5 მიზეზი, რატომ უნდა ჩაერთო ჩივნინგის სასტიპენდიო პროგრამაში

სულ ცოტა დრო რჩება ჩივნინგის პროგრამაში ჩასართავად. აპლიკაციების მიღების ვადა 7 ნოემბერია. ამ სასტიპენდიო პროგრამას, რომელსაც უკვე ოთხი ათწლეულია გაერთიანებული სამეფოს საგარეო საქმეთა სამინისტრო პარტნიორ ორგანიზაციებთან ერთად ახორციელებს, მთელ მსოფლიოში 50 ათასამდე კურსდამთავრებული ჰყავს.

საქართველოს ბანკი უკვე 10 წელია პროგრამის  პარტნიორია. ამ თანამშრომლობის ფარგლებში დღემდე 26-მა სტუდენტმა შეძლო ერთი წელი სრული დაფინანსებით ესწავლა ბრიტანულ უნივერსიტეტში სამაგისტრო პროგრამაზე. ყოველწლიურად გამარჯვებული აპლიკანტებიდან სამი საქართველოს ბანკის სტიპენდიატი ხდება.

პროგრამაში ჩასართავად მხოლოდ ისაა საჭირო, რომ აპლიკაცია შეავსო. ნებისმიერ შეკითხვაზე პასუხის მიღებას კი საკონსულტაციო კურსზე შეძლებ.

თუმცა, თუ ჯერ კიდევ ყოყმანობ გადაწყვეტილების მიღებას, რამდენიმე მიზეზს ჩამოგითვლით, რატომ არ უნდა გადადო აპლიკაციის შევსება ერთი წუთითაც კი!

1. სრული დაფინანსება

პროგრამაში ჩართული სტუდენტებისთვის ყველაფერი ფინანსდება — და როცა ამას ვამბობთ, მართლა ყველაფერს ვგულისხმობთ; შენ არა მხოლოდ სწავლის საფასური დაგიფინანსდება, არამედ მგზავრობის ხარჯები და ვიზის გადასახადიც. ამასთან, მიიღებ ყოველთვიურ სტიპენდიასაც და გრანტს დისერტაციისთვის.

სრული ფინანსური მხარდაჭერა კი შესაძლებლობას მოგცემს, მთლიანად კონცენტრირდე პროგრამის მიზნებზე — თუ რა მიზნებზე, ამაზე ქვემოთ განგვაგრძობთ.

2. კარიერული ზრდის უსაზღვრო შესაძლებლობები

ჩივნინგის პროგრამის შექმნის მიზანი იყო, ხარისხიანი უმაღლესი განათლების მიღების შესაძლებლობა მსოფლიოს სხვადასხვა კუთხეში მცხოვრები ახალგაზრდებისთვის მიეცა. პროგრამაში ჩართული სტუდენტები ცოდნასთან ერთად დიდ გამოცდილებასაც იძენენ. უცხო ქვეყანაში სწავლისას ხომ სწავლების განსხვავებულ მეთოდებსა და ახალ, გამოცდილ პედაგოგებს ხვდები. პროგრამის დასრულების შემდეგ კი შენი „წონა“ შრომით ბაზარზე ერთიათად იზრდება — შესაბამისად, მანამდე წარმოუდგენელი კარიერული შესაძლებლობებისკენ გეხსნება გზა.

ჩივნინგი რომ თავის დასახულ მიზანს ასრულებს, ამაზე პროგრამის კურსდამთავრებულების წარმატებაც მეტყველებს. ამ ათიათასობით ადამიანს შორის შეხვდები ცნობილ მწერლებს, ჟურნალისტებს, მოდის დიზაინერებს, პოლიტიკოსებს და ქვეყნის პრეზიდენტებსაც კი.

3. ტრამპლინი პიროვნული განვითარებისთვის

გაცვლითი პროგრამიდან დაბრუნებული სტუდენტებისგან ალბათ გაგიგია, ჩემი თავი ახლიდან აღმოვაჩინეო. ამას რომც არ ამბობდნენ, ყველაფერი ნათლად ჩანს ხოლმე: გაცვლითი წლის, ან თუნდაც სემესტრის შემდეგ, სულ სხვა პიროვნებად ბრუნდებიან შინ. საქმე ისაა, რომ კომფორტის ზონიდან გამოსვლა და ახალ გარემოსთან ადაპტაცია საუკეთესო გზა, ერთგვარი ტრამპლინია პიროვნული განვითარებისთვის. ასე არა მხოლოდ ახალ უნარ-ჩვევებს შეიძენ, აქამდე დამალულ ნიჭს და ინტერესებსაც კი აღმოაჩენ.

ამასთან, თუ ჯერ ამის გამოცდილება არ გქონია, საზღვარგარეთ გატარებული სასწავლო წელი იმის შესაძლებლობასაც გაძლევს, დამოუკიდებლად ცხოვრებას გაუგო გემო. ეს კი, გრძელვადიან პერსპექტივაში, თავდაჯერებულ, მიზანდასახულ და სხვებზე ნაკლებად დამოკიდებულ პიროვნებად გაქცევს.

4. მოგზაურობა და ახალი კულტურის გაცნობა

ჩივნინგის მიზანი მხოლოდ ის როდია, მსოფლიოს წამყვან უნივერსიტეტში მოხვდე. პროგრამა მოგზაურობის და ახალი კულტურის ახლოდან გაცნობის შესაძლებლობასაც გაძლევს. მით უმეტეს, რომ საუბარია ევროპის (და არა მხოლოდ) ერთ-ერთ უმდიდრეს და უძველეს, ბრიტანულ კულტურაზე. და მნიშვნელობა არ აქვს, შერლოკ ჰოლმსი გიყვარს, ჰარი პოტერთან ერთად გაიზარდე თუ „ბითლზია“ შენი საყვარელი ჯგუფი — ბრიტანეთში აუცილებლად იპოვი შენი ცხოვრების ახალ სიყვარულსაც.

გარდა ამისა, ჩივნინგის პროგრამა ინგლისურენოვან კულტურასაც გაზიარებს. ასე რომ, ენობრივ უნარ-ჩვევებსაც განივითარებ და გვერწმუნე, სულ სხვა ინგლისურით საუბარს დაიწყებ.

5. სასარგებლო კავშირების დამყარება

სწავლაც კარგია, პიროვნული ზრდაც და ახალი კულტურის გაცნობაც, მაგრამ, როგორც იტყვიან, ადამიანური ურთიერთობები ფასდაუდებელია. ეს გაცვეთილი, პათეტიკური ფრაზა არ გეგონოს — უამრავი წარმატებული ადამიანი გეტყვის, რომ მათ მიღწევებში დიდი წვლილი აქვს შეტანილი სასარგებლო კავშირებს.

და სად უნდა დაამყარო სასარგებლო კავშირები, თუ არა მსოფლიოს წამყვან უნივერსიტეტებში? აქ ხომ მთელი მსოფლიოდან საუკეთესო „ტვინებია“ თავმოყრილი. დარწმუნებული იყავი, რომ ჩივნინგის პროგრამის ფარგლებში შეძენილი მეგობრებიც დიდ წვლილს შეიტანენ შენს პიროვნულ თუ პროფესიულ ზრდაში.

Chevening-ის სასტიპენდიო პროგრამაზე აპლიკაციების მიღება 2023 წლის 7 ნოემბერს დასრულდება.
მონაწილეობის მისაღებად ეწვიე ვებგვერდს − www.chevening.org/georgia/ 

რაც შეეხება აპლიკაციის შევსებასა და პროგრამისთვის მოსამზადებელ სხვა დეტალებს, საქართველოს ბანკისა და განათლების ცენტრ LEAF-ის თანამშრომლობის ფარგლებში, შეგიძლიათ, გაიაროთ საკონსულტაციო შეხვედრა, რომლის დახმარებითაც მიიღებთ ამომწურავ ინფორმაციას და პასუხებს ყველა კითხვაზე.

მომდევნო შეხვედრებზე დასასწრებად გაიარეთ რეგისტრაცია ბმულზე.

არ გაჩერდე, გააგრძელე კითხვა