“ეს არ არის მხოლოდ რესტორანი. აქ ვცხოვრობთ კიდეც და ყველაფერი ჩვენი ხელითაა გაკეთებული, განსაკუთრებით დედაჩემის ხელით. ამიტომ, ძალიან ფრთხილად ვარჩევთ მსგავს პროექტებს. უარიც გვითქვამს, რადგან მიზანი არა უბრალოდ პოპულარობა, არამედ, იმ სამზარეულოსა და გემოების გაცნობა და დაფასებაა, რასაც ვთავაზობთ”.
ლია დეიდა არგვეთში მდებარე საოჯახო ტიპის რესტორანია. როგორც მისი მასპინძელი, გიორგი ჟორჟოლაძე ამბობს, საქართველოს ბანკის პროექტ გასტროლებით დაინტერესებული იყო და როცა მონაწილეობის მიღება შესთავაზეს, ბუნებრივია, უარი არ უთქვამს.
“ამ პროექტში სწორად არის აქცენტები დასმული — საუბარია სამზარეულოზე და გემოებზე. ზუსტად იმაზე, რაც ჩვენი რესტორნის კონცეფციაა და რისთვისაც ვაკეთებთ ამ საქმეს”, — აღნიშნავს გიორგი.
ამბობს, რომ თითქმის, მთელი საქართველო აქვს შემოვლილი და ზედმიწევნით იცის, რომელ კერძს სად აკეთებენ უფრო კარგად. სწორედ, ამ მოგზაურობების დროს აღმოაჩინა, რომ არ არსებობს რესტორანი, რომელიც სტუმრებს მხოლოდ იმერულ კერძებს შესთავაზებს და ამ მხარის გემოებს კარგად გააცნობს. ამიტომ ოჯახმა გადაწყვიტა, საკუთარ სახლში გაეხსნა რესტორანი, სადაც ყველა კერძი ნატურალური პროდუქტით მომზადდებოდა. ეს არის მგზავრებზე გათვლილი რესტორანი — როცა აღმოსავლეთიდან დასავლეთისკენ ან პირიქით მიმართულებით გადაადგილდებიან. ყველა პროდუქტს ან თავად აწარმოებენ, ან იქვე, მეზობლებისგან ყიდულობენ, შესაბამისად, ჯანსაღ პროდუქტს იყენებენ და ეს კერძებსაც ეტყობა.
“გვინდა, რომ აქ მოსულმა სტუმარმა გემრიელად ჭამოს, იმერულ გემოს გაეცნოს და დაისვენოს. გასტროლების, როგორც პროექტის, მიზანიც სწორედ ეს არის, რომ ხალხს ისეთი ადგილები გააცნოს, სადაც დამახასიათებელ, ავთენტურ გემოებს გასინჯავენ. ამიტომ დავთანხმდით სიამოვნებით, რომ გვემასპინძლა და იმერული სამზარეულო შეგვეთავაზებინა. პროექტში მონაწილეობის შემდეგ ჩვენი სამზარეულოთი დაინტერესებულთა რიცხვი გაიზარდა. განსაკუთრებით მოთხოვნა იყო მწვანე პომიდვრის ფხალზე, რომელზეც სტუმარი ვიდეოს ბოლოს საუბრობს. ასევე, გვყავდნენ სტუმრები, რომლებმაც გვითხრეს, რომ გასტროლებში გვნახეს და სტუმრობა გადაწყვიტეს”, — გვიყვება გიორგი.
ქვეყნის მასშტაბით ძალიან ბევრი და ბევრნაირი კვების ობიექტია, თუმცა, მიუხედავად რაოდენობისა, ყოველთვის, როცა დროის გემრიელად გატარება გვინდა, არჩევა გვიჭირს. საქართველოს ბანკის პროექტ გასტროლების მიზანი კი სწორედ ეს არის — მდიდარი ქართული კულინარიული მემკვიდრეობის აღმოჩენა და გაცნობა. მისი დახმარებით გავეცნობით ლია დეიდას მსგავს კაფე-რესტორნებს, სადაც მთავარი პრიორიტეტი ნამდვილი გემოა.