Glorri ანარ გასიმლის მიერ დაფუძნებული სტარტაპია, რომელიც რეკრუტირების პროცესს მნიშვნელოვნად ამარტივებს. მისი მეშვეობით ადამიანური რესურსის მაძიებლები და სამუშაოს დაწყების მსურველები მარტივად აანალიზებენ, სასურველი კომპანიისა და კადრის მონაცემებს.
როგორ ხდება ეს? დეტალურად Glorri-ს შესახებ მის დამფუძნებელს გავესაუბრეთ:
– როგორ დაიბადა Glorri?
15 წელზე მეტი ხნის განმავლობაში აქტიურად ვიყავი ჩართული კადრების აყვანის პროცესში. ამ პერიოდში მრავალ გამოწვევას წავაწყდი დიჯიტალიზაციის, გამჭვირვალობის, გაზომვადი სისტემის და ცუდი კომუნიკაციის გამო დეპარტამენტებში. სწორედ ამიტომ, გადავწყვიტე შემექმნა Glorri, რომელიც გლობალურ დონეზე კადრების აყვანის გამოწვევებს გადაჭრიდა.
– ვინ არიან დამფუძნებლები და როგორია მათი გამოცდილება ამ სფეროში?
Glorri-ს დამფუძნებელი ვარ მე – ბიზნესის განვითარების 20 წლიანი გამოცდილებით.
– გვიამბეთ დეტალურად, რას სთავაზობს თქვენი სტარტაპი მომხმარებელს და რა პრობლემას წყვეტს იგი?
დღეს მსოფლიოში არსებობს HR-ების „თვალთვალის“ ათობით სისტემა. ტიპური ATS-ები (Applicant Tracking System) საკმაოდ კარგ საქმეს აკეთებენ კანდიდატების ნაკადის მართვაში. თუმცა, Glorri-ში განსაკუთრებული ის არის, რომ პლატფორმა აერთიანებს ATS & მონაცემთა მეცნიერებას & კარგი კადრების მონაცემთა ბაზას. პრობლემა, რომლის გადაჭრაც კომპანიებს სურთ, არის საუკეთესო ადამიანის აყვანა რაც შეიძლება სწრაფად. ტიპური ATS-ით ამ პროცესს ჯერ კიდევ 30-დან 45-მდე დღე სჭირდება. Glorri-ს კი შეუძლია, ეს დრო 15 დღემდე შეამციროს კანდიდატებზე ქულების მინიჭებით. როგორ? Glorri აგროვებს მეტამონაცემებს კანდიდატის შესახებ ყველა კომპანიისგან, რომლებსაც კანდიდატთან ჰქონია ურთიერთობა; შემდეგ კი HR-ებს ეს ანონიმური ქულები მიეწოდებათ. ეს უზრუნველყოფს გადაწყვეტილების პროცესის დაჩქარებას და სწორი ადამიანების აყვანას.
ჩვენ ასევე ვთავაზობთ პორტალს კანდიდატებს, რომელიც ეხმარება მათ დამსაქმებლების შესახებ ინფორმაციის გაგებაში. პლატფორმა აღჭურვილია მონაცემთა ღრმა ანალიტიკით, სადაც კანდიდატებს შეუძლიათ წვდომა მიიღონ მონაცემებზე და შეადარონ კომპანიის ბონუსები და ხელფასები, მიიღონ უფრო ღრმა ინფორმაცია მათი დაქირავების პროცესისა და კომპანიის ღირებულებების შესახებ, ასევე ჰქონდეთ პირდაპირი მიმოწერა HR გუნდებთან. პლატფორმის მეშვეობით კანდიდატებს შეუძლიათ, იწინასწარმეტყველონ დაქირავების პროცესის დრო.
– როგორი იყო Glorri-ს პირველი ნაბიჯები?
თავდაპირველად ჩავატარეთ ბაზრის ღრმა კვლევა ადგილობრივ და გლობალურ დონეზე, რათა გაგვეგო დღევანდელი გამოწვევები რეკრუტინგის პროცესთან დაკავშირებით. ასევე, გავაანალიზეთ ბაზრის პოტენციალი და საბოლოოდ შექმენით კვალიფიციური გუნდი Glorri-სთვის.
– რა სირთულეებს წააწყდით განვითარებასთან დაკავშირებით?
კვალიფიციური IT სპეციალისტის პოვნა ჩვენი ყველაზე დიდი გამოწვევა იყო.
– ადრე თუ მიგიღიათ მონაწილეობა სხვა ტიპის აქსელერატორში?
დიახ. ჩვენ ვმონაწილეობდით ისეთ პროგრამებში, როგორებიცაა: 500 Alberta Acceleration Program (კანადაში), ITU ინკუბაცია (თურქეთი), Sabah Lab (აზერბაიჯანი).
– რატომ გინდოდათ 500 Georgia-ში მონაწილეობა?
ჩვენ გავტესტეთ ჩვენი პროდუქტი ადგილობრივ ბაზარზე და გვინდა, ამჯერად გლობალურ ბაზარზე წარვადგინოთ ის. მენტორებთან მუშაობისას ჩვენ შეგვიძლია მივიღოთ მეტი ცოდნა და გამოცდილება
გლობალური ექსპანსიის სხვადასხვა ასპექტებზე.
– როგორია თქვენი მოლოდინი პროგრამასთან დაკავშირებით?
ჩემი სტარტაპისთვის უდიდესი სარგებელი მოაქვს ამ პროგრამაში მონაწილეობას, როგორც მენტორობის, ისე გაყიდვების მხრივაც. სწორედ ამ პროგრამის წყალობით მოვახერხე ადგილობრივი პარტნიორების პოვნა სამიზნე ბაზრებზე.
– და ბოლოს, ზოგადად, როგორია თქვენი სამომავლო გეგმები?
პროდუქტის ადგილობრივად ვალიდაციის შემდეგ, ჩვენ მიზნად ვისახავთ გავფართოვდეთ მეზობელ ქვეყნებში, ხოლო შემდეგ გადავიდეთ MENA-სა და APAC-ში, სადაც HR ინსტრუმენტების საჭიროება სწრაფად იზრდება.