ფინალის ტოლფასი მატჩი: საქართველოს U21 ნაკრები შვედეთის წინააღმდეგ

საქართველოს U21 საფეხბურთო ნაკრები საკვალიფიკაციო ჯგუფის ბოლო შეხვედრებამდე ინარჩუნებს რეალურ შანსს, ზედიზედ მეორედ ითამაშოს ევროპის ჩემპიონატის ფინალური ეტაპზე. 5 მოგება, 1 ფრე, 2 წაგება, ჯამში 16 ქულა – რამაზ სვანაძის გაწვრთნილი გუნდი C ჯგუფის მეორე ადგილზეა, თუმცა წინაა უმნიშვნელოვანესი მატჩი მთავარი კონკურენტის წინააღმდეგ:

შვედეთი U21 VS საქართველო U21 – 10 ოქტომბერი, 20:00 საათი.

შვედეთის ახალგაზრდულმა ნაკრებმა ბოლო თამაშში მოლდოვას წინააღმდეგ მნიშვნელოვანი ქულები დაკარგა და ჩვენ შეგვინარჩუნა მეორე ადგილი ჯგუფში, თუმცა კიდევ უფრო გაიზარდა მომავალი მატჩის დაპირისპირება – ეს იქნება ფაქტობრივი ფინალი, რომელიც გაარკვევს, თუ რომელი ნაკრები გავა ჯგუფში მეორე ადგილზე და გააგრძელებს ბრძოლას ევროპის ჩემპიონატის საგზურისთვის.

2025 წლის ევროპის ჩემპიონატს სლოვაკეთი უმასპინძლებს. საერთო ჯამში ფინალური ეტაპის 15 საგზური თამაშდება – 9 ჯგუფის გამარჯვებული ნაკრებები, 9 ჯგუფის 3 საუკეთესო მეორე ადგილოსანი და 3 საგზურს პლეი-ოფის პრინციპი გამოარკვევს, რომელსაც დარჩენილი 6 მეორეადგილოსანი გადაითამაშებს.

რადგან ჩვენს ახალგაზრდულ ნაკრებს წინ კიდევ ორი თამაში აქვს დარჩენილი (შვედების შემდეგ ჩრდ. მაკედონიის U21 ნაკრებს ვუმასპინძლებთ თბილისში), ყველაფერი შეიძლება მოხდეს – შესაძლებელია, მოვიპოვოთ პირდაპირი საგზური სამ საუკეთესო მეორეადგილოსანში მოხვედრის გამო, ანდაც გადავერთოთ პლეი-ოფზე და დაველოდოთ წილისყრას, რომელიც ქალაქ ბრატისლავაში 3 დეკემბერს გაიმართება.

გავიხსენოთ გასული ევროპის ჩემპიონატი, რომლის მასპინძლებიც ვიყავით და შესანიშნავად ვიასპარეზეთ კიდეც: ფაქტობრივად, სიკვდილის ჯგუფში პირველი ადგილი დავიკავეთ და ძალიან დასანანად მეოთხედფინალში დავმარცხდით ისრაელთან პენალტების სერიაში. დავამყარეთ ტურნირის დასწრების აბსოლუტური რეკორდი და რეკორდები.

ყველაზე მნიშვნელოვანი, რაც გასულ ევროპის U21 ჩემპიონატზე ვნახეთ და დაგვამახსოვრდება ყოველთვის, ახალგაზრდა ფეხბურთელების სრული სპორტული თავგანწირვა იყო – წარმოუდგენელი გრაფიკისა და დატვირთვის მიუხედავად, ეროვნული ნაკრების წევრი ფეხბურთელები ახალგაზრდულის დასახმარებლადაც ჩამოვიდნენ და წარმოუდგენელი ძალა გააჩინეს. ახალგაზრდული ასაკიდან მსგავსი სპორტული ჟინი და საქმისადმი დამოკიდებულება მხოლოდ საკუთარი თავისთვის და ნაკრებისთვის გაკეთებული საქმე არაა – ეს არის მაგალითი ახალგაზრდა სპორტსმენებისთვის.

დაველოდოთ 10 ოქტომბერს და ვუქომაგოთ რამაზ სვანაძის გუნდს შვედეთის წინააღმდეგ ფინალის ტოლფას თამაშში, ვიმედოვნოთ, რომ ახალ ამბავსა და მაგალითებს გამოვაცხობთ – პროცესი გრძელდება და საუკეთესო წინ არის!

საგულშემატკივრო ბარათის შეკვეთა

არ გაჩერდე, გააგრძელე კითხვა