრის გაგზავნას ითხოვდა. დედლაინამდე ერთი დღით ადრე აპლიკაცია გავაგზავნე.
თითქმის ორთვიანი ლოდინის შემდეგ მომივიდა მეილი, რომელშიც ეწერა, რომ ნიკა გუჯეჯიანის სახელობის სტიპენდია ვერ მივიღე, მაგრამ საოცრებები ხანდახან მართლა ხდება. რამდენიმე საათში საბინა გეორგმა მომწერა, რომ ჩემი პორტფოლიო ძალიან მოეწონათ და სკოლა სწავლის ნახევარს დამიფინანსებდა. ასე დაიწყო ჩემი და MASE-ის თავგადასავალი. ამასობაში, მე და ლიკა კეშელავა, ნიკა გუჯეჯიანის სტიპენდიის გამარჯვებული, ისე დავახლოვდით, რომ ბავშვობის მეგობრებივით ვართ. არაერთ პროექტზე ვიმუშავეთ ერთად და ჩვენმა რამდენიმე კოლაბორაციამ Young One-ზე და D&AD New Blood ფესტივალზე უკვე გამარჯვებებიც მოგვიტანა”, — ამბობს ლიზა ღლონტი.
ლიზა ღლონტი MASE-ში Art Direction-ის მიმართულებით სწავლობს და ამ პროფილით უკვე 4 თვეა, BBDO Berlin-ში სტაჟირებას გადის. ლიზას თქმით, სამომავლოდ სწორედ ამ სააგენტოში გეგმავს დარჩენას. გარდა ამისა, ლიზა ამჟამად რამდენიმე საინტერესო პროექტზე სხვადასხვა ბრენდთან ერთად მუშაობს, რომელთა შორის არიან Meta, Puma, BVG, Porsche, და სხვა. ლიზას მიზანია, რომ გერმანიაში მიღებული ცოდნისა და გამოცდილების რეალიზება საქართველოში შეძლოს და მისი თქმით, ბევრს ფიქრობს იმაზე, თუ რისი გაკეთება შეუძლია იქიდან საკუთარი ქვეყნისთვის.
“Miami Ad School მართლაც ერთი დიდი თავგადასავალია, რომელიც საოცრებებითაა სავსე. მათ შორის, ერთ-ერთი ყველაზე გამორჩეული — გლობალური კავშირები/ნეთვორქია. მე გავიცანი ადამიანები, რომლებთან ერთადაც არაერთი შემოქმედებითი გუნდი ჩამოყალიბდა. Miami Ad School-ში სწავლა ძალიან განსხვავდება ტრადიციული სასწავლო პროცესისგან. სკოლა 100%-ით პრაქტიკულია და გამოცდილებას კრეატიული ინდუსტრიის წამყვანი და აქტიური წევრები გვიზიარებენ. სწავლის პროცესი მეტ-ნაკლებად დატვირთულია, თუმცა მათთვის, ვისაც იდეები სულ “აწუხებს”, დრო და საჭირო ხალხი ყოველთვის გარშემოა, რათა ეს იდეები განხორციელდნენ. ერთ-ერთი აღსანიშნი ფაქტი ისაა, რომ MASE-ის გლობალური ნეთვორქი საშუალებას გვაძლევს, მსოფლიოს ნებისმიერ წერტილში წამყვან სააგენტოებში სტაჟირებები გავიაროთ. სწავლის პროცესი 2-წლიანია, თუმცა მეორე წლის უდიდესი ნაწილი სტაჟირებებს ეთმობა”, — აღნიშნა ლიზამ.
Miami Ad School-ში სწავლის გაგრძელება ლიზა ღლონტის წარმატებული გზის მხოლოდ დასაწყისი იყო. ლიზა ოთხივე სემესტრში Miami Ad School-ის საუკეთესო სტუდენტად დასახელდა. გარდა ამისა, ლიზა აქტიურად იყო ჩართული სხვადასხვა პროექტში და შედეგმაც არ დააყოვნა — ქართველმა სტუდენტმა არაერთ კონკურსში გაიმარჯვა.
“სანამ ბერლინში ჩამოვიდოდი, ყველა მაგარ ემოციასთან ერთად ცოტას ვნერვიულობდი კიდეც — ბევრი მეუბნებოდა, რომ MASE-ში სწავლა არ იყო ადვილი. როგორც აღვნიშნე, MASE ერთი დიდი თავგადასავალია თავისი თავსატეხებით და სწორედ ესაა ძალიან მაგარი. ოთხივე სემესტრში საუკეთესო სტუდენტი ე.წ. “ტოპ დოგი” გავხდი და MASE-მ ჩემთვის არაერთ დიდ წარმატებას გაუღო კარი: ამ ერთი წლის განმავლობაში შესაძლებლობა მქონდა იმ პროექტებზე მემუშავა, რომლებმაც ათობით პრიზი და შორთლისთი აიღეს ისეთ საერთაშორისო ფესტივალებზე, როგორებიცაა D&AD, One Show, Epica Awards, Art Directors Club Germany, Golden Drum, Penta Awards, Ad Black Sea, Clio Awards, Future Lions, Young Ones Portfolio, D&AD New Blood Portfolio Awards.
და, რა თქმა უნდა, კანის ლომების აკადემია! ამ შესაძლებლობის შესახებ MASE-სგან გავიგე. საბინამ, სკოლის დირექტორმა მირჩია, კონკურსში მონაწილეობა მიმეღო. კონკურსი 23 წლამდე კრეატიული ახალგაზრდებისთვის ტარდებოდა და გერმანიიდან მხოლოდ ერთი ადგილი იყო. ძალიან გამიხარდა როცა გავიგე, რომ დელეგატად ამირჩიეს და სტიპენდია ავიღე. კონკურსის ფარგლებში 2023 წლის კანის ლომების ფესტივალზე მსოფლიოს სხვადასხვა ქვეყნიდან შერჩეულ მონაწილეებთან ერთად ძალიან მაგარი გამოცდილება დავაგროვე. კიდევ უფრო მაგარი ის იყო, რომ ფესტივალის ფარგლებში სტუდენტები UNDP-ის მიერ დავიბრიფეთ და იდეა, რომელზეც ჩვენი გუნდი მუშაობდა, გამარჯვებული გახდა. ძალიან, ძალიან მინდა, რომ მალე ამ სტიპენდიით სარგებლობა სტუდენტებს საქართველოდანაც შეეძლოთ”, — ამბობს ლიზა.
თუ Miami Ad School Europe-ში სწავლით დაინტერესებული ხარ და თვლი, რომ არც მოტივაცია გაკლია, საქართველოს ბანკი უფასოდ სწავლის შანსს გაძლევს. Miami Ad School Europe-ის და საქართველოს ბანკის თანამშრომლობით, 2019 წლიდან ნიკა გუჯეჯიანის სახელობის სტიპენდია გაიცემა, რომელიც კონკურსში გამარჯვებულებს სწავლას სრულიად უფინანსებს. თუ რატომ უნდა ისწავლო Miami Ad School Europe-ში და რას შეცვლის ეს შენს ცხოვრებაში, ლიზას პასუხი ასეთია:
“ჩემი აზრით, ეს მოუსვენარი ხალხის სკოლა და სფეროა. უფრო სერიოზულად კი, კრეატიული პოტენციალის რეალიზებისთვის ეს ერთ-ერთი საუკეთესო შესაძლებლობაა. გარემო და ხალხი, რომელიც MASE-ში დაგხვდება, მუდმივი მოტივაცია იმისთვის, რომ არ მოისვენო. ყველა ერთმანეთზე უფრო საინტერესო და ნიჭიერია და თითოეულ ადამიანთან კოლაბორაცია შენი შემოქმედებითი თავის ახალ ვერსიას გაჩვენებს. რაც მთავარია, კრეატიული ინდუსტრიის გლობალურ ბაზარზე MASE კარიერის ძალიან კარგი დასაწყისია”, — დასძინა ლიზამ.
ნიკა გუჯეჯიანის სახელობის სტიპენდიის მოპოვების შესახებ ინფორმაციას ამ ბმულზე შეგიძლია გაეცნო და რაც მთავარია, არ დაგავიწყდეს, რომ მონაწილეობის მიღება 25 ივლისის ჩათვლითაა შესაძლებელი.