თანამედროვე შრომითი ბაზრის ტრანსფორმაციის პროცესში ერთ-ერთი მთავარი მამოძრავებელი ძალა ხელოვნური ინტელექტია, რომელიც მნიშვნელოვნად ზრდის თანამშრომლების ეფექტიანობასა და პროდუქტიულობას. ამ ტენდენციას არც საქართველო ჩამორჩება და გასულ წელს სტარტაპი Helio.AI გამოჩნდა – რეკრუტინგის ინოვაციური სისტემა, რომელიც ბიზნესებს საუკეთესო კანდიდატების სწრაფად შერჩევაში ეხმარება.
ახლახან ამ ქართულმა სტარტაპმა სილიკონის ველის აქსელერატორისგან 500 Global in Eurasia-სგან $100 000-იანი ინვესტიცია მოიზიდა, რაც კომპანიის განვითარებისთვის უმნიშვნელოვანესი წინსვლაა. Helio.AI-ის თანადამფუძნებლი და აღმასრულებელი დირექტორი, იაკო ჯიქია გვიყვება, როგორ იქცა მათი იდეა რეალურ ბიზნესად, რომელმაც დროის მცირე პერიოდში უკვე შეძლო წარმატების მიღწევა.
Helio.AI-ის ტექნოლოგია და მისი შექმნის იდეა
Helio.AI-ის იდეა პრაქტიკული გარემოებიდან გაჩნდა: სტარტაპის გუნდში ოთხი თანადამფუძნებელია, რომლებიც ყოველდღიურად აწყდებოდნენ ტრადიციული რეკრუტინგის პრობლემებს, მათ კი ამ პრობლემების მოგვარება AI-ის დახმარებით გადაწყვიტეს.
“ტრადიციული შერჩევის პროცესი აღარ არის ეფექტური. რეკრუტერები თავიანთი დროის 70%-ს რუტინულ საქმიანობას ახმარენ, პროცესები ხანგრძლივია, ხშირად კანდიდატები ინტერვიუებზე არც კი მოდიან და თითქმის ყოველი მეორე შერჩევა წარუმატებელია.
მიღებული ასობით რეზიუმე, უამრავი მანუალური საქმე, არდაბრუნებული უკუკავშირი და არანაირი რეპორტინგი – ეს ყველაფერი გახდა შთაგონება იმისათვის, რომ შეგვექმნა რაღაც ახალი, რომელიც შეცვლიდა შერჩევის პროცესს არა მარტო საქართველოში, არამედ მთელ მსოფლიოში”, – ამბობს სტარტაპის თანადამფუძნებელი.
Helio.AI-ის სისტემა ავტომატურად კითხულობს შემოსულ რეზიუმეებს და მათ ვაკანსიის მოთხოვნებს ადარებს.
“პროცესის სრული ციკლის ავტომატიზაციას ხელოვნური ინტელექტით ვახდენთ, რომელიც ასევე კანდიდატების რეზიუმეების და გამოცდილების გაანალიზებაში გვეხმარება. მათ რბილ უნარებს, ტიპაჟს და პოზიციასთან შესაბამისობას სიტუაციური თამაშით განვსაზღვრავთ,” – აღნიშნავს იაკო ჯიქია.
ბიზნესმოდელი და სამომავლო გეგმები
Helio.AI-ს ბიზნესმოდელი მოქნილი და მარტივია – კომპანიები ყოველთვიური გადახდის პრინციპით სარგებლობენ სერვისით, რაც მნიშვნელოვნად ზოგავს ბიუჯეტს.
“Helio-ში ჩართვა ძალიან მარტივია, არ საჭიროებს ინტეგრაციას და მისი გამოყენება მომენტალურად არის შესაძლებელი. მომხმარებლები ყოველთვიური გადახდის პრინციპით სარგებლობენ და მნიშვნელოვნად ზოგავენ ბიუჯეტს. მომსახურების საფასური კომპანიის ზომასა და რეკრუტინგის მოცულობაზეა დამოკიდებული”.
დღეს Helio.AI-ის 70-ზე მეტი კომპანია იყენებს საქართველოში, განურჩევლად მათი ზომისა და რეკრუტინგის სიხშირისა. სტარტაპის სამომავლო გეგმები კი ნამდვილად ამბიციურია.
“ჩვენი მიზანია შევცვალოთ რეკრუტინგი არა მხოლოდ საქართველოში და რეგიონში, არამედ მსოფლიოში! უახლოეს პერიოდში დიდი დრო დაეთმობა პროდუქტის კიდევ უფრო განვითარებას და ჩვენი პარტნიორი კომპანიებისგან უკუკავშირების მიღებას. უკვე გადავდგით პირველი ნაბიჯები საქართველოს საზღვრებს გარეთ გასასვლელად, რამდენიმე ბაზარს უკვე შევთავაზეთ Helio-ს პროდუქტი და მიმდინარეობს აქტიური ტესტირება. საქართველოში სწრაფი ზრდის პარალელურად, უკვე პირველი კომპანიები გვყავს უზბეკეთში. ამას გარდა, სამიზნე ბაზრებია ყაზახეთი და სომხეთი”, – ამბობს Helio.AI-ის თანადამფუძნებელი.
აღსანიშნავია, რომ Helio.AI საქართველოს ბანკის მიერ მხარდაჭერილ სააქსელერაციო პროგრამაში მონაწილეობს და ცოტა ხნის წინ, მან სილიკონის ველის ვენჩურული ფონდისგან, 500 Global in Eurasia-სგან $100,000-იანი ინვესტიცია მოიზიდა, რაც სტარტაპს განვითარებასა და სწრაფ ზრდაში დაეხმარება.
“Helio-ს ოთხივე თანადამფუძნებელს დიდი გამოცდილება გვაქვს როგორც ქართულ, ისე საერთაშორისო კომპანიებში მუშაობის. თუმცა როგორც კი სტარტაპ ეკოსისტემაში შევაბიჯეთ, მივხვდით, რომ სრულიად განსხვავებულ გარემოში მოვხვდით და წინ დიდი თავგადასავალი გველოდა. 500 Global in Eurasia-ს პროგრამაში მონაწილეობა ჩვენთვის დიდი გამოწვევა და შესაძლებლობა იყო.
ორგანიზატორების და მენტორების რეკომენდაციები, რჩევები და ხედვები ყოველდღიურად გვეხმარება ზრდაში, სწრაფი ტემპით განვითარებასა და დიდ მასშტაბებზე გასვლაში. კავშირების დამყარება, სტარტაპერების გაცნობა, მათი გამოცდილებების გაზიარება კი, მეორეს მხრივ, დასახულის მიზნების მიღწევაში გვეხმარება. ეს პროგრამა სტარტაპებს ყველა იმ სირთულისთვის ამზადებს, რომელიც ამ ეკლიან გზაზე შეიძლება შეგვხვდეს, იქნება ეს ახალი ბაზრების ათვისება, ინვესტიციების მოზიდვა, გაყიდვების სწორი დაგეგმვა თუ სხვა”. – აღნიშნავს კომპანიის თანადამფუძნებელი.
Helio.AI-ს ინოვაციური მიდგომა, მოქნილი ბიზნესმოდელი, სააქსელერაციო პროგრამიდან მიღებული ცოდნა და ინვესტორების მხარდაჭერა მას ერთ-ერთ ყველაზე პერსპექტიულ სტარტაპად აქცევს საქართველოში, რომელსაც უდავოდ შეუძლია გლობალური წარმატების მიღწევა.