მართალია, ისტორიულადაც ყოველთვის ასე იყო, თუმცა დამოუკიდებლობის აღდგენის შემდეგ საქართველოსთვის კიდევ უფრო პრიორიტეტული გახდა მისი სტრატეგიული მდებარეობა, რომელზეც გადის თანამედროვე „აბრეშუმის გზა“. მიუხედავად იმისა, რომ არსებობს სხვა გზებიც, რომლითაც აზია და დასავლეთი ერთმანეთს უკავშირდება, საქართველო დღემდე ინარჩუნებს „შუა დერეფნის“ მნიშვნელოვან როლს, რომელიც ხშირად გადამწყვეტია არამხოლოდ საქართველოსთვის, არამედ ევროპისა და აზიის არაერთი ქვეყნისთვისაც.
სწორედ საქართველოს და ზოგადად, შუა დერეფნის სატრანზიტო პოტენციალი იქნება რიგით მეოთხე საერთაშორისო ფორუმის – „თბილისის აბრეშუმის გზა“ – მთავარი განხილვის თემა. ფორუმი, რომელიც 26-27 ოქტომბერს გაიმართება, საქართველოს მთავრობის ორგანიზებით, აზიის განვითარების ბანკის პარტნიორობითა და საქართველოს ბანკის გენერალური სპონსორობით ტარდება.
„თბილისის აბრეშუმის გზა“ 2015 წლიდან იმართება და მას მაღალი რანგის საერთაშორისო სტუმრები და მონაწილეები ესწრებიან. წელს, გახსნითი პანელის ფორმატში, შუა დერეფნის მნიშვნელობაზე ისაუბრებენ საქართველოს, სომხეთის, აზერბაიჯანის და მონტენეგროს პრემიერმინისტრები, ასევე, აზიის განვითარების ბანკის ვიცეპრეზიდენტი.
ფორუმს 60 ქვეყნიდან 2000-მდე სტუმარი დაესწრება. მათ შორის იქნებიან პოლიტიკური და ბიზნეს ლიდერები, ექსპერტები და საერთაშორისო ორგანიზაციების წარმომადგენლები. ასევე, სხვადასხვა პანელის მოდერატორის ფუნქციას შეითავსებენ წამყვანი მედია საშუალებების (BBC, Deutsche Welle და სხვ.) ჟურნალისტები/წამყვანები.
„თბილისის აბრეშუმის გზის“ ფარგლებში გაიმართება პანელი TRADE4FUTURE, სადაც სტუმრები და ექსპერტები თავისუფალი ვაჭრობის მომავალზე ისაუბრებენ. ისინი განიხილავენ ციფრული ვაჭრობის მზარდ როლს და შუა დერეფნის მნიშვნელობას, როგორც აღმოსავლეთსა და დასავლეთს შორის ვაჭრობის ახალ ალტერნატიულ გზას. ამ საკითხებზე პანელის ფორმატში ისაუბრებენ საქართველოს ეკონომიკის მინისტრის მოადგილე, გენადი არველაძე, ჩეხეთის წარმოებისა და ვაჭრობის სამინისტროს სახელმწიფო მდივანი, მარტინა დევეროვა, შავი ზღვის ეკონომიკური თანამშრომლობის ორგანიზაციის (BSEC) გენერალური მდივანი, ლაზარ კომანესკუ და სპარსეთის ყურის არაბული ქვეყნების თანამშრომლობის საბჭოს გენერალური მდივანი იასიმ მუჰამედ ალ-ბუდაივი.
ამასთან ერთად ფორუმზე განხილული იქნება ისეთი მნიშვნელოვანი საკითხები, როგორებიცაა:
- სატრანზიტო დერეფნის უკეთესი ალტერნატივა: ჩრდილოეთის დერეფანთან შედარებით, რომელიც რუსეთის გავლით გადის, საქართველოს ალტერნატივა მრავალი ფაქტორის გათვალისწინებით გაცილებით უფრო მოსახერხებელი და ეფექტიანი დამაკავშირებელია აზიასა და ევროპას შორის.
- უნიკალური შესაძლებლობები ინვესტორებისთვის: ბოლო წლებში გამოჩნდა, რომ თავისი სტრატეგიული მდებარეობის გამო და თავისუფალი ბაზრის პრინციპების ხელშეწყობით საქართველოში ინვესტირების ბუმი იყო, რამაც, ერთი მხრივ, მნიშვნელოვნად გააძლიერა ადგილობრივი ეკონომიკის განვითარება, ამავდროულად კი უცხოური კომპანიებისთვის ბაზრის ახალი ჰორიზონტი გააჩინა.
- ტურიზმის ციებ-ცხელება: საქართველო რეგიონში ერთ-ერთ ყველაზე მიმზიდველ ტურისტულ დანიშნულების ადგილად გადაიქცა, რასაც ცხადყოფს უცხოელი დამსვენებლების მაჩვენებლის ყოველწლიური ზრდა. ეს კი იმასთან ერთად, რომ ადგილობრივი ბიზნესის განვითარებას უწყობს ხელს, ამავდროულად ინვესტორებისთვის კიდევ უფრო ხელსაყრელ გარემოდ აქცევს საქართველოს.
ფორუმის ფარგლებში ამ და კიდევ სხვა ბევრ თემაზე გაიმართება არაერთი შეხვედრა როგორც სხვადასხვა ქვეყნის პოლიტიკურ, ასევე ბიზნესის წარმომადგენლებს შორის.
ფორუმი „თბილისის აბრეშუმის გზა“ 2015 წლიდან რეგულარულად, 2 წელიწადში ერთხელ იმართება და ყოველთვის დიდ ინტერესს იწვევდა როგორც ადგილობრივ, ასევე საერთაშორისო მედიაში. წლევანდელი ფორუმი 2019 წლის შემდეგ პირველად იმართება და შეგვიძლია, თამამად ვივარაუდოთ, რომ დროთა განმავლობაში, შუა დერეფნის მნიშვნელობის ზრდასთან ერთად ეს ინტერესი კიდევ უფრო გაიზრდება.