ინტერაქციული და შემეცნებითი თამაში — “სხვა სამყარო” მოსწავლეების რჩეულ საბანკო აპლიკაცია sCoolApp-ში ჯერ კიდევ 2023 წელს გამოჩნდა და დიდი მოწონებაც დაიმსახურა. “სხვა სამყაროს” მეორე სეზონი უკვე sCoolApp-შია, თამაშის მონაწილეებს კი ახალი თავგადასავლები, უნიკალური პერსონაჟები და საინტერესო დავალებები ელოდებათ. განახლებული სეზონი განსაკუთრებული სიახლითაც ბრუნდება: მოსწავლეებს “სხვა სამყაროს” პერსონაჟები საკუთარ ისტორიებს უკვე ანიმაციის სახით გააცნობენ, რომელიც სპეციალურად sCoolApp-ისთვის იქმნება.
რა ხდება “სხვა სამყაროში”
“სხვა სამყაროს” მიზანი ინტერაქციული და სახალისო ფორმით ბავშვებში ფინანსური განათლების ხელშეწყობაა. შესაბამისად, “სხვა სამყაროს” სიუჟეტი ისეა შექმნილი, რომ სწავლის პროცესისადმი მოტივაცია და ინტერესი გააღვივოს. თამაშის მექანიკა ასეთია:
- მოსწავლეები ეცნობიან “სხვა სამყაროს” ისტორიას უნიკალური პერსონაჟებით, ილუსტრაციებითა და ანიმაციებით;
- თამაშის პროცესში მოსწავლეები პასუხობენ კითხვებს — ასრულებენ მისიებს, რომელთა შინაარსიც ფინანსურ განათლებას უკავშირდება, ამავდროულად კი სახალისო და შემეცნებითია;
- ყოველ სწორ პასუხზე მოსწავლეები ჯილდოებს — “გლითერებს” აგროვებენ;
- მოსწავლეები ქმნიან საკუთარ ავატარს და დაგროვებული “გლითერებით” ავატარისთვის განახლებულ ნივთებსა და აქსესუარებს ყიდულობენ.
რატომ არის “სხვა სამყარო” მნიშვნელოვანი
სახალისო და თან დამაფიქრებელი შეკითხვები მოსწავლეებს “სხვა სამყაროში” ეტაპობრივად გაეხსნებათ, რომლებზეც ზოგად ცოდნასა და ლოგიკაზე დაყრდნობით უნდა უპასუხონ. მისიების შესრულება, დაჯილდოების მოტივაცია თუ გადაწყვეტილებების მიღება მოსწავლეებს ეხმარებათ, რომ რეალურ ცხოვრებაში პრაქტიკული უნარებიც განივითარონ. ამასთანავე, “სხვა სამყაროში” დროის სასიამოვნოდ გატარებასთან ერთად, სხვადასხვა მისიის ფარგლებში მოსწავლეები საკუთარი ანგარიშის მართვას, ფინანსების კონტროლსა და ყულაბის მეშვეობით თანხის დაგროვებას ეტაპობრივად სწავლობენ. გარდა ამისა, თამაშის პროცესში მოსწავლეები სპეციალურად მათთვის შექმნილ შეთავაზებებსაც ეცნობიან.
ვის შეუძლია “სხვა სამყაროში” აღმოჩნდეს
“სხვა სამყაროს” თავგადასავალში ჩასართავად, აუცილებელია, საქართველოს ბანკის sCoolApp-ის მომხმარებელი იყო და აპლიკაცია სმარტფონში გადმოწერილი გქონდეს. თუ მოსწავლე ჯერ კიდევ არ არის sCoolApp-ის მომხმარებელი, საჭიროა, გადმოწეროს აპლიკაცია Android ან iOS მოწყობილობისთვის, გაიაროს მარტივი რეგისტრაცია თავისი და მშობლის მონაცემების მითითებით, ბოლოს კი მშობელმა sCoolApp-ის აქტივაცია თავისი მობილბანკიდან უნდა დაადასტუროს.