მისაღები გამოცდები ახლოვდება. თუ შენც იმათ შორის ხარ, ვინც სასურველი უნივერსიტეტებისა თუ ფაკულტეტების სიას ადგენს, აუცილებლად უნდა იცოდე საქართველოს ბანკის სასტიპენდიო პროგრამის შესახებ.
საქართველოს ბანკი 20-მდე პარტნიორი უნივერსიტეტის სტუდენტებს აძლევს შესაძლებლობას, სრულად ან ნაწილობრივ დაიფინანსონ სწავლის გადასახადი. უკვე გამოვლინდა 140-ზე მეტი წარმატებული სტიპენდიატი, უნივერსიტეტებთან თანამშრომლობა კი მომავალში უფრო და უფრო მასშტაბური გახდება.
საკუთარი შთაბეჭდილებები და რჩევები სტუდენტებსა და აბიტურიენტებს ილიას სახელმწიფო უნივერსიტეტის სტიპენდიატებმა გაუზიარეს:
საბინა ფარაჯევა ილიაუნის ბიზნესის ფაკულტეტზე სწავლობს საბანკო-საფინანსო განხრით:
მსგავსი პროგრამები ჩვენთვის დიდი მოტივატორია, სტიპენდიატობა გარწმუნებს, რომ შენი შრომა ფასდება. სტუდენტებსა და აბიტურიენტებს ვურჩევდი, რომ არასდროს დანებდნენ და ხელი არ ჩაიქნიონ, რადგან როგორი რთულიც უნდა იყოს სწავლის პროცესი, ძალისხმევა აუცილებლად დაფასდება.
თამთა თოდრაძე ბიზნეს ტექნოლოგიებისა და განათლების ფაკულტეტის მეოთხე კურსის სტუდენტია და ტურიზმის განხრით სწავლობს:
საქართველოს ბანკის სტიპენდიამ თავდაჯერებულობა შემმატა და მჯერა, მომავალში უფრო მეტს შევძლებ. სტუდენტებსა და აბიტურიენტებს, პირველ რიგში, მოთმინებასა და გამბედაობას ვურჩევ. პატარა წარუმატებლობებს თქვენი ენთუზიაზმისა და მოტივაციის გაქრობის უფლება არ მისცეთ. განვითარებისთვის მნიშვნელოვანია არ გვრცხვენოდეს კითხვების დასმის. პასიური მსმენელი ნუ იქნებით, გამოთქვით საკუთარი მოსაზრებები და აუცილებლად მიიღეთ მონაწილეობა დისკუსიებში.
თორნიკე სურგულაძე ქალაქ ფოთიდანაა და ილიაუნიში მენეჯმენტის მიმართულებით სწავლობს. გარდა საკუთარი პროფესიისა, სპორტითაა დაინტერესებული და წყლის თხილამურების ფლობაში გარკვეულ წარმატებებსაც უკვე მიაღწია:
საქართველოს ბანკის სტიპენდიით განაცხადის წაკითხვისთანავე დავინტერესდი. ეს არის შესაძლებლობა, რომელიც მომავალში კიდევ უფრო მეტ წარმატებას მომიტანს. ვფიქრობ, ცხოვრებაც სპორტია, კონკურენციაა და მეც ამ მარათონის ნაწილი ვარ. მომავალ სტიპენდიატებს ვურჩევდი, მიზნებისაკენ წინსვლა არასდროს გადადონ სხვა დროისთვის. ყოველთვის გაბედეთ და გამოიყენეთ ყველა საგანმანათლებლო შესაძლებლობა, მიუხედავად იმისა, გჯერათ თუ არა წარმატების.
თორნიკე კირკიტაძე ბიზნეს-ადმინისტრირების ფაკულტეტის მესამე კურსის სტუდენტია:
გამოწვევები ყოველთვის მიყვარდა და ვცდილობდი, არ შემეწყვიტა განვითარება. ვფიქრობ, რომ სასტიპენდიო კონკურსშიც სწორედ დისციპლინა და ორგანიზებულობა დამეხმარა ყველაზე მეტად. სტიპენდიის მოპოვება ადვილი ნამდვილად არ ყოფილა. კონკურსში გამარჯვებამ მეტი წარმატების მიღწევის ამბიცია გამიჩინა. ვფიქრობ, მიზნებამდე მისასვლელ გზას ყოველთვის იპოვი, თუ არ ჩერდები და არ გეშინია წარუმატებლობის.
ზაური ლაბარტყავა აბაშის რაიონიდანაა და ილიაუნიში მენეჯმენტს სწავლობს:
ბევრი ყოყმანის და ფიქრის შემდეგ გადავწყვიტე მეცადა ბედი საქართველოს ბანკის სასტიპენდიო კონკურსში. მიხარია, რომ შიში დავძლიე და წარმატებასაც მივაღწიე. ყველას ვურჩევდი, რაც შეიძლება მეტ პროექტსა და ღონისძიებაში მიიღონ მონაწილეობა. არა უშავს თუ ხანდახან დავმარცხდებით, ნებისმიერი მცდელობა, წარმატებული თუ წარუმატებელი, გამოცდილებაა, რომელიც განვითარებასა და ზრდაში გვეხმარება.
ასე რომ, არ გაუშვა ხელიდან სასურველ პროგრამაზე უფასოდ სწავლის შესაძლებლობა. თუ გსურს, შენც შემოუერთდე საქართველოს ბანკის სტიპენდიატებს, თვალი ადევნე სიახლეებს. სტიპენდიისა და სხვა პროექტების შესახებ ინფორმაციას ამ ბმულზე იპოვი.
ქართულ უნივერსიტეტებში საქართველის ბანკის სტიპენდიის შესახებ გაიგე მეტი:
• საქართველოს ბანკის სტიპენდიატები საზღვაო აკადემიიდან ბათუმობასა და მეზღვაურობაზე;
• სტიპენდიანტები, რომლებიც არ ჩერდებიან —საქართველოს ბანკის პროექტი შთამბეჭდავი შედეგებით;
• სჯობს, სცადო და არ გამოგივიდეს, ვიდრე საერთოდ არ სცადო – საქართველოს ბანკის სტიპენდიატი ტექნიკური უნივერსიტეტიდან;
• როცა შენს მიზნებს უახლოვდები — საქართველოს ბანკის სტიპენდიატი თავისუფალი უნივერსიტეტიდან;
• როგორ შეგიძლია დაიფინანსო სწავლა 15 უნივერსიტეტში – საქართველოს ბანკის სტიპენდიატების რჩევები აბიტურიენტებს;
• აბიტურიენტი ხარ? — გაიგე, როგორ შეძლებ დაიფინანსო სწავლა საქართველოს ბანკის სტიპენდიით.