ქართული ჯუდო – 2023 წლის შეჯამება

საქართველოს ბანკი საქართველოს ოლიმპიური ნაკრების მთავარი სპონსორია და არა მარტო – ყოველთვის და ყველგან მხარს უჭერს ადამიანებს, რომლებიც არ ჩერდებიან და საკუთარი წარმატებით უკეთეს საქართველოს ქმნიან.

იაპონიის დედაქალაქ ტოკიოში გამართული ჯუდოს გრანდ სლემით, რომელიც მსოფლიოში ჯუდოს ყველაზე პრესტიჟულ ასპარეზობად ითვლება, დასრულდა 2023 წლის სეზონი – 2 და 3 დეკემბერს ტოკიოში ძალები საქართველოს ნაკრების შვიდმა ჯუდოკამ გამოცადა (5 კაცი და 2 ქალი). სამწუხაროდ, მხოლოდ ორი მედლის მოპოვება მოვახერხეთ:

ლუკა მაისურაძე (-90 კილოგრამ წონით კატეგორიაში) – 🥈

გიორგი ტერაშვილი (-73 კიგორამ წონით კატეგორიაში) – 🥉

საბედნიეროდ, ის უნდა ითქვას, რომ ჩვენი ჯუდოკებისგან ყოველთვის ბევრად მეტი მოლოდინია და ამ მოლოდინს ყოველთვის აქვს სპორტული თუ ფსიქოლოგიური საფუძველი. რაც მთავარია, 2024 ოლიმპიადის წელია, წინ არის უმნიშვნელოვანესი სპორტული წელი და ზაფხულის ოლიმპიური თამაშები, რომლის მასპინძელიც საფრანგეთის დედაქალაქი, პარიზი იქნება. მოსამზადებელი დრო საკმარისია – საქართველოს ჯუდოს ნაკრებს შეუძლია, საუკეთესო ფორმაში შეხვდეს ამ ტურნირს.

რაც შეეხება 2023 წელს, ბევრ საინტერესო და ძლიერ ასპარეზობაზე (გრანდ სლემები; ევროპის ჩემპიონატი) მოგვიწია თვალის მიდევნება და ჩვენი ჯუდოკების გულშემატკივრობა;

საკლუბო ჯუდოშიც გვაქვს ძალიან მნიშვნელოვანი და აუცილებელი სიახლეები – ფრანგული ჯუდოს გამორჩეულმა საკლუბო ორგანიზაციამ, პსჟ-მ უძლიერესი ქართველი ჯუდოკები დაიმატა: ლაშა შავდათუაშვილი (73 კგ.), ტატო გრიგალაშვილი (81 კგ.) და ლაშა ბექაური (90 კგ.) – ქართველი ვარსკვლავები ფრანგული ჯუდოს გრანდის ღირსებას დაიცავენ ევროპის საკლუბო ჩემპიონატზე, იგივე ჩემპიონთა ლიგაზე. ტურნირი სერბეთის დედაქალაქ ბელგრადში გაიმართება. შარშანდელი ჩემპიონთა ლიგის (რომელიც ქალაქ გორში გაიმართა) გამარჯვებული ქართული კლუბი მებრძოლი გახდა. ქართველებმა ფინალში ძალიან ძლიერ ცრვენა ზვეზდას მოუგეს. მებრძოლში ირიცხებოდა ოლიმპიური ჩემპიონი, ლაშა ბექაური, რომელსაც წელს ტიტულის დაცვა პარიზელთა რიგებიდან მოუწევს. საქართველოს ნაკრების უცვლელი წევრები საუკეთესო ფორმაში შეხვდებიან ახალ წელს, მთავარია ჯანმრთელობა, უტრავმობა და ოლიმპიურ თამაშებამდე საუკეთესო სპორტულ თუ მენტალურ ფორმაში ყოფნა.

რაც შეეხება სანაკრებო ტურნირებს, 2023 წლიდან რამდენიმე მათგანის გამორჩევა შეიძლება, რამდენიმეზე კი პირიქით – შეგვიძლია ვთქვათ, რომ მეტი მოლოდინი გვქონდა (მათ შორის წლის ბოლო ტურნირზე ტოკიოს გრანდ სლემზე), თუმცა ინდივიდუალური სპორტების სპეციფიკა ასეთია, უამრავი გარე ფაქტორი ზემოქმედებს ინდივიდზე და საბოლოო შედეგებზეც აისახება ფორმაში ყოფნა-არყოფნის მინიმალური ასპექტებიც კი. აქ კიდევ ერთხელ ვთქვათ და ვიმედოვნოთ, რომ ოლიმპიურ თამაშებზე მინიმალური ასპექტები თუ ნებისმიერი გარე ფაქტორი ჩვენს სასიკეთოდ შემობრუნდება.

ზაფხულში სლოვენიის ქალაქ მარიბორში გამართულ ახალგაზრდულ ოლიმპიურ ფესტივალზე შესანიშნავად გამოვიდა საქართველოს ახალგაზრდული ჯუდოკების ნაკრები (14-დან 18- წლამდე სპორტსმენები): 3 ოქრო, 2 ვერცხლი და 1 ბრინჯაო – ბრწყინვალე ინდივიდუალური შედეგები და სხვა სრულიად ყველა ჯუდოკების ღირსეული გამოსვლა ფესტივალზე.

უნდა ვახსენოთ უნგრეთის დედაქალაქში გამართული ბუდაპეშტის მასტერსიც – ფრანგული პსჟ-ს ახალწვეულმა ქართველებმა სწორედ ამ ტურნირზე მოახერხეს თავიანთი მედლების მოპოვება, სხვა ქართველებიც გამოირჩნენ, საბოლოო შედეგი კი ასეთი იყო: 1 ოქრო, 1 ვერცხლი და 4 ბრინჯაო – ამ შედეგით 22-ქვეყნიან საერთო ჩათვლაში ჩვენ მოვახერხეთ და მესამე ადგილზე გავედით. გაგვასწრეს მხოლოდ და მხოლოდ იაპონიამ და საფრანგეთმა.

იმავე ტურნირზე დაფიქსირდა სიმბოლური ფაქტიც, როცა 90 კილოგრამ წონით კატეგორიის ფინალში ერთმანეთს ქართველები დაუპირისპირდნენ – ლაშა ბექაური და ლუკა მაისურაძე ბუდაპეშტში ოქროსთვის შეერკინნენ ერთმანეთს. ძალიან დაძაბულ ბრძოლაში, რომელიც დამატებით დროშიც კი გადავიდა, „გოლდენ სქორში“ მოწინააღმდეგის სამი ყვითლის ხარჯზე გაიმარჯვა ლაშა ბექაურმა.

ტოკიოს გრანდ სლემამდე ზუსტად ერთი თვით ადრე საფრანგეთის ქალაქ მონპელიეში გაიმართა ევროპის ჩემპიონატი ჯუდოში – სულ 15 ჯუდოკით გავედით ამ ტურნირზე და მოვიპოვეთ 4 ვერცხლის მედალი – ტატო გრიგალაშვილი (81 კგ); ლაშა ბექაური (90 კგ); ილია სულამანიძე (100 კგ); გურამ თუშიშვილი (+100 კგ). საერთო გუნდურ ჩათვლაში საქართველოს ნაკრები მე-9 ადგილზე გავიდა (მხოლოდ ვაჟების გათვალისწინებით, მე-7 ადგილზე).

წლის ბოლოს, ტოკიოს გრანდ სლემის დასრულების შემდეგ ჯუდოს საერთაშორისო ფედერაციამ (IJF) განახლებული რეიტინგი გამოაქვეყნა – ცვლილებები ქართველ სპორტსმენებზეც აისახა. რამდენიმე სარეიტინგო მონაცემია ჩვენთვის მნიშვნელოვანი: ვაჟა მარგველაშვილი 60 კილოგრამ წონით კატეგორიის რეიტინგში საუკეთესო სამეულში ადგილს ინარჩუნებს; ქართული ჯუდოს ლეგენდა, ლაშა შავდათუაშვილი (73 კგ.) მე-5 ადგილზეა; ტატო გრიგალაშვილი, ტრადიციულად, 81 კგ. კატეგორიის ლიდერია; 90 კილოგრამ კატეგორიაში პირველზეა ლუკა მაისურაძე, მესამე ადგილზე დაქვეითდა ლაშა ბექაური; დამაჯერებლად ლიდერობს თავის წონას (100 კგ.) ილია სულამანიძე.

განახლებული რეიტინგი დაახლოებით წარმოდგენას გვიქმნის და საერთო სურათის დანახვის საშუალებას იძლევა – საქართველოს ჯუდოს ნაკრებში მაღალი კონკურენციაა და ნებისმიერ ტურნირზე ერთ-ერთ მთავარ ფავორიტად მიიჩნევა. ეს გვიჩვენა 2023-მა წელმა და წინ უფრო მნიშვნელოვანი 2024 წელია.

არ გაჩერდე, გააგრძელე კითხვა